រាជធានីភ្នំពេញ ៖ ស្របពេលសង្គ្រាមពាណិជ្ជកម្មអាមេរិក-ចិនកំពុងតែក្តៅ និងកំពុងធ្វើឲ្យសេដ្ឋកិច្ចពិភពលោកថមថយល្បឿនក្តី តែអ្នកជំនាញអចលនទ្រព្យនៅកម្ពុជា បានអះអាងថា គម្រោងវិនិយោគចិននៅកម្ពុជា មិនបានរងផលប៉ះពាល់ចេញពីវិបត្តិនេះទេ ។
នាយិកាប្រចាំប្រទេសនៃក្រុមហ៊ុន CBRE Cambodia អ្នកនាង អាន សុធីតា បានឲ្យដឹងតាមទូរស័ព្ទនាពេលថ្មីៗនេះថា គម្រោងរបស់អ្នកវិនិយោគចិននៅកម្ពុជា ៅតែដំណើរការជាធម្មតា មិនមានរងផលប៉ះពាល់ណាមួយនៅឡើយ ដោយអ្នកវិនិយោគនៅតែបន្តគម្រោងរបស់ពួកគេ ប៉ុន្តែអ្វីជាការបារម្ភគឺថារដ្ឋាភិបាលចិនបានចេញគោលនយោបាយថ្មី ដោយកម្រិតលំហូរទុនវិនិយោគទៅកាន់ក្រៅប្រទេស ប៉ុន្តែវាមិនកំណត់សម្រាប់តែកម្ពុជាទេ គឺធ្វើនៅទូទាំងពិភពលោក ។
អ្នកនាងបន្តថា ៖« គម្រោងចិននៅតែដំណើរការល្អប្រសើរ ក្រុមហ៊ុនមានបញ្ហានៅតែមានបញ្ហា តែក្រុមហ៊ុនល្អនៅតែល្អ »។ អ្នកនាងបន្ថែមថា ៖« ទីផ្សារខុនដូនៅតែល្អ ដោយការលក់នៅតែជោគជ័យ ហើយគម្រោងដែលជោគជ័យ ឬអត់ គឺអាស្រ័យលើគម្រោង គុណភាព តម្លៃ និងទីតាំងរបស់វា »។
អ្នកនាងបានបន្តថា គម្រោងវិនិយោគរបស់ចិនភាគច្រើន ផ្តោតលើទីផ្សារនៅក្រៅប្រទេស ពួកគេលក់គម្រោងរបស់ពួកគេនៅទីនោះភាគច្រើន ។
ចំណែកអ្នកនាង Grace Rachny Fong នាយិកាក្រុមហ៊ុន Century21Cambodia បានឲ្យដឹងផងដែរថា គម្រោងរបស់ចិននៅកម្ពុជា នៅតែដំណើរការល្អប្រសើរ ដោយអ្នកវិនិយោគភាគច្រើនផ្តោតលើទីផ្សារក្រៅប្រទេស ជាអ្វីដែលជានិន្នាការវិនិយោគរបស់ពួកគេ ខណៈដែលប្រជាជនកម្ពុជាមិនទាន់ចង់រស់នៅតាមខុនដូនៅឡើយ ដែលធ្វើឲ្យទីផ្សារខុនដូ៨០% ទិញដោយជនបរទេស និង២០%វិនិយោគដោយជនជាតិខ្មែរ ប៉ុន្តែរយៈពេល១០ឆ្នាំខាងមុខ និន្នាការនេះនឹងដើរបញ្ច្រាសវិញ ។
អ្នកនាងបន្តថា ៖« ចិនវិនិយោគនៅកម្ពុជាពេលនេះ ជាពេលសមស្របព្រោះតម្លៃអចលនទ្រព្យ ពិសេសតម្លៃដីធ្លីមានតម្លៃទាប ដែលពួកគេអាចរកប្រាក់ចំណេញបាន ប៉ុន្តែបើពួកគេរង់ចាំយូរតទៅទៀត ការវិនិយោគរបស់ពួកគេនឹងយឺតពេល »។
ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជាលោកបណ្ឌិត គីម ហ៊ាងបានថ្លែងថា ទីផ្សារអចលវត្ថុនៅកម្ពុជា នៅតែមានសញ្ញាវិជ្ជមាន និងការវិនិយោគនៅតែបន្ត ដោយមិនទាន់មើលឃើញថាមានហានិភ័យ ឬបញ្ហាណាមួយកើតឡើងនោះទេ ពិសេសគម្រោងរបស់អ្នកវិនិយោគចិន នៅតែដំណើរការ និងមិនរងផលប៉ះពាល់ណាមួយ ពីវិបត្តិនៃសង្គ្រាមពាណិជ្ជកម្មរវាងចិន និងអាមេរិកនោះ
ឡើយ ។លោកបន្តថា ៖« ខ្ញុំនៅតែមានសុទិដ្ឋិនិយមពីទីផ្សារនេះ និងនៅតែមើលឃើញវិស័យនេះបន្តរីកចម្រើនរយៈពេលវែងបន្តទៀត »៕
ចែករំលែកព័តមាននេះ