ដកពីគេយកទៅឱ្យអ្នកដទៃ… ពិតជាគេមិនព្រមទេ!
- កំពង់ឆ្នាំង
ខេត្តកំពង់ឆ្នាំង ៖ ជុំវិញករណីប្រជាពលរដ្ឋ៣៣គ្រួសារ រស់នៅក្នុងភូមិសេរី និងភូមិល្បើក ក្នុងឃុំខុនរ៉ង ស្រុកបរិបូណ៍ ដែលបានចោទប្រកាន់លើអាជ្ញាធរ ឃុំ-ស្រុក ថា…
ខេត្តកំពង់ឆ្នាំង ៖ ជុំវិញករណីប្រជាពលរដ្ឋ៣៣គ្រួសារ រស់នៅក្នុងភូមិសេរី និងភូមិល្បើក ក្នុងឃុំខុនរ៉ង ស្រុកបរិបូណ៍ ដែលបានចោទប្រកាន់លើអាជ្ញាធរ ឃុំ-ស្រុក ថា បានរំលោភបំពានយកដីស្រែប្រាំងរបស់ពួកគាត់ទៅឲ្យអ្នកបំលាស់ទី ផ្ទះបណ្ដែតទឹក តែត្រូវអាជ្ញាធរធ្វើការបដិសេធន៍ ដីស្រែប្រាំងរបស់គាត់គឺជាដីតំបន់ ៣ ដែលអាជ្ញាធរធ្លាប់ហាមឃាត់ មិនឲ្យរុករានព្រៃកន្លងមក។
ថ្ងៃទី២៦ ខែវិច្ឆិកា ឆ្នាំ២០១៨ នេះភាគីខាងប្រជាពលរដ្ឋក៏មកជួបជុំគ្នា ដើម្បីរកដំណោះស្រាយជាមួយនឹងអាជ្ញាធរស្រុកបរិបូណ៍ ប៉ុន្តែក្រោយការដោះស្រាយរយៈពេលពេញមួយព្រឹក គឺមិនទទួលលទ្ធផលល្អប្រសើរឡើយ។ ដោយសារតែភាគីខាងប្រជាពលរដ្ឋនៅតែប្រកាន់ជំហរមិនប្រគល់ដីរបស់គាត់ទៅឲ្យអ្នកបំលាស់ទីផ្ទះបណ្ដែតទឹកនោះឡើយ ចំណែកអាជ្ញាធរវិញ ក៏នៅតែប្រកាន់ ជាដីតំបន់៣ដែលរដ្ឋបានហាមឃាត់ហើយរដ្ឋត្រូវតែដកយកមកវិញ។
ក្រោយពីកិច្ចដោះស្រាយរវាងប្រជាពលរដ្ឋ និងអាជ្ញារស្រុក ដែលហាមមិនឱ្យអ្នកសារព័ត៌មានចូលស្តាប់ និងថតយករូបភាព រួចមក ពេលចេញមកវិញ ប្រជាពលរដ្ឋបានលើកឡើងថា ពួកគាត់ពិតជាមានដីស្រែប្រាំងនៅទីនោះ និងបានកាប់រានព្រៃលិចទឹកជាប់ក្បាលស្រែរបស់រដ្ឋពិតមែន ប៉ុន្តែរឿងនេះគាត់បានបង្កបង្កើនផលជាច្រើនឆ្នាំណាស់មកហើយមាន ៣-៤ ទៅ៥ឆ្នាំ ។
រឿងនេះ បើសិនជាអាជ្ញាធរធ្វើការដកដីគាត់ទៅធ្វើជាផ្លូវ ឬក៏ត្រូវការអភិវឌ្ឍន៍អ្វីផ្សេងទៀត គាត់មិនប្រកាន់នោះទេ គាត់ព្រមប្រគល់អោយ ។ ក៏ប៉ុន្តែការដកដីរបស់គាត់ទុកឲ្យអ្នកបំលាស់ទី ផ្ទះបណ្ដែតទឹក គឺដូចមានន័យថា ដកដីពីគាត់ជាប្រជាពលរដ្ឋទៅឲ្យប្រជាពលរដ្ឋវិញដដែល ។ ហេតុនេះហើយគាត់មិនព្រមប្រគល់ដីនោះទៅឲ្យអាជ្ញាធរឡើយ ។ ពួកគាត់នឹងតវ៉ាទៅថ្នាក់លើជាបន្តបន្ទាប់ទៀត។ សូមបញ្ជាក់ ដីរបស់ពួកគាត់៣៣ គ្រួសារគឺមានទំហំ ១៦ហិកតានិង ១៧អាដែលរងការប៉ះពាល់។ ដណ្តើមពីម្នាក់យកទៅឱ្យម្នាក់ទៀត ពិតជាគេមិនព្រម…។
ព័ត៌មានពិស្តារនឹងមានផ្សាយជូននៅលើកាសែតកោះសន្តិភាព
ចែករំលែកព័តមាននេះ