រាជធានីភ្នំពេញ ៖ មន្ត្រីជាន់ខ្ពស់ក្រសួងសេដ្ឋកិច្ច និងហិរញ្ញវត្ថុបានថ្លែងថា កម្ពុជាចាំបាច់ត្រូវមានប្រព័ន្ធដឹកជញ្ជូនមួយដែលប្រសើរជាងមុន មានតម្លៃថោកជាងមុន និងមានប្រសិទ្ធភាពជាងមុន ទាំងតាមបណ្តាញដឹកជញ្ជូនផ្លូវគោក ផ្លូវទឹក ផ្លូវអាកាស និងផ្លូវដែក ដើម្បីបង្កើនសមត្ថភាពនាំចេញ ជំរុញការធ្វើពិពិធកម្មសេដ្ឋកិច្ច និងការទាក់ទាញវិនិយោគ នៅគ្រប់សកម្មភាពធុរកិច្ចគ្រប់ប្រភេទ ។
រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ លោក វង្សី វិស្សុត បានថ្លែងក្នុងកិច្ចប្រជុំស្តីពីការរៀបចំផែនការមេ ស្ដីពី ប្រព័ន្ធដឹកជញ្ជូននៅកម្ពុជា នៅទីស្តីការក្រសួង កាលពីថ្ងៃទី២៨ ខែវិច្ឆិកា កន្លងមកថា ការរៀបចំផែនការមេស្តីពីប្រព័ន្ធដឹកជញ្ជូននេះ គឺជាការគិតគូរស្របតាមគោលនយោបាយរបស់រាជរដ្ឋាភិបាល ពិសេសយុទ្ធសាស្ត្រចតុកោណដំណាក់កាលទី៤ ដើម្បីសម្រេចឱ្យបាននូវប្រព័ន្ធដឹកជញ្ជូនមួយ ដែលមានភាពប្រទាក់ក្រឡា និងមានភាពប្រកួតប្រជែងខ្ពស់ ធៀបជាមួយប្រទេសជិតខាង ដើម្បីគាំទ្រដល់ការអភិវឌ្ឍសេដ្ឋកិច្ចរយៈពេលវែង ការតភ្ជាប់ប៉ូលសេដ្ឋកិច្ចសំខាន់ៗនៅក្នុងប្រទេស និងការបង្កើនល្បឿនសមាហរណកម្មសេដ្ឋកិច្ច ទៅក្នុងតំបន់ និងពិភពលោក ។
លោកបន្តថា ៖« សម្រាប់ទស្សនវិស័យទៅថ្ងៃមុខ កម្ពុជាត្រូវភ្ជាប់ខ្លួនទៅនឹងបណ្តាញផលិតកម្មអន្តរជាតិ តាមរយៈការប្រើប្រាស់ជារបៀងដឹកជញ្ជូនផ្នែកខាងកើតប្រទេស ភ្ជាប់ពីភ្នំពេញទៅវៀតណាម និងច្រករបៀងដឹកជញ្ជូនខាងលិចភ្ជាប់ពីភ្នំពេញ ទៅប្រទេសថៃ ដោយសារប្រទេសទាំងពីរនេះ នឹងក្លាយទៅជាមូលដ្ឋានផលិតកម្មដ៏ធំនៅក្នុងតំបន់ »។
លោករដ្ឋលេខាធិការបន្ថែមថា ទន្ទឹមនេះកម្ពុជាក៏ត្រូវប្រើប្រាស់ច្រកកំពង់ផែទឹកជ្រៅព្រះសីហនុ ដើម្បីនាំចេញផលិតផលសម្រេចទៅកាន់ទីផ្សារអន្តរជាតិផងដែរ ដូច្នេះកម្ពុជាចាំបាច់ត្រូវមានប្រព័ន្ធដឹកជញ្ជូនមួយដែលប្រសើរ មានថ្លៃថោកជាងមុន និងមានប្រសិទ្ធភាពជាងមុន ។
លោកសង្កត់ធ្ងន់ថា ៖« ដើម្បីជំរុញឲ្យមានប្រសិទ្ធភាព ការសិក្សានេះគួរតែពិនិត្យមើលលើគ្រប់ផ្នែក ដោយការតភ្ជាប់មិនត្រឹមតែការភ្ជាប់ផ្នែករឹងប៉ុណ្ណោះទេ ប៉ុន្តែផ្នែកទន់ ដែលរួមមានផ្នែកស្ថាប័ន ការគ្រប់គ្រង ក៏ដូចជាហិរញ្ញប្បទានវិនិយោគជាដើម ដែលអាចរកបានតាមរយៈថវិកាជាតិ ការខ្ចី ការវិនិយោគពីវិស័យឯកជន ក៏ដូចជាការវិនិយោគរួមគ្នា រវាងវិស័យសាធារណៈ និងឯកជន (PPP) »។
កន្លងមក ភាគីកម្ពុជា និងភាគីចិន បានចុះហត្ថលេខាលើកិច្ចព្រមព្រៀងហិរញ្ញប្បទានឥតសំណងសម្រាប់រៀបចំគម្រោងផែនការមេ លើប្រព័ន្ធដឹកជញ្ជូននៅកម្ពុជា ចាប់តាំងពីថ្ងៃទី១៩ ខែមិថុនា ឆ្នាំ២០១៨ ក្នុងនោះគណៈប្រតិភូចិន ដែលរួមមានអ្នកជំនាញការចំនួន៦៣រូប ដែលបែងចែកជា៦ក្រុម ដើម្បីសិក្សានិងជំរុញការអភិវឌ្ឍហេដ្ឋារចនាសម្ព័ន្ធផ្លូវគោក ផ្លូវទឹក និងផ្លូវអាកាស ។
លោកបណ្ឌិត ម៉ី កល្យាណ ប្រធានក្រុមប្រឹក្សាភិបាលវិទ្យាស្ថានសិក្សាការអភិវឌ្ឍបានថ្លែងថា ហេដ្ឋារចនាសម្ព័ន្ធជាបញ្ហាប្រឈម ក្នុងវិស័យសេដ្ឋកិច្ចកម្ពុជាជាយូរមកហើយ ដែលតម្លៃនៃការដឹកជញ្ជូនរបស់កម្ពុជាមានតម្លៃខ្ពស់បំផុត បើធៀបជាមួយបណ្តាប្រទេសក្នុងតំបន់ ប៉ុន្តែឆ្លើយតបបញ្ហានេះ រាជរដ្ឋាភិបាលបាននិងកំពុងគិតគូរ និងវិនិយោគលើវិស័យនេះ ប៉ុន្តែការអភិវឌ្ឍហេដ្ឋារចនាសម្ព័ន្ធគឺត្រូវការពេលវេលា ។ ហេតុនេះការពន្លឿនការវិនិយោគលើវិស័យនេះគឺជារឿងចាំបាច់ ។
លោកបន្តថា ៖« ដើម្បីពន្លឿន និងជំរុញកំណើនសេដ្ឋកិច្ច កម្ពុជាត្រូវការវិនិយោគលើហេដ្ឋារចនាសម្ព័ន្ធ ព្រោះបើមិនវិនិយោគលើវិស័យនេះទេ សេដ្ឋកិច្ចរបស់យើងនឹងនៅតែប៉ុណ្ណឹង »៕
ចែករំលែកព័តមាននេះ