រាជធានីភ្នំពេញ ៖ បុរសម្នាក់បើកបររថយន្តកុងតឺន័រខ្វះការប្រុងប្រយ័ត្នបើកបញ្ច្រាសទិសចរាចរណ៍ទៅបុករថយន្តមួយគ្រឿងមានដឹកត្រី បណ្តាលឱ្យរងរបួសស្ត្រីម្នាក់ ចំណែកឯរថយន្តដឹកត្រីបានរងការខូចខាតយ៉ាងធ្ងន់ធ្ងរ ។
ហេតុការណ៍នេះបង្កអោយមានការភ្ញាក់ផ្អើលកាលពីវេលាម៉ោង១រំលងអាធ្រាត្រឈានចូលថ្ងៃទី៣០ ខែវិច្ឆិកា ឆ្នាំ២០១៨ តាមបណ្ដោយផ្លូវជាតិលេខ៣ ទល់មុខអគ្គបញ្ជាការដ្ឋានកងកំលាំងវិស្វកម្ម ដែលស្ថិតនៅសង្កាត់ចោមចៅទី៣ ខណ្ឌពោធិ៍សែនជ័យ។
រថយន្តកុងតឺន័រ ពណ៌ខ្មៅលាយលឿង ពាក់ស្លាកលេខ ភ្នំពេញ ៣B-៩៤៣៣ បើកបរក្នុងទិសដៅពីជើងទៅត្បូងបញ្ច្រាសទិសដៅចរាចរណ៍ ។ ចំណែករថយន្តមួយគ្រឿងទៀត ម៉ាកកៀ ពណ៌ស ពាក់ស្លាកលេខ ព្រះសីហនុ ២A-៧៧៤៣ បើកដោយបុរសម្នាក់ និងស្ត្រី២នាក់ជាអ្នករួមដំណើរ ។
តាមប្រភពព័ត៌មានពីកន្លែងកើតហេតុបាននិយាយប្រាប់ថា នៅមុនពេលកើតហេតុ គេឃើញរថយន្ត ម៉ាកកៀជារថយន្តដឹកត្រី បើកបរក្នុងទិសដៅពីត្បូងទៅជើងក្នុងល្បឿនយ៉ាងលឿន លុះបើកមកដល់ចំណុចកើតហេតុស្រាប់តែមានរថយន្តកុងតឺន័រមួយគ្រឿងបើកចេញពីរង្វង់មូលចោមចៅក្នុងទិសដៅពីជើងទៅត្បូងបានបួងចង្កូតទៅផ្នែកខាងឆ្វេងបញ្ច្រាសចរាចរណ៍។
ហើយស្របពេលរថយន្តដឹកត្រីបើកលឿនជាន់ហ្វ្រាំងមិនទាន់ផងនោះ បានជ្រុលទៅបុករះ បណ្តាលអោយរថយន្តដឹកត្រីរងការខូចខាតមួយចំហៀងខាងស្តាំ និងបណ្តាលអោយស្ត្រីម្នាក់រងរបួសធ្ងន់ ចំណែករថយន្តកុងតឺន័ររងការខូចខាតតិចតួច។
តាមប្រភពព័ត៌មានបានបន្តទៀតថា ពេលគ្រោះថ្នាក់ភ្លាមៗស្ត្រីរងគ្រោះខាងលើត្រូវបានរថយន្តសង្គ្រោះគ្លីនិកឯកជនដឹកយកទៅព្យាបាលភ្លាមៗផងដែរ ។ បន្ទាប់មកកំលាំងនគរបាលប៉ុស្តិ៍បានមកដល់កន្លែងកើតហេតុនិងបានរាយការណ៍ទៅជំនាញផ្នែកសណ្តាប់ធ្នាប់ចរាចរណ៍ខណ្ឌពោធិ៍សែនជ័យភ្លាមៗផងដែរ។
ក្រោយពេលកើតហេតុរថយន្តទាំង២គ្រឿងត្រូវបានជំនាញចរាចរណ៍ខណ្ឌពោធិ៍សែនជ័យបានវាស់វែង និងយករថយន្តយកទៅរក្សាទុករង់ចាំការដោះស្រាយថ្ងៃក្រោយ ៕
ចែករំលែកព័តមាននេះ