រាជធានីភ្នំពេញ ៖ ប្រធានសមាគមរោងចក្រកាត់ដេរកម្ពុជាបានលើកឡើងថា វិស័យកាត់ដេរកម្ពុជា ត្រូវតែចាប់យកបច្ចេកវិទ្យាមកបម្រើឲ្យសង្វាក់ផលិតកម្មរបស់ខ្លួន ប្រសិនបើរោងចក្រកាត់ដេរណាមួយមិនប្រើ ប្រាស់បច្ចេកវិទ្យាទំនើបទេ គឺមិនអាចប្រកួតប្រជែងនឹងផលិតផល ឬសេវាកម្មជាមួយបណ្តារោងចក្រផ្សេងទៀតបាននោះទេ ខណៈបច្ចុប្បន្ននេះ…
រាជធានីភ្នំពេញ ៖ ប្រធានសមាគមរោងចក្រកាត់ដេរកម្ពុជាបានលើកឡើងថា វិស័យកាត់ដេរកម្ពុជា ត្រូវតែចាប់យកបច្ចេកវិទ្យាមកបម្រើឲ្យសង្វាក់ផលិតកម្មរបស់ខ្លួន ប្រសិនបើរោងចក្រកាត់ដេរណាមួយមិនប្រើ ប្រាស់បច្ចេកវិទ្យាទំនើបទេ គឺមិនអាចប្រកួតប្រជែងនឹងផលិតផល ឬសេវាកម្មជាមួយបណ្តារោងចក្រផ្សេងទៀតបាននោះទេ ខណៈបច្ចុប្បន្ននេះ វិស័យដែលជាឆ្អឹងខ្នងទ្រទ្រង់សេដ្ឋកិច្ចជាតិរបស់កម្ពុជាមួយនេះ កំពុងប្រឈមនឹងការប្រកួតប្រជែងកាន់តែខ្លាំងជាមួយបណ្ដាប្រទេសជិតខាង ។
បើតាមប្រធានសមាគមកាត់ដេរនៅកម្ពុជា(GMAC) លោកឧកញ៉ា វ៉ាន់ ស៊ូអៀង មានប្រសាសន៍ថា ៖« ស្ថិតក្នុងសម័យកាលបច្ចេកវិទ្យាមានការរីកចម្រើន នៅក្នុងសង្វាក់ផលិតកម្មកាត់ដេរក៏ត្រូវតែមានបច្ចេក វិទ្យាជំនាន់ទី៤នេះដែរ។ បើរោងចក្រកាត់ដេរមិនបំពាក់បច្ចេកវិទ្យាទេ គឺប្រកួតប្រជែងជាមួយគេអត់ឈ្នះទេ ហើយទន្ទឹមនឹនេះ យើងត្រូវបង្រៀនដល់កម្មករយើងនូវការប្រើប្រាស់បច្ចេកវិទ្យាទាំងនោះផងដែរ »។
លោកឧកញ៉ាបន្តថា ៖« ខ្មែរយើងសម្បូរពលរដ្ឋវ័យក្មេងច្រើន ហើយពួកគាត់រៀនឆាប់យល់ ឬចាប់យកបានលឿន ទាំងការប្រើអីុនធើរណេត និងទូរស័ព្ទ ។ អីចឹងពលរដ្ឋវ័យក្មេងកម្ពុជា ទទួលយកបានលឿននូវការប្រើប្រាស់បច្ចេកវិទ្យាថ្មីៗ »។
រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ បានថ្លែងថា បដិវត្តន៍ឧស្សាហកម្មទី៤ រីកចម្រើនយ៉ាងឆាប់រហ័ស ដែលកំពុងជះឥទ្ធិពលដល់ការផ្លាស់ប្តូរយ៉ាងខ្លាំងទៅលើរបៀបរបបនៃប្រតិបត្តិការអាជីវកម្ម និងការងារគ្រប់ប្រភេទ ។
លោក អិុត សំហេង រដ្ឋមន្ត្រីក្រសួងការងារនិងបណ្តុះបណ្តាលវិជ្ជាជីវៈ បានមានប្រសាសន៍ថា ទោះបីបច្ចេកវិទ្យាថ្មីទាំងនេះអាចឈានទៅបំផ្លាញការងារមួយចំនួនក្តី ក៏វានឹងចូលរួមចំណែកក្នុងការបង្កើតការងារថ្មីកាន់តែល្អ ព្រមទាំងលើកកម្ពស់ផលិតភាព និងប្រាក់ឈ្នួលកាន់តែខ្ពស់ដែរ ។
លោករដ្ឋមន្ត្រីបន្តថា ស្ថិតក្នុងបរិការណ៍នេះ ទាមទារឱ្យកម្ពុជាមានការបន្ទាន់ចាំបាច់ក្នុងការចាប់យកម៉ូដែល និងយុទ្ធសាស្ត្រកំណើនថ្មី ដើម្បីបន្តការកែប្រែរចនាសម្ព័ន្ធសេដ្ឋកិច្ចជាតិឈានទៅដំណាក់កាលពឹងផ្អែកលើកំណើនដែលជំរុញដោយផលិតភាព ដោយចាកចេញពីដំណាក់កាលនៃកំណើនជំរុញដោយការប្រើប្រាស់កម្លាំងពលកម្ម ដែលបានអនុវត្តជោគជ័យកន្លងមក ។
លោករដ្ឋមន្ត្រីបញ្ជាក់ថា ៖« ដើម្បីបន្តរក្សាបាននូវភាពប្រកួតប្រជែង យើងត្រូវខិតខំអនុវត្តឱ្យបានជោគជ័យនូវគោលនយោបាយជាតិដែលបានដាក់ចេញកន្លងមក ជាពិសេសគោលនយោបាយជាតិ ស្តីពីការអភិឌ្ឍឧស្សាហកម្ម គោលនយោបាយជាតិស្តីពីមុខរបរ និងការងារ និងគោលនយោបាយជាតិ ស្តីពីការអប់រំបណ្តុះបណ្តាលបច្ចេកទេស និងវិជ្ជាជីវៈ សំដៅសម្រេចឱ្យបាននូវក្តីប្រាថ្នារបស់យើងក្នុងការប្រែក្លាយ ជាប្រទេសមានចំណូលមធ្យមកម្រិតខ្ពស់នៅឆ្នាំ២០៣០ និងប្រទេសមានចំណូលខ្ពស់នៅឆ្នាំ២០៥០ »។
អ្នកស្រាវជ្រាវសេដ្ឋកិច្ចនៃរាជបណ្ឌិត្យសភា កម្ពុជា លោក បណ្ឌិត គី សេរីវឌ្ឍន៍ មានប្រសាសន៍ដែរថា នៅក្នុងវិស័យកាត់ដេរ បើរោងចក្រប្រើប្រាស់បច្ចេកវិទ្យាកាន់តែទំនើបនោះ វានឹងធ្វើឱ្យការផលិតកាន់តែចំណេញពេលវេលា ផលិតផលអាចប្រកួតប្រជែងជាមួយរបស់ក្រុមហ៊ុនផ្សេងទៀត ប៉ុន្ដែវាអាចធ្វើឱ្យបាត់បង់នូវកម្លាំងពលកម្មដែលបម្រើនៅក្នុងវិស័យកាត់ដេរនៅពេលរោងចក្រជ្រើសរើសបច្ចេកវិទ្យាកាន់ច្រើន ។
ទោះយ៉ាងនេះក្ដី លោកបណ្ឌិតលើកឡើងថា ៖« ដើម្បីទប់ស្កាត់ការបាត់បង់កម្លាំងពលកម្មតាមរយៈរោងចក្រជ្រើសរើសបច្ចេកវិទ្យានៅក្នុងដំណើរសង្វាក់ផលិតកម្មរបស់ខ្លួន រាជរដ្ឋាភិបាលគួរមានការលើកទឹកដល់វិស័យឯកជនបោះទុនបង្កើតជារោងចក្រ ឬក្រុមហ៊ុនផលិតគ្រឿងអេឡិចត្រូនិក ឬបច្ចេកវិទ្យាដើម្បីផ្តល់ការងារបន្ថែមមកវិញ »។
យោងតាមសមាគមរោងចក្រកាត់ដេរកម្ពុជា មានរោងចក្រដែលសមាជិកកំពុងដំណើរការប្រហែល៦០០រោងចក្រ ដែលផ្ដល់ការងារដល់កូនខ្មែរប្រមាណ៩០ម៉ឺននាក់ ក្នុងនោះជាង៨៥%ជាស្ត្រីមកពីបណ្តាខេត្តជនបទ និងប្រជាពលរដ្ឋ២លាននាក់ដទៃទៀតក្នុងចំណោមប្រជាពលរដ្ឋសរុប១៦លាននាក់ពឹងផ្អែកលើ វិស័យនេះ ។ ជារៀងរាល់ខែ ប្រាក់ខែជាង២០០លានដុល្លារអាមេរិកត្រូវបានចំណាយទៅលើកម្មករទាំងនេះ ។
សហភាពអឺរ៉ុបជាដៃគូពាណិជ្ជកម្មសំខាន់មួយសម្រាប់កម្ពុជា ហើយជាពិសេសចំពោះវិស័យសម្លៀកបំពាក់និងស្បែកជើង។ ជាង៤៦%នៃការនាំចេញសរុបនៃសម្លៀកបំពាក់និងស្បែកជើងរបស់សមាគមរោងចក្រកាត់ដេរកម្ពុជា គឺទៅសហភាពអឺរ៉ុប ។
យោងតាមសមាគម កាលពីឆ្នាំ២០១៧កន្លងទៅ កម្ពុជានាំចេញផលិតផលក្នុងវិស័យកាត់ដេរមានទឹកប្រាក់ប្រមាណ៧ពាន់លានដុល្លារ ខណៈរយៈពេល៧ខែដើមឆ្នាំនេះ ការនាំចេញផលិតផលក្នុងវិស័យនេះមានទំហំទឹកប្រាក់ជាង៤ពាន់លានដុល្លារអាមេរិក ៕
ចែករំលែកព័តមាននេះ