ឈ្នះតែលើរេញ តែបង្គោលក្រហមធ្លាក់ដោយស្វ័យប្រវត្តិ
- ភ្នំពេញ
រាជធានីភ្នំពេញ ៖ ការប្រកួតជ្រើសរើសជើងឯកនៅប៉ុស្ដិ៍លេខ៥ ក្នុងព្រឹត្តិការណ៍ TV5 Boxing Knock Out Series By…
រាជធានីភ្នំពេញ ៖ ការប្រកួតជ្រើសរើសជើងឯកនៅប៉ុស្ដិ៍លេខ៥ ក្នុងព្រឹត្តិការណ៍ TV5 Boxing Knock Out Series By…
រាជធានីភ្នំពេញ ៖ ការប្រកួតជ្រើសរើសជើងឯកនៅប៉ុស្ដិ៍លេខ៥ ក្នុងព្រឹត្តិការណ៍ TV5 Boxing Knock Out Series By K-Cement ក្នុងវគ្គ៣២នាក់ ជម្រុះយក១៦នាក់ កាលពីថ្ងៃទី១ ធ្នូ កីឡាករបង្គោលក្រហម គុជសារ ចាន់រាជ បានទទួលជ័យជម្នះយ៉ាងត្រចះត្រចង់ក្រោយការចំណាយកម្លាំងវាយលប់លើគូប្រកួត ដែលការប្រកួតនេះ គឺដើម្បីដណ្ដើមយកឱកាសទៅប្រកួតបន្តក្នុងវគ្គ១៦នាក់។ ប៉ុន្តែនៅពីក្រោយជ័យជម្នះដែលគេបានឃើញនោះ កីឡាករ គុជសារ ចាន់រាជ ត្រូវគេកំណត់អោយធ្លាក់ការប្រកួតទៅវិញទេ បើទោះជាក្នុងពេលប្រកួតនោះ គឺគេបានឈ្នះ។
លោក សេង កដិកា អ្នករៀបចំការប្រកួតបានថ្លែងបញ្ជាក់ថា កីឡាករបង្គោលក្រហម គុជសារ ចាន់រាជ មិនត្រូវបានគណៈកម្មការអនុញ្ញាតិអោយឡើងប្រកួតបន្តនោះទេ ដ្បិតតែគេបានប្រកួតឈ្នះបង្គោលខៀវ រឿន សុខលី នៅក្នុងវគ្គជម្រុះដ៏ស្វិតស្វាញនោះ។ ហេតុផលដែលគេប្រកួតឈ្នះ តែបែរជាបាត់ឱកាសឡើងទៅប្រកួតបន្ត គឺដោយសារតែគេបណ្ដោយអោយលើសគីឡូផ្ទុយពីលក្ខន្តិកៈដែលបានកំណត់ឡើង។ លោកថា បើលើសត្រឹមតែប្រាំ ឬប្រាំមួយខាំ នោះគណៈកម្មការអាចយោគយល់បាន ប៉ុន្តែបើលើសដល់ទៅ២គីឡូ នោះអ្នកល្មើសនឹងត្រូវកំណត់អោយចាញ់ការប្រកួតដោយស្វ័យប្រវត្តិ។
យ៉ាងណាមិញ លោកថា សម្រាប់ការប្រកួតដើម្បីបំពេញកិច្ចសម្រាប់ម៉ោងផ្សាយបន្តផ្ទាល់នៅលើកញ្ចក់ទូរទស្សន៍ប៉ុស្ដិ៍លេខ៥ គឺត្រូវតែដំណើរការប្រកួតឈ្នះចាញ់ធម្មតា ដើម្បីកំណត់យកអ្នកឈ្នះអោយទទួលបានតម្លៃខ្លួនខ្ពស់ជាង។
លោកនិយាយថា មុនប្រកួត កីឡាករបង្គោលក្រហម គុជសា ចាន់រាជ ត្រូវបានកំណត់អោយចុះហត្ថលេខារួចហើយថា ទោះជាឈ្នះក៏ត្រូវតែអោយធ្លាក់ដោយស្វ័យប្រវត្តិ ដោយសារតែគេបណ្ដោយអោយលើសទម្ងន់ដល់ទៅជិត២គីឡូ ដែលផ្ទុយពីការកំណត់របស់គណៈកម្មការសម្រាប់ការប្រកួតជ្រើសរើសជើងមួយនេះ។
លោកនិយាយថា«សម្រាប់ការប្រកួត គឺយើងនៅតែដំណើរការអ្នកឈ្នះ និងអ្នកចាញ់ជាធម្មតា ប៉ុន្តែក្រោយការប្រកួតចប់ គឺទោះជាលទ្ធផលយ៉ាងមិច ក៏កីឡាករម្ខាងទៀត ដែលគេរក្សាទម្ងន់បានល្អ ត្រូវតែបានឡើងទៅកាន់វគ្គបន្ត!»។
កីឡាករ គុជសា ចាន់រាជ បានបង្ហាញអារម្មណ៍ខកចិត្តដែលគេបណ្ដោយអោយលើសគីឡូមុនថ្ងៃប្រកួតជ្រើសរើសកៅអី១៦នាក់ ដែលលោកយល់ថា គឺជាការបាត់ឱកាសធំមួយ ក្នុងពេលដែលលោកត្រូវបានកំណត់អោយចូលប្រកួតក្នុងព្រឹត្តិការណ៍នេះយ៉ាងលំបាក ប៉ុន្តែបែរជាធ្វើអោយភ្លាត់ផ្ទុយពីលក្ខខណ្ឌ។
យ៉ាងណាមិញ លោកថា ខ្លួនក៏នៅតែបានរក្សាទឹកដៃរបស់ខ្លួន ដោយបានបញ្ចេញថ្វីដៃ ហើយវាយបំបាក់គូប្រកួតអោយចាញ់ដោយពិន្ទុ ធ្វើអោយលោកអស់ចិត្តផងដែរ៕
ចែករំលែកព័តមាននេះ