ខេត្តបាត់ដំបង ៖ អាជីវករផ្សារល្វារបានធ្វើការតវ៉ានឹងអាជ្ញាធរឃុំប្រើប្រាស់កម្លាំងនគរបាលប៉ុស្តិ៍រុះរើតូប និងរៀនលក់បន្លែត្រីសាច់ទាំងកណ្តាលយប់ ដែលការតវ៉ានេះនៅព្រឹកថ្ងៃទី០៣ ខែធ្នូ ឆ្នាំ២០១៨ នៅផ្សារល្វារ ភូមិ-ឃុំល្វារ ស្រុកបវេល ខេត្តបាត់ដំបង ។
អាជីវករបានប្រាប់ថា ផ្សារល្វារនេះគឺអាជីវករលក់ដូរតាំងពីឆ្នាំ១៩៨៨ដែលទិញពីអាជ្ញាធរធ្វើតូបលក់ដោយខ្លួនឯកក្នុងតូប១តម្លៃ៥០០០ទៅ៦០០០បាត(លុយថៃ)គឺសម័យនោះថ្លៃស្ទើតែរកលុយទិញគ្មានគឺមានតូបលក់ដូរប្រមាណជាង១០០តូបទាំងតូបបន្លែត្រីសាច់ ។ លុះដល់ពេលនេះអាជីវករចូលមកលក់ដូរប្រមាណជិត២០០តូបមានតូបលក់មាសដូរលុយ និងលក់ខោអាវប្រមាណជិត១០០តូប និងរៀនលក់បន្លែត្រីសាច់ប្រមាណជាង១០០តូប ។
អាជីវករបានបញ្ជាក់ថា នៅអំឡុងខែវិច្ឆិកា ឆ្នាំ២០១៨ នេះស្រាប់តែមានសេចក្តីជូនដំណឹងស្តីពីការរុះរើតូបដែលមានទីតាំងនៅក្នុងបរិវេណផ្សារល្វាររបស់រដ្ឋបាលឃុំល្វារបានចេញលិខិតនៅថ្ងៃទី២៦ ខែវិច្ឆិកា ឆ្នាំ២០១៨ សុំអោយអាជីវលក់ដូរក្នុងផ្សារល្វារអោយរុះរើតូបចេញទៅលក់ទីតាំងបណ្តុះអាសន្នទុកពេលរយៈពេល១០ថ្ងៃទៀតរុះរើអោយអស់ ដើម្បីគម្រោងកសាងផ្សារល្វារថ្មីលើផ្ទៃដីទទឹង២៥,៥ម៉ែត្រ បណ្តោយ៧៨,២ម៉ែត្រ អោយទៅឈ្មោះ ឈិន សេងជឿន ជាអ្នកម៉ៅការសាងសង់ផ្សារល្វារថ្មី ។
អាជីវករបានបញ្ជាក់ថា ពួកគាត់មិនបានរារាំងការអភិវឌ្ឍន៍គម្រោងកសាងផ្សារល្វារថ្មីនោះទេតែសំខាន់អាជ្ញាធរត្រូវជូនដំណឹងអោយដឹងមុនមិនតិចជាង១ខែដើម្បីរកកន្លែងលក់ដូរបណ្តុះអាសន្នហើយត្រូវជជែកតម្លៃតូបអោយបានច្បាស់លាស់ទើបអោយរុះរើ ស្រាប់តែអាជ្ញាធរឃុំអោយកម្លាំងនគរបាលប៉ុស្តិ៍ល្វារលួចមកដឹករៀនលក់បន្លែត្រីសាច់ទាំងកណ្តាលយប់ដូចចោទៅវិញ ។
លោក វិន ហួត អភិបាលស្រុកបវេលបានបញ្ជាក់ថា ជាការពិតផ្សារល្វារត្រូវបង្កើតឡើងជាង២០ឆ្នាំមកហើយដោយមានភាពអានាធិបតេយ្យ និងគ្មានសណ្តាប់ធ្នាប់ប៉ះពាល់បរិស្ថានទើបស្រុកអោយឃុំសិក្សាតើអាចមានអ្នកវិនិយោគកសាងផ្សារល្វារជាថ្មីដើម្បីអោយមានបរិស្ថានល្អនិងផាសុខភាព ។
លោកបានបញ្ជាក់ថា នៅពេលដែលរកដៃគូវិនិយោគគម្រោងកសាងផ្សារល្វារថ្មីដោយជូនដំណឹងដល់អាជីវករបានជ្រាបអោយរុះរើតូបចេញដោយខ្លួនឯង ហើយកសាងផ្សារជាថ្មីដោយរៀបចំផ្សារអោយមានស្តង់ដារមានប្រព័ន្ធលូ ប្រព័ន្ធទឹក ប្រពន្ធភ្លើង និងតូបផ្សារលក់ដូរដល់អាជីវករ និងប្រជាពលរដ្ឋទិញទំនិញក្នុងផ្សារ ។
លោក វិន ហួត បានបញ្ជាក់ថា ក្រោយពេលជូនដំណឹងដល់អាជីវករអោយរុះរើតូបគឺពិតជាមានការតវ៉ាពីអាជីវករតែអាជ្ញាធរស្រុក និងមន្ត្រីជំនាញពាក់ព័ន្ធ និងចុះប្រជុំជាមួយអាជីវកររឿងតម្លៃតូបលក់អោយបានសមរម្យដែលអាចអាជីវករទទួលយកបានលក់សម្រាប់ជីវិភាពគ្រួសារ និងរកថវិការចំណូលរដ្ឋ ៕
ចែករំលែកព័តមាននេះ