រាជធានីភ្នំពេញ ៖ កីឡាករ សុខ ធី បានធ្វើឱ្យអ្នកស្នេហាវិស័យកីឡាប្រដាល់មានការ ចាប់អារម្មណ៍យ៉ាងខ្លាំង តាមរយៈការប្រកួតដណ្ដើមខ្សែក្រវាត់នៅសង្វៀនទូរទស្សន៍ប៉ុស្តិ៍បាយ័នកាលពីប៉ុន្មានខែមុន ហើយបានយកឈ្នះកីឡាករ ឡុង ជិន ក្លាយជាម្ចាស់ខ្សែក្រវាត់ជាលើកដំបូង ។ ប៉ុន្តែទោះជាយ៉ាងនេះក្ដី ក៏មានមនុស្សតិចណាស់ដែលដឹងថា អ្នកប្រដាល់វ័យក្មេងមកពីក្លិបសានសៅយ៉ាន់នាគាខេត្តបន្ទាយមានជ័យរូបនេះ មានប្រវត្តិប្រកួតអស្ចារ្យបែបណា ។
ទើបតែមានវ័យ១៩ឆ្នាំសោះកីឡាករ សុខ ធី ហៅកាកា ធ្លាប់ប្រមូលផ្តុំបទពិសោធលើសង្វៀនប្រដាល់សេរី ឈ្នះ២២១ដង ចាញ់៣៦ដង បើប្រៀបជាមួយកីឡាករដទៃ អាចនិយាយបានថា រូបគេជាជើងខ្លាំងមានបទពិសោធច្រើនម្នាក់ ។ ជួបអ្នកសារព័ត៌មានកោះសន្តិភាពកាលពីពេលថ្មីៗនេះកីឡាករសុខ ធី ដែលទើបទូរទស្សន៍ស៊ីអិនស៊ីប្រកាសដកបេក្ខភាពចេញពីការប្រកួតជើងឯកអន្តរជាតិISK Palmបន្ទាប់ពីមានរឿងចម្រូងចម្រាសជាមួយចៅក្រមពាក់ព័ន្ធនឹងការផ្ដល់ពិន្ទុឱ្យចាញ់កីឡាករថៃឱ្យដឹងថា លោកស្រឡាញ់វិស័យកីឡាប្រដាល់នេះតាំងពីតូចមកម្ល៉េះ ម្យ៉ាងដោយសារតែគ្រួសារក្រីក្រខ្លាំងពេកនៅពេលធំដឹងក្ដីកាលណាមិនបានចូលសាលារៀនដូចក្មេងដទៃទៀតឡើយ ។ កាលនៅក្មេងរូបគេត្រូវបានក្មេងៗដទៃក្នុងភូមិសម្លុតគំរាមធ្វើឲ្យរូបគេមិនសប្បាយចិត្តនឹងខ្លួនឯងទេ ។
ឪពុករបស់គេវិញជាអ្នកស្រឡាញ់វិស័យកីឡាគុនខ្មែរខ្លាំង ដូច្នេះគាត់ក៏ណែនាំឲ្យ សុខ ធី ដែលទើបមានអាយុ៨ឆ្នាំ និងបងប្រុស ហាត់រៀនក្បាច់គុននៅប្រទេសថៃ ដែលក្បាច់គុននេះហើយដែលជួយឲ្យសុខ ធី មានទាំងកម្លាំង និងទំនុកចិត្តលើខ្លួនឯង ។
កីឡាករដែលទើបមានវ័យ១៩ឆ្នាំរូបនេះបានឱ្យដឹងទៀតថា លោកចូលហាត់ប្រដាល់ដំបូងមិនមែនហាត់នៅស្រុកខ្មែរនោះទេ គឺបានទៅហាត់នៅស្រុកថៃ ព្រោះអីឪពុករបស់លោកជាកម្មករចេញចូលទៅធ្វើសំណង់នៅស្រុកថៃ ទើបមានឱកាសបានចូលហាត់ក្នុងក្លិបមួយនៅស្រុកថៃចាប់តាំងពីពេលនោះមក។
ដោយសារតែលោកមានទេពកោសល្យពីធម្មជាតិស្រាប់ ហាត់បានតែប៉ុន្មានខែក៏ត្រូវបានគេរៀបចំឱ្យឡើងប្រកួតក្នុងនាមជាគូបើកឆាក។
សម្រាប់ការឡើងសង្វៀនប៉ុន្មានលើកដំបូងធ្វើឱ្យទស្សនិកជនចាប់អារម្មណ៍យ៉ាងខ្លាំងតាមរយៈ ការវាយផ្ដួលគូប្រកួតឱ្យសន្លប់ជាបន្តបន្ទាប់។ប៉ុន្មានឆ្នាំក្រោយមក លោកកាន់តែមានឈ្មោះល្បីខ្លាំង ហើយត្រូវបានអ្នកគ្រប់គ្រងក្លិបជំរុញឱ្យលោកឡើងប្រកួតជាញឹកញាប់រហូតស្ទើរតែគ្មានថ្ងៃសម្រាកក៏មានដែរ គឺពេញមួយអាទិត្យតែម្ដង ។ ប្រឈមនឹងបញ្ហានេះធ្វើឱ្យឪពុកម្ដាយរបស់លោកមានការព្រួយបារម្ភពីសុខភាពលោកយ៉ាងខ្លាំង ។ ម្យ៉ាងវិញទៀត ដោយសារតែការប្រកួតរបស់លោកចេះតែល្អឡើងៗលោកត្រូវបានគេរៀបចំឱ្យប្រកួតក្នុងឋានៈជាគូឯកក្នុងប្រភេទទម្ងន់៤៨គីឡូក្រាម។ ទោះបីជាយ៉ាងនេះក្ដីលោកមិនត្រូវបានគេចាត់ទុកជាកីឡាករកម្រិតខ្ពស់នោះទេ គឺត្រឹមតែកម្រិតទី៣ឬទី៤នៅស្រុកថៃប៉ុណ្ណោះ។
កីឡាករក្មេងតែបទពិសោធពេញខ្លួនរូបនេះបន្តថា ដោយសារតែមានការនឿយហត់នឹងការប្រកួតច្រើនពេក នៅឆ្នាំ២០១៣លោកបានវិលត្រឡប់មកផ្ទះនៅខេត្តបន្ទាយមានជ័យវិញ ហើយបានចូលហ្វឹកហាត់នៅក្លិបសាន សៅយ៉ាន់នាគា ដែលមានលោកសាន សៅយ៉ាន់ ជាគ្រូបង្វឹក ស្ថិតនៅភូមិអូរប្រាសាទ ឃុំអូរប្រាសាទ ស្រុកមង្គលបូរី ខេត្តបន្ទាយមានជ័យ ។ ហ្វឹកហាត់ទីនោះមិនបានប៉ុន្មានឆ្នាំ លោកក៏មានឱកាសឡើងមកប្រកួតនៅសង្វៀនទីក្រុងភ្នំពេញញឹកញាប់ ។
សុខ ធី ក៏បានបញ្ជាក់ផងដែរថា តាំងពីឈានជើងឡើងសង្វៀនរហូតមកដល់ពេលនេះលោកប្រកួតបានជាង២០០ដងហើយដោយសារកាលនៅស្រុកថៃជិត១០ឆ្នាំលោកឡើងប្រកួតញឹកញាប់ពេក ។ ប៉ុន្តែពេលមកប្រកួតនៅសង្វៀនភ្នំពេញលោកប្រាប់គេថាបានត្រឹមតែជាង៨០ដងប៉ុណ្ណោះ។
សុខ ធី មិនត្រឹមតែជាកីឡាករជើងឯកគុនខ្មែរប្រចាំប្រទេសប៉ុណ្ណោះទេ ប៉ុន្តែរូបគេជាកីឡាករកម្រិតពិភពលោក ។ រូបគេបានបង្ហាញសមត្ថភាពពិតៗ នៅពេលចូលប្រកួតទល់នឹងជើងខ្លាំងរបស់ថៃ ។ លើសពីនេះឱកាសបានវ៉ៃជាមួយ ឡឹតសីលា ជើងឯករបស់ថៃក្នុងកម្មវិធី ONE Super Series នៅប្រទេសឥណ្ឌូណេស៊ី កាន់តែបង្ហាញថា សមត្ថភាពរបស់ សុខ ធី ពិតជាខ្លាំងមិនធម្មតាទេ។
ដោយសារក្បាច់គុនរបស់គេកាន់តែរីកចម្រើនទៅៗ មានមនុស្សជាច្រើនជឿថា សុខ ធី នឹងក្លាយជាកីឡាករខ្មែរដំបូងដែលអាចឡើងប្រកួតដណ្ដើមខ្សែក្រវាត់ពិភពលោកបាន ប្រសិនបើរូបគេមានឱកាសនាពេលខាងមុខ ៕
ចែករំលែកព័តមាននេះ