ខេត្តប៉ៃលិន ៖ នរណាៗក៏ដឹងដែរថា ដោយសាររយៈពេលចុងក្រោយនេះ បន្ទាប់ពីដីធ្លីនៅតំបន់ជួរព្រំដែនមានការស្ទុះហក់លោតឡើងថ្លៃគួរឱ្យកត់សម្គាល់ ស្រាប់តែមកដល់ថ្មីៗនេះ ពលរដ្ឋរស់នៅតំបន់ជាប់ព្រំដែនកម្ពុជា-ថៃបានទទួលដំណឹងថា ដីព្រៃភ្នំចំនួន២៣ហិកតា ស្ថិតនៅចំណុចក្រោយកាស៊ីណូម្កុដពេជ្រ និងភ្នំសារវណ្ណ…
ខេត្តប៉ៃលិន ៖ នរណាៗក៏ដឹងដែរថា ដោយសាររយៈពេលចុងក្រោយនេះ បន្ទាប់ពីដីធ្លីនៅតំបន់ជួរព្រំដែនមានការស្ទុះហក់លោតឡើងថ្លៃគួរឱ្យកត់សម្គាល់ ស្រាប់តែមកដល់ថ្មីៗនេះ ពលរដ្ឋរស់នៅតំបន់ជាប់ព្រំដែនកម្ពុជា-ថៃបានទទួលដំណឹងថា ដីព្រៃភ្នំចំនួន២៣ហិកតា
ស្ថិតនៅចំណុចក្រោយកាស៊ីណូម្កុដពេជ្រ និងភ្នំសារវណ្ណ ក្នុងភូមិផ្សារព្រំជើង និងភូមិអូរឈើក្រំ ឃុំស្ទឹងកាច់ ស្រុកសាលាក្រៅ ត្រូវបានគេលក់ឱ្យឈ្មួញខ្ទេចខ្ទីអស់ទៅហើយ ជាហេតុធ្វើឱ្យពួកគាត់មានការព្រួយបារម្ភយ៉ាងខ្លាំងពីការរងផលប៉ះពាល់បាត់បង់នូវព្រៃឈើ ដែលពីដើមធ្លាប់តែឃើញខាងមន្ទីរជំនាញបរិស្ថាន ក៏ដូចជាអាជ្ញាធរធ្លាប់ថែរក្សាអស់រយៈពេលជាយូរមកហើយ។
ប្រភពព័ត៌មានថ្មីៗបំផុតពីប្រជាពលរដ្ឋជាច្រើននាក់រស់នៅក្បែរតំបន់ព្រំដែនកម្ពុជា-ថៃ បានខ្សឹបខ្សៀវដាក់គ្នានៅតាមហាងកាហ្វេ គុយទាវ និងទីប្រជុំជន ឱ្យភ្នាក់ងារសារព័ត៌មានដឹងថា មើលទៅព្រៃភ្នំតំបន់ការពារព្រំដែនខេត្តប៉ៃលិន នឹងលែងមានតទៅទៀតហើយ ដោយព្រោះបច្ចុប្បន្ននេះ ដីត្រង់តំបន់ខាងលើហក់ស្ទុះឡើងថ្លៃគួរឱ្យកត់សម្គាល់ ក៏មានក្រុមឈ្មួញសម្រុកចូលទិញយ៉ាងគគ្រឹកគគ្រេងដែរ ហើយក្រោយមកស្រាប់តែពេលនេះ បានលេចចេញនូវដំណឹងច្បាស់ការថា ដីភ្នំចំនួន២៣ហិកតា ត្រូវគេលក់ឱ្យទៅឈ្មួញមានលុយម្នាក់រស់នៅទីក្រុងភ្នំពេញ ដើម្បីនឹងរៀបចំឈូសឆាយសង់ធ្វើជាអគារលំនៅឋាន ផ្ទះល្វែង ផ្ទះវីឡា សណ្ឋាគារ រីស្សត ផ្សារទំនើប និងកាស៊ីណូជាដើម ។
ប្រភពបន្តទៀតថា បើជ្រុលជាលក់អស់ហើយ គួរតែធ្វើការឈូសឆាយយ៉ាងណា ដែលអាចរក្សាបាននូវទេសភាព សោភ័ណ្ឌភាពនៃទីតាំងខាងលើ ដែលជាកត្តាចាំបាច់បំផុត ព្រោះព្រៃឈើតំបន់ភ្នំក៏អាចជាជំរកសត្វព្រៃ ហើយនឹងទាក់ទាញ និងនាំមកនូវភ្ញៀវទេសចរណ៍ជាតិ និងអន្តរជាតិចូលមកកំសាន្តផងដែរ ។
ចំណែកអ្នកខ្លះទៀតបានលើកឡើងទាំងតូចចិត្តថា ពេលប្រជាពលរដ្ឋរស់នៅតំបន់នោះជីកកកាយ និងឈូសឆាយប៉ះដីតំបន់ការពារតិចតួច ស្រាប់តែត្រូវខាងមន្ទីរជំនាញចុះទៅបង្ក្រាប និងចាប់បញ្ជូនទៅតុលាការខេត្ត មិនទាន់ទាំងដោះស្រាយរួចរាល់ផង ស្រាប់តែពេលនេះព្រៃភ្នំដ៏ធំទាំងមូលត្រូវបានគេលក់ឱ្យឈ្មួញអស់បាត់ ពិតជាមានរឿងដ៏អាក្រក់អយុត្តិធម៌មិនគួរឱ្យជឿមែន ។
ទោះបីជាយ៉ាងណាក៏ដោយ ភ្នាក់ងារយើងបានទាក់ទងទៅលោក សំ សារ៉េត អភិបាលស្រុកសាលាក្រៅ ដើម្បីឱ្យឆ្លើយបំភ្លឺចំពោះបញ្ហានេះដែរ តែលោកបាននិយាយថា ជាប់មានភារកិច្ចប្រជុំនៅឯរាជធានីភ្នំពេញ ។ ចំណែកឈ្មួញម្នាក់រស់នៅក្នុងខេត្តប៉ៃលិនឈ្មោះ ឈីវ វ៉ាន់សែត ដែលជាអ្នករៀបចំផែនទីបង្ហាញទីតាំងដីភ្នំរបស់ខ្លួនលក់ឱ្យឈ្មួញនៅភ្នំពេញ ភ្នាក់ងារយើងបានទាក់ទងកាលពីល្ងាចថ្ងៃទៅ២៨ វិច្ឆិកានេះដែរ តែលោកបានឱ្យទូរស័ព្ទអ្នកផ្សេងទទួល ហើយក្រោយមកក៏បិទទូរស័ព្ទមិនអាចទាក់ទងបំភ្លឺបានឡើយ ។
ចំណែកលោក គឹម សុខា ប្រធានមន្ទីរបរិស្ថានខេត្តប៉ៃលិន បានបំភ្លឺឱ្យដឹងថា ដីភ្នំខាងលើនេះ ខាងអាជ្ញាធរខេត្ត បានដាក់វិនិយោគឱ្យក្រុមហ៊ុនមួយធ្វើការអភិវឌ្ឍ សាងសង់អគារ និងតំបន់រមណីយដ្ឋានផ្សេងៗ ដោយសុំគោការណ៍ពីខាងក្រសួងបរិស្ថាន ។
តែខាងថ្នាក់លើក៏បានណែនាំផងដែរ ដោយមុននឹងឈូសឆាយត្រូវតែលើកគម្រោងច្បាស់លាស់ ដែលអាចធានារក្សាទេសភាព ហើយសូមឱ្យរក្សាផ្ទៃដីនៃទីតាំងមួយចំនួន ដើម្បីដាំដើមឈើបន្ថែមទៀត ដែលអាចបង្កើត មីក្រូបរិយាកាសល្អ សម្រាប់ទាក់ទាញភ្ញៀវផងដែរ ៕
ចែករំលែកព័តមាននេះ