ខេត្តកណ្តាល ៖ ជនសង្សយ័ម្នាក់រួមនឹងថ្នាំញៀន២២កញ្ចប់ ត្រូវបាននគរបាលក្រុងតាខ្មៅធ្វើការឃាត់ខ្លួន ខណៈដែលជនសង្សយ័កំពុងចែកចាយគ្រឿងញៀន។ ហេតុការណ៍នេះបានកើតឡើងនៅថ្ងៃច័ន្ទ ១១រោច ខែកត្តិក ឆ្នាំច សំរិទ្ធិសក័ ព.ស២៥៦២ ត្រូវថ្ងៃទី០៣ ខែធ្នូ ឆ្នាំ២០១៨ វេលាម៉ោង១០ និង៣០នាទី ចំណុចលើទំនប់ភូមិព្រែកហូរលិច សង្កាត់ព្រែកហូរ ក្រុងតាខ្មៅ ខេត្តកណ្តាល។ ជនសង្ស័យមានឈ្មោះ ឈួន វីរៈ ភេទប្រុស អាយុ២៨ឆ្នាំ មុខរបរកម្មករសំណង់ មានស្រុកកំណើត ឃុំព្រែកក្មេង ស្រុកល្វាឯម ខេត្តកណ្តាល មានទីលំនៅបច្ចុប្បន្ន ផ្ទះជួលនៅភូមិព្រែកហូរលិច សង្កាត់ព្រែកហូរ ក្រុងតាខ្មៅ ខេត្តកណ្តាល។ វត្ថុតាងដករួមមានម្សៅក្រាមពណ៌សថ្លា សង្ស័យថាសារធាតុញៀនចំនួន២២ កញ្ចប់។
លោកវរសេនីយ៍ ស កែវពិសិដ្ឋ អធិការនគរបាលក្រុងតាខ្មៅបានឲ្យដឹងថា នៅថ្ងៃខែឆ្នាំវេលាម៉ោង កើតហេតុខាងលើ កម្លាំងសមត្ថកិច្ចនៃប៉ុស្តិ៍នគរបាលរដ្ឋបាលព្រែកហូរ ដោយមានព័ត៌មានពី មហាជនល្អថា មានការចែកចាយនូវថ្នាំញៀននៅចំណុចលើទំនប់ភូមិព្រែកហូរលិច សង្កាត់ព្រែកហូរ ក្រុងតាខ្មៅ ខេត្តកណ្តាល ពេលនោះកម្លាំងសមត្ថកិច្ចក៏ចុះទៅ ហើយបានឆែកឃើញថ្នាំញៀន ចំនួន១៤កញ្ចប់ ក្នុងបន្ទប់ជួររបស់ឈ្មោះ ឈួន វីរៈ ភេទប្រុស អាយុ២៨ឆ្នាំ ហើយសមត្ថកិច្ចក៏បាន ឃាត់ខ្លួនបញ្ចូនមកអធិការដ្ឋាននគរបាលក្រុងតាខ្មៅតែម្តងដើម្បីធ្វើការសាកសួរ និងចាត់ការតាមនីតិវិធីច្បាប់។
នៅចំពោះមុខសមត្ថកិច្ចនគរបាល ជនសង្ស័យ ឈ្មោះ ឈួន វីរៈ បានសារភាពថាថ្នាំញៀនចំនួន១៤កញ្ចប់នេះមិនមែនជារបស់ខ្ញុំទេតែវាស្ថិតក្នុងផ្ទះខ្ញុំ។ រីឯថ្នាំញៀនចំនួន០៨កញ្ចប់ ទៀតគឺជារបស់ខ្ញុំដែរខ្ញុំបានរត់គេចខ្លួនកាលពីថ្ងៃទី២៩ ខែតុលា ឆ្នាំ២០១៨ វេលាម៉ោង០១ និង៣០នាទី នៅចំណុចផ្លូវបេតុងភូមិព្រែកហូរលិច សង្កាត់ព្រែកហូរ ក្រុងតាខ្មៅ ខេត្តកណ្តាល។ ចំពោះជនសង្ស័យរួមនឹងវត្ថុតាង ត្រូវបានបញ្ជូនមកអធិការដ្ឋាននគរបាល ក្រុងតាខ្មៅ ដើម្បីសាកសួរបន្ត និងកសាងសំណុំរឿងចាត់ការតាមនីតិវិធីច្បាប់៕
ចែករំលែកព័តមាននេះ