ខេត្តប៉ៃលិន ៖ បន្ទាប់ពីពលរដ្ឋមួយចំនួនរស់នៅក្នុងក្រុងប៉ៃលិន បានរិះគន់ចំពោះបញ្ហាទឹកស្អាតរបស់ក្រុមហ៊ុន ថូម៉ាក់ ដែលមានទីតាំងស្ថិតនៅក្នុងភូមិបឌិននៀវ សង្កាត់ប៉ៃលិន ក្រុងប៉ៃលិន ថា ជាញឹកញយការប្រើប្រាស់ទឹកគ្មានគុណភាព តែងតែល្អក់កករ ជាពិសេសក្រោយពេលមេឃភ្លៀងធ្លាក់ម្តងៗ ខណៈពេលបើករ៉ូប៊ីណេប្រើទឹក បែរជាមានកំទេចដី និងសំរាមទៅវិញ ។
ជួនកាលទឹកមានពណ៌ក្រហមហូរចូល ជាហេតុលំបាកក្នុងការងូត និងបោកគក់ខោអាវផងដែរ ។ ទើបរហូតមកដល់ម៉ោង៨និង៣០នាទីព្រឹក ថ្ងៃទី២៦ ខែវិច្ឆិកា លោក ថូ ចំរើន តំណាងឱ្យក្រុមហ៊ុនទឹកស្អាតខាងលើ បានបកស្រាយចំពោះការចោទប្រកាន់របស់ប្រជាពលរដ្ឋ ។
លោក ថូ ចំរើន អាយុ៣២ឆ្នាំ រស់នៅក្នុងភូមិបឌិននៀវ សង្កាត់ប៉ៃលិន បានរៀបរាប់ឱ្យដឹងថា ការហូរកំទេចដីចូលក្នុងទុយោពិតជាមានមែន ព្រោះនៅខេត្តប៉ៃលិនជាតំបន់ភ្នំ លុះមានការឈូសឆាយធ្វើផ្លូវម្តងៗ បណ្តាលឱ្យដាច់ទុយោ ហើយបើមានបែកនៅកន្លែងណាមួយ គឺនឹងបឺតដីចូល លុះប្រជាពលរដ្ឋបើករ៉ូប៊ីណេប្រើប្រាស់ ក៏មានកំទេចដីទៅជាមួយដែរ ជាពិសេសនៅតំបន់អូរច្រាតែម្តង ។ បើខាងក្រុមហ៊ុនជីកកកាយយកទុយោចេញ គឺមានការលំបាក ព្រោះកប់ជម្រៅរហូតដល់២ម៉ែត្រឯណោះ ។
លោកបន្តថា រាល់ថ្ងៃខាងក្រុមហ៊ុនខិតខំប្រឹងប្រែង តែងតែប្រើបុគ្គលិកឱ្យចុះទៅត្រួតពិនិត្យមើល បើសិនជាមានសេចក្តីរាយការណ៍ពីប្រជាពលរដ្ឋថា មានការដាច់ប្រព័ន្ធទឹក និងខូចទុយោត្រង់កន្លែងណាមួយ ។ ហើយការផ្គត់ផ្គង់ទឹកក្នុង១ថ្ងៃ ចំណាយ៣ទៅ៤ម៉ឺនម៉ែត្រគូប អាចឈានរហូតដល់៧ម៉ឺនម៉ែត្រគូបឯណោះ ដោយប្រជាពលរដ្ឋប្រើប្រាស់ចំនួន៣ពាន់គ្រួសារ ។
ព័ត៌មានពិស្តារនឹងមានផ្សាយជូននៅលើកាសែតកោះសន្តិភាព
ចែករំលែកព័តមាននេះ