ខេត្តកណ្តាល ៖ មុខសញ្ញាជួញដូរគ្រឿងញៀន និងជាទណ្ឌិតធ្លាប់ជាប់ពន្ធនាគារ២លើក ត្រូវបាននគរបាលស្រុកស្អាងធ្វើការបង្ក្រាបបាន២នាក់ រួមនឹងថ្នាំញៀន២កញ្ចប់ ដែលហេតុការណ៍នេះបានកើតឡើងកាលពីវេលាម៉ោង២និង៣០នាទីថ្ងៃទី៣ ខែធ្នូ ឆ្នាំ២០១៨ នៅចំណុចភូមិខ្ពបក្រោម ឃុំខ្ពប ស្រុកស្អាង ខេត្តកណ្តាល ។
ជនសង្ស័យចំនួន២នាក់ខាងលើ ម្នាក់ឈ្មោះ សុខ ដា ភេទប្រុស អាយុ២៨ឆ្នាំ មុខរបរកសិករ មានទីលំនៅបច្ចុប្បន្នភូមិ ខ្ពបក្រោម ឃុំខ្ពប ស្រុកស្អាង ខេត្តកណ្តាល (ធ្លាប់ជាប់ពន្ធនាគារខេត្តកណ្តាល ចំនួន២លើក ពីបទហិង្សាដោយចេតនា ចំនួន១លើក រយៈពេល៧ខែ កាលពីឆ្នាំ២០១៣ និងបទជួញដូរគ្រឿងញៀន ចំនួន១លើក រយៈពេល ២ឆ្នាំ កាលពីឆ្នាំ២០១៦ ) និងម្នាក់ទៀតឈ្មោះ ឌុល ម៉ារឌី ភេទប្រុស អាយុ១៨ឆ្នាំ ជាសិស្ស ទីលំនៅបច្ចុប្បន្នភូមិ ខ្ពបក្រោម ឃុំខ្ពប ស្រុកស្អាង ខេត្តកណ្តាល ។
វត្ថុតាងចាប់យករួមមានម្សៅក្រាមពណ៌សថ្លាសង្ស័យថាជាសារធាតុញៀន(ម៉ាទឹកកក) ចំនួន២កញ្ចប់តូច ។
លោកវរសេនីយ៍ សេង សុជាតិ អធិការនគរបាលស្រុកស្អាង បានអោយដឹងថា ក្រោយទទួលបានព័ត៍មានពីប្រជាពលរដ្ឋថា មានករណីជួញដូរគ្រឿងញៀន នៅចំណុចកើតហេតុខាងលើ ។
ភ្លាមនោះកម្លាំងផ្នែកប្រឆាំងបទល្មើសគ្រឿងញៀន សហការជាមួយ កម្លាំងប៉ុស្តិ៍នគរបាលខ្ពប បានចុះដល់ចំណុចកើតហេតុ ធ្វើការត្រួតពិនិត្យឈ្មោះ ឌុល ម៉ារឌី បានរកឃើញម្សៅក្រាមពណ៍សថ្លាសង្ស័យជាសារធាតុញៀន(ម៉ាទឹកកក)ចំនួន២កញ្ចប់តូច នៅនឹងខ្លួន រួចឃាត់ខ្លួនជនសង្ស័យ រួមនឹងវត្ថុតាង បញ្ជូនមកប៉ុស្តិ៍នគរបាលរដ្ឋបាលខ្ពប ដើម្បីសាកសួរ ។
នៅចំពោះមុខសមត្ថកិច្ច ឈ្មោះ ឌុល ម៉ារឌី បានសារភាពថា គ្រឿងញៀន(ម៉ាទឹកកក)ចំនួន២កញ្ចប់តូចនេះ ឈ្មោះ សុខ ដា ភេទប្រុស អាយុ ២៨ឆ្នាំ នៅចំណុចភូមិ ខ្ពបក្រោម ឃុំខ្ពប ស្រុកស្អាង បានអោយខ្លួន(ម៉ារឌី)យកទៅលក់អោយមនុស្សមិនស្គាល់ឈ្មោះ ចំនួន១កញ្ចប់តូច ក្នុងតម្លៃ៥០០០០រៀល ចំណែកគ្រឿងញៀន(ម៉ាទឹកកក)ចំនួន ១កញ្ចប់ទៀត ឈ្មោះ សុខ ដា អោយខ្លួន ។
បន្ទាប់មកសមត្ថកិច្ចបានបន្តទៅឃាត់ខ្លួន ឈ្មោះ សុខ ដា នៅចំណុចភូមិ ខ្ពបក្រោម ឃុំខ្ពប ស្រុកស្អាង ខេត្តកណ្តាល ។ នៅចំពោះមុខសមត្ថកិច្ចនគរបាល ឈ្មោះ សុខ ដា បានសារភាពថា ខ្លួនពិតជាបានប្រើឈ្មោះ
ឌុល ម៉ារឌី យកគ្រឿងញៀន(ម៉ាទឹកកក)ទៅលក់អោយគេពិតប្រាកដមែន ។
ចំណែកគ្រឿងញៀន(ម៉ាទឹកកក)ចំនួន២កញ្ចប់តូច ខ្លួនទិញពីឈ្មោះ លីម ភេទប្រុស អាយុ៣៥ឆ្នាំ នៅភូមិ ព្រែកតាប្រាក់ ឃុំតាលន់ ស្រុកស្អាង ខេត្តកណ្តាល ក្នុងតម្លៃ៤០០០០រៀល ដើម្បីយកទៅលក់បន្ត ក្នុង១កញ្ចប់តូច ៥០០០០រៀល ។ បច្ចុប្បន្នជនសង្ស័យទាំងពីរនាក់ត្រូវបានសមត្ថកិច្ចឃាត់ខ្លួននៅអធិការដ្ឋាននគរបាលស្រុកស្អាងដើម្បីចាត់ការតាមនីតិវីធី៕
ចែករំលែកព័តមាននេះ