រាជធានីភ្នំពេញ ៖ ក្រោយពីវិបត្តិសេដ្ឋកិច្ចពិភពលោកនៅឆ្នាំ២០០៨មក វិស័យសំណង់ និងអចលនទ្រព្យកម្ពុជា បានបន្តងើបឡើងរហូត ដែលគិតមកដល់ពេលនេះ វាបន្ដមានកំណើនរយៈពេលជាង១០ឆ្នាំហើយ ដែលធ្វើឲ្យសេដ្ឋវិទូអន្តរជាតិ មើលឃើញថា…
រាជធានីភ្នំពេញ ៖ ក្រោយពីវិបត្តិសេដ្ឋកិច្ចពិភពលោកនៅឆ្នាំ២០០៨មក វិស័យសំណង់ និងអចលនទ្រព្យកម្ពុជា បានបន្តងើបឡើងរហូត ដែលគិតមកដល់ពេលនេះ វាបន្ដមានកំណើនរយៈពេលជាង១០ឆ្នាំហើយ ដែលធ្វើឲ្យសេដ្ឋវិទូអន្តរជាតិ មើលឃើញថា ត្រូវមានការប្រុងប្រយ័ត្នខ្ពស់ចំពោះវដ្ដនៃវិស័យនេះ ដែលប្រឈមនឹងការធ្លាក់ចុះវិញ ។
លោក លី សូដេត សេដ្ឋវិទូជាន់ខ្ពស់នៃ ធនាគារពិភពលោកប្រចាំកម្ពុជា បានឲ្យដឹងថា នៅលើពិភពលោកនេះ គ្មានប្រទេសណាមួយដែលវិស័យសំណង់ និងអចលនទ្រព្យកើនឡើងរហូត អត់ធ្លាក់ចុះវិញនោះទេ ។ វាតែងតែមានវដ្ដរបស់វា ប៉ុន្តែក្នុងរយៈពេលណាមួយនោះ មិនអាចកំណត់បានឡើយ ដូច្នេះមានតែការប្រុងប្រយ័ត្ន កុំឲ្យវាធ្លាក់ចុះខ្លាំងប៉ុណ្ណោះទេ ដែលអាចរក្សាកំណើនសេដ្ឋកិច្ចជាតិទាំងមូលបាន ។
សេដ្ឋវិទូរូបនេះថ្លែងថា ៖« ពេលនេះ វាគម្រប់ជាង១០ឆ្នាំហើយ ដែលវិស័យអចលនទ្រព្យនៅកម្ពុជាបានងើបឡើងវិញ បន្ទាប់ពីវិបត្តិសេដ្ឋកិច្ចពិភពលោកមក ដូចនេះ វាដល់ដំណាក់កាលដែលត្រូវប្រយ័ត្ន កុំឲ្យវាធ្លាក់ចុះគំហុកខ្លាំងពេក ដែលធ្វើឲ្យប៉ះពាល់ដល់សេដ្ឋកិច្ចជាតិទាំងមូល »។
លោកបន្ត សេដ្ឋកិច្ចកម្ពុជា នាពេលបច្ចុប្បន្ន អាចរក្សាកំណើនបានល្អ ក៏ដោយសារតែមួយភាគធំបានមកពីវិស័យសំណង់និងអចលនទ្រព្យ ដូច្នេះ បើសិនជាមានបញ្ហាណាមួយ ក៏អាចធ្វើឲ្យប៉ះពាល់សេដ្ឋកិច្ចដែរ បើទោះបីជាវិស័យផ្សេងនៅរក្សាកំណើនបានល្អក៏ដោយ ។ ទោះជាយ៉ាងនេះក្ដី អ្នកវិនិយោគលើកគម្រោងសំណង់ធំៗនៅកម្ពុជា អ្នកឧកញ៉ា ពុង ឃាវសែ និងជាប្រធានសមាគមអ្នកសាងសង់កម្ពុជា នៅតែមានសុទិដ្ឋិនិយមចំពោះវិស័យសំណង់នៅកម្ពុជា ដោយលោកមើលឃើញថា វានៅតែមានសក្ដានុពលខ្ពស់សម្រាប់ទាក់ទាញវិនិយោគិនបរទេសមកវិនិយោគនៅកម្ពុជា ជាពិសេសសក្ដានុពលវិនិយោគនៅរាជធានីភ្នំពេញ។
ដោយយោងតាមរបាយការណ៍របស់ក្រសួងរៀបចំដែនដី នគរូបនីយកម្ម និងសំណង់ អ្នកឧកញ៉ា ពុង ឃាវសែ ថ្លែងថា ៖« បើពិនិត្យមើលទុនវិនិយោគវិស័យនេះក្នុងរយៈពេល១០ខែដែលមានជិត៥ពាន់លានដុល្លារ ឃើញថា មានកំណើនធ្លាក់ចុះបន្តិច តែមិនធ្លាក់ចុះខ្លាំងនោះទេ អីចឹងវាមិនមានអ្វីដែលត្រូវព្រួយបារម្ភនោះឡើយ »។ អ្នកឧកញ៉ាបញ្ជាក់ថា ៖« ជាធម្មតា ប្រេកង់នៃកំណើន វាមិនអាចថេររហូតនោះទេ វាមានឡើងមានចុះ ក៏ប៉ុន្តែគម្លាតនៃប្រេកង់នោះ មិនមានភាពខុសគ្នាឆ្ងាយណាស់ណាដែរ គឺមានគម្លាតតិចតួចប៉ុណ្ណោះ អីចឹងវានៅតែអាចទាក់ទាញ បរទេសឲ្យមកបន្ថែមទៀត ព្រោះដូចឃើញស្រាប់ហើយសំណង់អគារខ្ពស់ៗកំពុងតែរីកនៅភ្នំពេញ និងខេត្តមួយចំនួនទៀតផងដែរ »។
វិស័យសំណង់បានរួមចំណែកសំខាន់មួយក្នុងការទ្រទ្រង់កំណើនសេដ្ឋកិច្ចជាតិ បន្ទាប់ពីវិស័យឧស្សាហកម្ម កសិកម្ម និងទេសចរណ៍ ដែលធ្វើឲ្យសេដ្ឋកិច្ចជាតិទាំងមូលរក្សាបានប្រមាណ៧%ក្នុង១ឆ្នាំ ។
មន្ត្រីជាន់ខ្ពស់ក្រសួងរៀបចំដែនដី នគរូបនីយកម្ម និងសំណង់ លោក ឡៅទិព្វ សីហា រដ្ឋលេខាធិការ បានលើកឡើងថា បច្ចុប្បន្ននេះ គេឃើញថា មានប៉ូលបីសំខាន់ក្នុងការវិនិយោគវិស័យសំណង់ ក្នុងនោះរួមមានខេត្តព្រះសីហនុ ភ្នំពេញ និងខេត្តសៀមរាប ហើយក្នុងចំណោមប៉ូលទាំងបី ឃើញថា ភ្នំពេញ នៅតែមានសក្ដានុពលទូលំទូលាយជាងប៉ូលទាំងពីរទៀត ។
លោកបន្ថែមថា ការអភិវឌ្ឍវិស័យសំណង់ ក្នុងប្រទេសកម្ពុជា បានផ្ដល់ប្រយោជន៍ច្រើនដល់ព្រះរាជាណាចក្រកម្ពុជា ក្នុងនោះបានលើកមុខមាត់ការអភិវឌ្ឍប្រទេសជាតិទាំងមូល ហើយឧស្សាហកម្មសំណង់នេះដែរ បានផ្ដល់ការងារដល់ពលរដ្ឋខ្មែរជាច្រើន ។ ជាក់ស្ដែងវិស័យសំណង់បានស្រូបទាញកម្លាំងពលកម្មប្រមាណពី២០ម៉ឺន ទៅ២២ម៉ឺននាក់ក្នុង១ថ្ងៃ ដើម្បីរកប្រាក់ចំណូលសម្រាប់ចិញ្ចឹមគ្រួសារ ។
យោងតាមរបាយការណ៍ក្រសួងដែនដី ក្នុងរយៈពេល១០ខែឆ្នាំ២០១៨នេះ ទុនវិនិយោគក្នុងវិស័យសំណង់មាន៤.៩៩០លានដុល្លារអាមេរិក ធ្លាក់ចុះជាង២០% បើធៀបនឹងរយៈពេលដូចគ្នាកាលពីឆ្នាំ២០១៧កន្លងទៅមានចំនួន ៦.២៧៦លានដុល្លារអាមេរិក ៕
ចែករំលែកព័តមាននេះ