ខេត្តកណ្តាល ៖ ចោរមួយក្រុម ដែលមានគ្នាពីបួនទៅប្រាំនាក់បានធ្វើសកម្មភាពលួចគាស់ចូលក្នុងរោងចក្រផលិតកាបូបទាំងកណ្តាលយប់ និងធ្វើសកម្មភាពរុះរើកកាយវាយទំលាយការិយាល័យគណនេយ្យ និងរដ្ឋបាលលួចយកកុំព្យូទ័រ លុយកាក់និងសម្ភារមួយចំនួនទៀត ដោយប្រើរយៈពេលអស់ជាច្រើនម៉ោង និងចេញទៅវិញដោយសុវត្ថិភាព មិនរំខានដល់ក្រុមសន្តិសុខ…
ខេត្តកណ្តាល ៖ ចោរមួយក្រុម ដែលមានគ្នាពីបួនទៅប្រាំនាក់បានធ្វើសកម្មភាពលួចគាស់ចូលក្នុងរោងចក្រផលិតកាបូបទាំងកណ្តាលយប់ និងធ្វើសកម្មភាពរុះរើកកាយវាយទំលាយការិយាល័យគណនេយ្យ និងរដ្ឋបាលលួចយកកុំព្យូទ័រ លុយកាក់និងសម្ភារមួយចំនួនទៀត ដោយប្រើរយៈពេលអស់ជាច្រើនម៉ោង និងចេញទៅវិញដោយសុវត្ថិភាព មិនរំខានដល់ក្រុមសន្តិសុខ និងសមត្ថកិច្ចមូលដ្ឋានឡើយ ដែលជាហេតុធ្វើឲ្យមជ្ឈដ្ឋានជាច្រើនមានការភ្ញាក់ផ្អើល ព្រោះមិនធ្លាប់មានក្រុមចោរណាហ៊ានចូលលួចក្នុងរោងចក្រកក្រើកបែបនេះទេ ។
ហេតុការណ៍គួរឲ្យភ្ញាក់ផ្អើលនោះ បានកើតឡើងនៅយប់ថ្ងៃទី២៧ វិច្ឆិកា នៅក្នុងរោងចក្រ FMF MANUFACTURING CO LTD ផលិតកាបូបដែលមានកម្មករ កម្មការិនីជិត១០០០នាក់ស្ថិតនៅភូមិព្រែកហូរ សង្កាត់ព្រែកហូរ ក្រុងតាខ្មៅ ។
ប្រភពព័ត៌មានបានឲ្យដឹង នៅព្រឹកថ្ងៃទី២៨ វិច្ឆិកា ថា ពេលក្រុមកម្មករ និងកម្មការិនីចូលធ្វើការនៅក្នុងរោងចក្រដូចសព្វដង ក៏បានប្រទះឃើញជញ្ជាំងរោងចក្រហើបមានប្រហោងខុសពីធម្មតា ក៏មានការសង្ស័យទើបនាំគ្នាប្រាប់ខាងរដ្ឋបាលរោងចក្រ ទើបបង្កការឆោឡោ និងបានបើកកាមេរ៉ាសុវត្ថិភាពមើលឃើញក្រុមចោរ លួចគាស់ជញ្ជាំងរោងចក្រពីក្រោយ រួចធ្វើសកម្មភាពរើកកាយ វាយទម្លុះយកកុំព្យូទ័រ លុយកាក់ និងសម្ភារមួយចំនួនទៀត ដែលសកម្មភាពរបស់ចោរនេះមានរយៈច្រើនម៉ោងនិងចេញទៅវិញដោយសុវត្ថិភាព ។
ក្រោយមានការឆោឡោពីក្រុមចោរគាស់ជញ្ជាំងរោងចក្រចូលលួចដែលមិនធ្លាប់មាននេះ កម្លាំងជំនាញព្រហ្មទណ្ឌកំរិតធ្ងន់ សហការជាមួយកម្លាំងជំនាញព្រហ្មទណ្ឌកំរិតស្រាល នៃស្នងការដ្ឋាននគរបាលខេត្ត កម្លាំងអធិការដ្ឋានក្រុងតាខ្មៅ សហការគ្នាចុះមកពិនិត្យដោយយកចិត្តទុកដាក់ ព្រមទាំងអះអាងថានឹងស្រាវជ្រាវតាមចាប់ក្រុមចោរ តាមភិនភាគក្នុងឃ្លីបវីដេអូដែលថតជាប់សកម្មភាពតាមកាមេរ៉ាសុវត្ថិភាព ។
ទោះជាបែបនេះក្តី វីដេអូដែលថតបាន គឺពួកចោរឃើញពាក់មា៉ស់បិទមុខទាំងអស់ ដែលទំនងខ្លាចគេស្គាល់មុខឬក៏ជាដង្កូវចេញពីសាច់ ក៏អាចថាបាន ព្រោះសំដៅកន្លែងទុកលុយ ។
ជាមួយនឹងការភ្ញាក់ផ្អើលពីក្រុមចោរលួចគាស់រោងចក្រ ដែលមានភូមិសាស្ត្រនៅក្នុងសង្កាត់ព្រែកហូរ សុំមិនឲ្យបញ្ចេញឈ្មោះបានរៀបរាប់ថា នៅក្នុងសង្កាត់ព្រែកហូរសព្វថ្ងៃបញ្ហាអសន្តិសុខមានការកើនឡើងខ្លាំងដូចជា រឿងគ្រឿងញៀន រឿងល្បែងកន្ទុយលេខ រឿងបញ្ជល់មាន់ ហាក់មានការកើនឡើងដោយមិនឃើញវត្តមានសមត្ថកិច្ចបង្ក្រាបម្តងណាឡើយ ខណៈដែលលោកមេប៉ុស្តិ៍ រវល់តែរកសុីជីកដី ដឹកដីផ្ទាល់ខ្លួនទៅវិញ មិនខ្វល់ពីបញ្ហាភូមិឃុំ មានសុវត្ថិភាពឡើយ ។ រហូតដល់វេលាល្ងាចថ្ងៃដដែលទាក់ទិននិងការលួចគាស់រោងចក្រនេះ មិនមានព័ត៌មានបន្ថែមថ្មីឡើយ ៕
ចែករំលែកព័តមាននេះ