ខេត្តកំពង់ឆ្នាំង ៖ រថយន្តចំនួន៤គ្រឿងបានបុកគ្នាជាបន្តបន្ទាប់ ខណៈពេលដែលមេឃកំពុងភ្លៀងរលឹម នៅលើកំណាត់ផ្លូវជាតិលេខ៥ ត្រង់ចន្លោះគីឡូម៉ែត្រលេខ ៦៩-៧០ ស្ថិតនៅក្នុងភូមិគោកស្តៅ ឃុំទឹកហូត ស្រុករលាប្អៀរ។…
ខេត្តកំពង់ឆ្នាំង ៖ រថយន្តចំនួន៤គ្រឿងបានបុកគ្នាជាបន្តបន្ទាប់ ខណៈពេលដែលមេឃកំពុងភ្លៀងរលឹម នៅលើកំណាត់ផ្លូវជាតិលេខ៥ ត្រង់ចន្លោះគីឡូម៉ែត្រលេខ ៦៩-៧០ ស្ថិតនៅក្នុងភូមិគោកស្តៅ ឃុំទឹកហូត ស្រុករលាប្អៀរ។ ហេតុការណ៍នេះបានកើតឡើងនៅវេលាម៉ោង១០ និង៥៥នាទីព្រឹក ថ្ងៃទី២៧ ខែវិច្ឆិកា ឆ្នាំ២០១៨ ខណៈរថយន្តមួយគ្រឿង ក្នុងចំណោម៤គ្រឿង បានដាច់ឌុបខាងក្រោយ ហើយរត់ទៅបានបុករថយន្តមួយគ្រឿង ទៀត ក្នុងដំណើរបញ្ច្រាសទិសគ្នា។
តាមប្រភពព័ត៌មានពីប្រជាពលរដ្ឋ ក៏ដូចជាអ្នកបើកបររថយន្តម៉ាកតូយូតាព្រូស ដែលរងគ្រោះខាងលើបានឲ្យដឹងថា មុនពេលកើតហេតុមានរថយន្តធុនធំមួយគ្រឿង ម៉ាកហ្វុយស្យូ ប្រភេទយីឌុប ពាក់ស្លាកលេខ ភ្នំពេញ 3B-3945 បើកតាមបណ្តោយផ្លូវជាតិលេខ៥ ក្នុងដំណើរទិសដៅពីត្បូងទៅជើង ហើយមានរថយន្ត២គ្រឿងទៀត បើកពីក្រោយ គឺរថយន្តដឹកដី ពាក់ស្លាកលេខ កំពង់ឆ្នាំង 3A-0132 និងរថយន្តម៉ាកតូយូតាព្រូស ពណ៌ស។ លុះពេលមកដល់ចំណុចកើតហេតុ ក៏ស្រាប់តែរថយន្តធុនយីឌុប ដែលបើកខាងមុខបានដាច់កង់ក្រោយខាងឆ្វេងជាកង់ឌុបជាប់គ្នា ហើយក៏កង់រថយន្តនោះ បានរត់ទៅមុខយ៉ាងលឿនសំដៅទៅបុករថយន្ដមួយគ្រឿង ម៉ាកវីហ្គោ ពាក់ស្លាកលេខ ភ្នំពេញ 2Z-2366 ដែលកំពុងធ្វើដំណើរ បញ្ច្រាសទិសគ្នា បណ្ដាលឲ្យរថយន្តវីហ្គោ បែកកង់វិលពេញផ្លូវ។
ស្ថិតក្នុងសភាពដែលរថយន្តវីហ្គោ កំពុងរេចង្កូតវិលពេញផ្លូវបែបនេះ រថយន្ត២គ្រឿង ដែលបើកពីក្រោយរថយន្ត ដាច់កង់ខាងលើ បានគេចយករួចខ្លួនតែបែបុកបន្តគ្នាធ្លាក់ចូលស្នាមភ្លោះតែម្តង។ ក្រោយពេលកើតហេតុ រថយន្តបង្កដែលដាច់កង់ភ្លោះមួយគូ តែនៅកង់ភ្លោះមួយគូទៀត ដែលអាចបបើកបានក៏បើករត់ រហូតមកដល់មុខវត្តអារញ្ញ ក្រុងកំពង់ឆ្នាំង ទើបសមត្ថកិច្ចចាប់ឃាត់បាន ហើយយកទៅរក្សាទុកនៅការិយាល័យ នគរបាលចរាចរខេត្តកំពង់ឆ្នាំង។
សមត្ថកិច្ចបានបញ្ជាក់ថា គ្រោះថ្នាក់ចរាចរខាងលើ គឺមានតែអ្នករថយន្តដឹកដី ម្នាក់ប៉ុណ្ណោះ ដែលរងរបួសធ្ងន់បាក់ជើង ហើយត្រូវបានដឹកយកទៅសង្គ្រោះនៅឯមន្ទីរពេទ្យស្រុកកំពង់ត្រឡាច។ ក្រោយពេលកើតហេតុ រថយន្តទាំងអស់ ត្រូវបានសមត្ថកិច្ចនាំមកកាន់ការិយាល័យចរាចរ ផ្លូវគោក នៃស្នងការដ្ឋានខេត្តកំពង់ឆ្នាំង ដើម្បីរង់ចាំការដោះស្រាយ តាមនីតិវិធី៕
ចែករំលែកព័តមាននេះ