រាជធានីភ្នំពេញ ៖ ស្របពេលកម្លាំងពលកម្មក្នុងវិស័យកសិកម្មបានថយចុះជាបន្តបន្ទាប់ ត្រូវបានជំនួសមកវិញដោយគ្រឿងយន្តសម្រាប់ដំណើរការក្នុងរបរកសិកម្មរបស់ប្រជាពលរដ្ឋ និងកសិករបន្តការងារនេះ ។ ជាក់ស្ដែង គិតត្រឹមឆ្នាំ២០១៨នេះ គ្រឿងយន្តកសិកម្មនៅកម្ពុជា ដែលកំពុងប្រើប្រាស់សព្វថ្ងៃ មានរហូតដល់ជាង៣៧ម៉ឺនគ្រឿង ទាំងត្រាក់ទ័រ និងគោយន្ត។ នេះបើយោងតាមរបាយការណ៍ស្ថិតិរបស់ក្រសួងកសិកម្ម រុក្ខាប្រមាញ់ និងនេសាទ ។
បើតាមលោកជំទាវ ចាន់ ផលលឿន អនុរដ្ឋលេខាធិការនៃក្រសួងកសិកម្មរុក្ខាប្រមាញ់ និងនេសាទ បានឲ្យដឹងថា ក្នុងរយៈពេលប៉ុន្មានឆ្នាំចុងក្រោយនេះ កំណើនគ្រឿងយន្តកសិកម្មនៅក្នុងប្រទេសកម្ពុជា បានកើនឡើងគួរឲ្យកត់សម្គាល់ ដោយកាត់បន្ថយការនូវការប្រើប្រាស់កម្លាំងសត្វគោ ក្របីដើម្បីអូស
ទាញ ។
លោកជំទាវមានប្រសាសន៍ថា ៖« គិតត្រឹមឆ្នាំ២០១៨នេះ គោយន្ត ឬគ្រឿងយន្តកសិកម្មបានកើនឡើងដល់៣៧៥.៧២១គ្រឿង ខណៈរបាយការណ៍កាលពីឆ្នាំ២០០៤ គ្រឿងយន្តកសិកម្មសរុបមានត្រឹមតែជាង២ម៉ឺនគ្រឿងប៉ុណ្ណោះ ។ ក្នុងចំណោមគ្រឿងយន្តកសិកម្មទាំងអស់នោះ មានត្រាក់ទ័របានកើនឡើងដល់ទៅ ២២.១៨៦គ្រឿងឯណោះក្នុងឆ្នាំ២០១៨
នេះ »។
លោកជំទាវបន្តថា ៖« ការប្រើប្រាស់គ្រឿងយន្តកសិកម្មជំនួសកម្លាំងសត្វ បានជំរុញល្បឿនក្នុងការធ្វើកសិកម្មរបស់កសិករកាន់តែលឿន និងកាត់បន្ថយការប្រើប្រាស់កម្លាំងមនុស្សច្រើន ហើយយើងក៏អាចយកកម្លាំងមនុស្សទៅបំពេញការងារផ្សេង ដែលទទួលប្រាក់ចំណូលបន្ថែមទៀត » ។
បើតាមលោក វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ បានលើកឡើងកន្លងមកថា កម្លាំងកសិកម្មបានធ្លាក់ចុះជាបន្តបន្ទាប់ ។ ជាក់ស្ដែងកាលពីឆ្នាំ១៩៩៨ កម្ពុជាមានកម្លាំងពលកម្មជាង៨០% ហើយបានធ្លាក់មកចុះត្រឹមតែ៤០%ប៉ុណ្ណោះនាពេលបច្ចុប្បន្ននេះ នឹងត្រូវបានព្យាករណ៍ថា នឹងធ្លាក់ចុះបន្តទៀតនៅត្រឹមម្រមាណ២៩%នៅឆ្នាំ២០២០ខាងមុខ ។
លោក គា បូរាណ ប្រធានសមាគមមីក្រូហិរញ្ញវត្ថុកម្ពុជា ក៏បានលើកឡើងផងដែរថាបច្ចុប្បន្ននេះ គេសង្កេតឃើញថា កំណើនវិស័យកសិកម្មក្នុងចំណែកសេដ្ឋកិច្ចជាតិពិតជាមានការថមថយមែន តែជំនួសមកវិញដោយវិស័យផ្សេងៗដូចជាវិស័យសំណង់ និងអចលនទ្រព្យជាដើម ។ លោកថា ៖« ទោះបីជាវិស័យកសិកម្មមានកំណើនថមថយក៏ដោយ ក៏គ្រឹះស្ថានមីក្រូហិរញ្ញវត្ថុ នឹងមិនមានការផ្លាស់ប្តូរ ឬឈប់ផ្ដល់ឥណទាន ក្នុងវិស័យកសិកម្មនោះទេ ព្រោះវិស័យនេះមានសារសំខាន់ណាស់ »។
លោកបន្តថា នៅលើពិភពលោកនេះផលិតផលកសិកម្មមានសារសំខាន់ណាស់ បើទោះបីជាប្រទេសនោះមិនធ្វើកសិកម្ម ក៏ត្រូវនាំចូលផលិតផលកសិកម្មពីប្រទេសផ្សេងមកបំពេញតម្រូវការសម្រាប់ទីផ្សាររបស់គេដែរ ។ ដូចនេះ គ្រឹះស្ថានមីក្រូហិរញ្ញវត្ថុយើងនឹងនៅតែគាំទ្រ និងជំរុញឲ្យមានការផ្ដល់កម្ចីក្នុងវិស័យកសិកម្មឲ្យកាន់តែច្រើនបន្ថែមទៀត ដើម្បីឲ្យវិស័យនេះកាន់តែមានសន្ទុះ និងរួមចំណែកខ្ពស់ក្នុងកំណើនសេដ្ឋកិច្ចជាតិ ។
បើតាមលោក ម៉ី កល្យាណ ទីប្រឹក្សាជាន់ខ្ពស់នៃឧត្តមក្រុមប្រឹក្សាសេដ្ឋកិច្ចជាតិ បានឲ្យដឹងផងដែរថា ជាការពិតណាស់ កម្លាំងកសិកម្មពីមុនបានផ្លាស់ប្តូរមកបម្រើការក្នុងវិស័យឧស្សាហកម្មកាត់ដេរ និងវិស័យមួយចំនួនទៀតភាគច្រើន ហើយពួកគាត់ក៏មិនអាចត្រលប់ទៅធ្វើកសិកម្មវិញបានដែរ ក្នុងខណៈការងាររបស់ពួកគេអាចរកចំណូលបានច្រើនជាងកសិកម្ម ៕
ចែករំលែកព័តមាននេះ