រាជធានីភ្នំពេញ ៖ បុរសម្នាក់សង្ស័យបើករថយន្តងោកមួយភាំងក៏ជ្រុលទៅបុកចំពីមុខរថយន្តបែនពេញទំហឹងតែម្តង បណ្តាលអោយរងការខូចខាតខ្ទេចរថយន្តផ្នែកខាងមុខ ចំណែកអ្នកបើករងរបួសយ៉ាងដំណំ ត្រូវបានរថយន្តគ្លីនិកឯកជនដឹកយកទៅសង្គ្រោះនៅគ្លីនិកឯកជន កាលពីវេលាម៉ោង១០និង៥០នាទីយប់ថ្ងៃទី១ ធ្នូ ឆ្នាំ២០១៨ នៅមុខ Mart Super Store នៅផ្លូវ១៩៨៦ ភូមិភ្នំពេញថ្មី សង្កាត់ភ្នំពេញថ្មី ខណ្ឌសែនសុខ ។
ប្រភពព័ត៌មានបានអោយដឹងថា មុនកើតហេតុ គេឃើញបុរសម្នាក់បើកបរថយន្តមួយគ្រឿងម៉ាកឡិចស៊ីស RX350 ពណ៌ស ពាក់ស្លាកលេខ ភ្នំពេញ ២AE-២៥៨៨ ធ្វើដំណើរលើកំណាត់ផ្លូវ១៩៨៦ ក្នុងទិសដៅ ពីកើតទៅលិច លុះមកដល់ចំណុចកើតហេតុខាងលើ សង្ស័យអ្នកបើករថយន្តងងុយដេក ស្រាប់តែរេចង្កូតទៅខាងឆ្វេងដៃបុកចំពីមុខរថយន្តបែន ពណ៌លឿងគ្មានស្លាកលេខ បើកបរក្នុងទិសដៅបញ្ច្រាសទិសគ្នាពេញទំហឹងតែម្តង បណ្តាលអោយខូចខាតខ្ទេចរថយន្តម៉ាកឡិចស៊ីស RX 350 ផ្នែកខាងមុខតែម្តង ចំណែកអ្នកបើករងរបួសយ៉ាងដំណំ ត្រូវបានរថយន្តគ្លីនិកឯកជនដឹកយកទៅសង្គ្រោះ។
ក្រោយកើតហេតុ សមត្ថកិច្ចបានចុះទៅវាស់វែង និងស្ទូចយករថយន្តទាំង២គ្រឿងទៅរក្សាទុកនៅផ្នែកជំនាញការិយាល័យនគរបាលចរាចណ៍ជើងគោក រាជធានីភ្នំពេញ រង់ចាំដោះស្រាយជាក្រោយ ៕
ចែករំលែកព័តមាននេះ