ខេត្តរតនគិរី ៖ រថយន្តហាយប្រ៊ីតមួយគ្រឿងបើកលឿនពេកជ្រុលចង្កូតទៅបុករថយន្តកូឡាមួយគ្រឿងរងការខូចខាតយ៉ាងដំណំ ហើយជ្រុលទៅបុកម៉ូតូមួយគ្រឿងទៀតកំពុងធ្វើដំណើរបញ្ច្រាសទិសគ្នា បណ្តាលឲ្យអ្នកជិះម៉ូតូ៣នាក់របួសធ្ងន់ និងស្រាល ។ ហេតុការណ៍គ្រោះថ្នាក់ចរាចរណ៍នោះបានកើតឡើង នៅវេលាម៉ោង៣និង៤៥នាទីរសៀលថ្ងៃទី២ ខែធ្នូ ឆ្នាំ២០១៨ នៅតាមបណ្តោយផ្លូវជាតិលេខ៧៨ ស្ថិតនៅក្នុងភូមិប៉ក់ធំ ឃុំប៉ក់ញ៉ៃ ស្រុកអូរយ៉ាដាវ ។
មន្ត្រីនគរបាលស្រុកអូរយ៉ាដាវបានឲ្យដឹងថា រថយន្តបង្កម៉ាក់ហាយប្រ៊ីត ពណ៌ទឹកមាស ពាក់ស្លាកលេខភ្នំពេញ 2V-9836 មានឈ្មោះ ង៉ែត សុន ភេទប្រុស អាយុ៤៥ឆ្នាំ ជនជាតិខ្មែរ មុខរបរកងរាជអាវុធហត្ថស្រុកអូរយ៉ាដាវ មានទីលំនៅបច្ចុប្បន្នភូមិសោមត្រកថ្មី ឃុំសោមធំ ស្រុកអូរយ៉ាដាវ ខេត្តរតនគិរី បើកបរក្នុងទិសដៅពីលិចទៅកើត ។ ចំណែករថយន្តរងគ្រោះម៉ាកកូរ៉ូឡា ពណ៌ទឹកមាស ពាក់ស្លាកលេខភ្នំពេញ 2F -9386 ឈ្មោះ សល់ ហ្វាន់ ភេទប្រុស អាយុ៣២ឆ្នាំ ជនជាតិច្រាយ មុខរបរមន្ត្រីនគរបាល មានទីលំនៅភូមិប៉ក់ធំ ឃុំប៉ក់ញ៉ៃ ស្រុកអូរយ៉ាដាវ រថយន្តរងការខូចខាតមួយចំហៀងខាងឆ្វេងយ៉ាងដំណំ ។
រីឯជនរងគ្រោះ៣នាក់ទៀតជិះម៉ូតូមួយគ្រឿងម៉ាក WAVE ពណ៌ខ្មៅ ពាក់ស្លាកលេខភ្នំពេញ 1AD -8640 ទិសដៅពីកើតទៅលិចបើកបរដោយឈ្មោះ សូត ពិសិដ្ឋ ភេទប្រុស អាយុ២៣ឆ្នាំ ជនជាតិខ្មែរ រស់នៅភូមិប៉ក់ធំ ឃុំប៉ក់ញ៉ៃ ស្រុកអូរយ៉ាដាវ ខេត្តរតនគិរី រងរបួសស្រាល ។ អ្នករួមដំណើរឈ្មោះ ណម ម៉េង ភេទស្រី អាយុ២៤ឆ្នាំ ជនជាតិខ្មែរ មុខរបរកសិករ មានទីលំនៅជាមួយគ្នារងរបួសធ្ងន់ ។ និងឈ្មោះ សុន ពិសាល ភេទប្រុស អាយុ៣ឆ្នាំ ជនជាតិខ្មែរ អ្នកទាំង៣នាក់ មានទីលំនៅភូមិ-ឃុំកើតហេតុខាងលើ ។
មន្ត្រីនគរបាលស្រុកអូរយ៉ាដាវបន្តថា គ្រោះថ្នាក់ចរាចរណ៍នេះ គឺរថយន្តបង្កម៉ាកហាយប្រ៊ីត បើករេចង្កូតចូលមកលើអាទិភាពរបស់រថយន្តកូឡា និងម៉ូតូទើបបណ្ដាលឲ្យមានគ្រោះថ្នាក់កើតឡើងបែបនេះតែម្តង ។
ក្រោយកើតហេតុវត្ថុតាងទាំង៣គ្រឿងត្រូវកម្លាំងជំនាញសហការជាមួយកម្លាំងប៉ុស្តិ៍រដ្ឋបាលឃុំប៉ក់ញ៉ៃរឹបអូសយកមករក្សាទុក ដើម្បីរង់ចាំធ្វើការដោះស្រាយទៅតាមនីតិវិធីច្បាប់ ៕
ចែករំលែកព័តមាននេះ