រាជធានីភ្នំពេញ ៖ បុរស២នាក់ស្រវឹងស្រាបើកម៉ូតូហុងដាឌ្រីមជែងរថយន្តធុនធំមួយគ្រឿង ជ្រុលធ្លាក់ចូលជង្ហុកបណ្តាលឲ្យដួលស្លាប់ម្នាក់ និងរបួសធ្ងន់ម្នាក់ ហេតុការណ៍នេះបានកើតឡើង កាលពីវេលាម៉ោង៨ និង៥០នាទីយប់ ថ្ងៃទី២៨ ខែវិច្ឆិកា ឆ្នាំ២០១៨ តាមបណ្តោយផ្លូវហ្គ្រេនភ្នំពេញ នៅចំណុចមាត់ច្រកចូលហ្គ្រេនភ្នំពេញ ស្ថិតនៅក្នុងក្រុម៤ ភូមិ៤ សង្កាត់ច្រាំងចំរេះ១ ខណ្ឌឫស្សីកែវ។ ជនរងគ្រោះដែលស្លាប់មានឈ្មោះ ជា សុភ័ក្រត្រា ហៅក្រៅសៅ ភេទប្រុស អាយុ២៥ឆ្នាំ មុខរបរធ្វើការរោងចក្រ ស្នាក់នៅម្តុំភ្នំប្រសិទ្ធ មានស្រុកកំណើតនៅភូមិព្រែកសំរោង ឃុំទួលប្រិត ស្រុកអង្គស្នួល ខេត្តកណ្តាល។
សាក្សីដែលឃើញហេតុការណ៍បានឲ្យដឹងថា មុនពេលកើតហេតុ គេបានឃើញបុរស២នាក់ជិះម៉ូតូមួយគ្រឿងម៉ាកហុងដាឌ្រីម ពណ៌ខ្មៅ ស៊េរី២០០៨ បើកបរតាមបណ្តោយ ផ្លូវហ្គ្រេនភ្នំពេញ ក្នុងទិសដៅពីលិចទៅកើត ខណៈពេលបើកមកដល់ចំណុចកើតហេតុខាងលើ ម៉ូតូរងគ្រោះបើកជែងរថយន្តធុនធំមិនស្គាល់ម៉ាកទើបជ្រុលធ្លាក់ចូលក្នុងជង្ហុកបណ្តាលឲ្យជនរងគ្រោះម្នាក់ឈ្មោះ សៅ ដួល បោកក្បាលស្លាប់នៅនឹងកន្លែងកើតហេតុ រីឯម្នាក់ទៀតរងរបួសធ្ងន់ ចំណែកឯម៉ូតូវិញ អត់មានខូចខាតអីនោះទេ រីឯរថយន្តបើកចេញទៅបាត់ស្រមោល។
បើតាមសម្ដីរៀបរាប់របស់អ្នករងរបួស ធ្ងន់បានឲ្យដឹងថា មុនពេលកើតហេតុគាត់ជាមួយជនរងគ្រោះបានផឹកស៊ីជាមួយគ្នា តាំងពីម៉ោង៤ជិត ៥ល្ងាចផឹកអស់ស្រាថ្នាំ៤ទៅ៥លីត្រ រួចហើយគោលបំណងឌុបគ្នាទៅផ្ទះនៅឯភ្នំប្រសិទ្ធហើយក៏ជួប គ្រោះថ្នាក់បែបនេះតែម្តង។ ក្រោយពេលកើតហេតុសពជនរងគ្រោះត្រូវបានក្រុមគ្រួសារ ដឹកយកទៅតម្កល់នៅឯវត្តឃ្មួញ ដើម្បីធ្វើបុណ្យទៅតាមប្រពៃណី៕
ចែករំលែកព័តមាននេះ