ខេត្តឧត្តរមានជ័យ ៖ មនុស្សម្នាក់ គោយន្តកន្ត្រៃ9គ្រឿង និងឈើមូលប្រវែង4ម៉ែត្រ ត្រូវបានកម្លាំងសមត្ថកិច្ចធ្វើការបង្ក្រាបរឹបអូសបានពីជនទុច្ចរឹកកាលពីវេលាម៉ោងប្រមាណ4ទាបភ្លឺឈានចូលថ្ងៃទី28 ខែវិច្ឆិកា ឆ្នាំ2018 ដែលស្ថិតនៅចំណុចភ្នំស្វាយ ក្នុងព្រៃសហគមន៍សង្ឃរុក្ខាវ័ន្ន ភូមិចារថ្មី ឃុំលំទង ស្រុកអន្លង់វែង ខេត្តឧត្តរមានជ័យ ។
ព្រះសង្ឃព្រះនាម ប៊ុន សាលួត ព្រះមេគណខេត្ត និងជាប្រធានគ្រប់គ្រងព្រៃសហគមន៍សង្ឃរុក្ខវ័ន្នបានមានសង្ឃដីការឲ្យដឹងថា ព្រៃសហគមន៍សង្ឃរុក្ខាវ័ន្នដែលមានទំហំ30254ហិកតាដែលស្ថិតនៅក្នុងស្រុក2គឺស្រុកអន្លង់វែង និងស្រុកចុងកាល់ព្រៃសហគមន៍នេះសម្បូទៅដោយសត្វព្រៃគ្រប់ប្រភេទរស់នៅជ្រកកោននៅទីនេះ និងមានដើមឈើធំៗផងដែរ ។
ព្រះសង្ឃព្រះនាម ប៊ុន សាលួត បានសង្ឃដីការបន្តថា ព្រៃសហគមន៍នេះដោយមានព្រះសង្ឃ ប្រជាពលរដ្ឋដែលជាសមាជិករួមទាំងកងកម្លាំងបានចូលរួមការពារផងដែរ តែទោះជាបែបណានោះក៏នៅកើតមានជនខិលខូចចូលលួចកាត់ឈើ និងចូលលួចបរបាញ់សត្វព្រៃជាបន្តបន្ទាប់ ។
ខណៈនោះកម្លាំងសមាជិករួមទាំងកម្លាំងសមត្ថកិច្ចដែលការពារព្រៃបានធ្វើការបង្ក្រាបចាប់ឃាត់ខ្លួនចាត់ការទៅតាមផ្លូវច្បាប់ហើយនៅតែមិនរាងចាលព្រះសង្ឃបានដាក់ការសង្សយ័ថា ទំនងនឹងមានអ្នកមានអំណាចណាម្នាក់នៅពីក្រោយខ្នងជនដែលប្រព្រឹត្តចូលលួចកាត់ឈើ ឬលួចចូលបរបាញ់សត្វព្រៃក៏អាចថាបានដែរ ។
លោកវរសេនីយ៍ឯក ស៊ុ សារឿន មេបញ្ជាការកងវរៈសេនាតូចលេខ905 ការពារព្រំដែនគោកកម្ពុជា-ថៃបានឲ្យដឹងថា យោងតាមបទបញ្ជាពីលោកឧត្តមសេនីយ៍ទោ មែន លី ស្នងការនៃស្នងការដ្ឋាននគបាលខេត្តឧត្តរមានជ័យបានបញ្ជាឲ្យលោកដឹកនាំកម្លាំង និងសហការណ៍ជាមួយកម្លាំងបរិស្ថាន១០នាក់ មន្ត្រីឧទ្យានុរក្សចុះបង្ក្រាបធ្វើការហុំព័ទ្ធកាលពីវេលាម៉ោងប្រមាណ4ទាបភ្លឺឃាត់ខ្លួនបានម្នាក់ឈ្មោះ ចក់ កុសល ភេទប្រុស អាយុ25ឆ្នាំ រស់នៅក្នុងភូមិឃុំកើតហេតុខាង លើ និងរឹបអូសបានឈើមូលចំនួន11ដុំ ប្រវែង4ម៉ែត្រ ជាប្រភេទឈើផ្ចឹក និងឈើក្រំ រួមទាំងគោយន្តកន្ត្រៃចំនួន9គ្រឿងផងដែរ នាំយកទៅរក្សាទុកនៅក្នុងមន្ទីរបរិស្ថានខេត្តដើម្បីចាត់ការតាមនីតិវិធី ៕
ចែករំលែកព័តមាននេះ