ខេត្តកំពង់ឆ្នាំង ៖ គ្រួសារមួយរស់នៅក្នុងភូមិព្រែកសាលា ឃុំទឹកហូត ស្រុករលាប្អៀរ បានចាប់ផ្ដើមុមុខរបរតម្បាញសំពត់សឹងរយៈពេលជាង៣ខែសោះ ក៏ទទួលបានជោគជ័យគឺថា ចាប់ផ្តើមមានត្រឹមតែកីតម្បាញតែមួយប៉ុណ្ណោះ តែបច្ចុប្បន្នមានដល់ទៅ៥កី ហើយកំពុងព្យាយាមពង្រីកបន្ថែមទៀតនៅពេលមានថវិការគ្រប់គ្រាន់ ។ នេះអាចថា ជាគ្រួសារទីមួយដែលចាប់យកមុខរបរនេះក្នុងខេត្តកំពង់ឆ្នាំង ព្រោះកន្លងមកការតម្បាញសំពត់សឹងជាស្នាដៃខ្មែរក្នុងខេត្តមិនមាននោះទេ ។
ស្ត្រីឈ្មោះ ចាន់ ណារិន អាយុ៣២ឆ្នាំ ពិការជើងមួយជំហៀងតាំងពីអាយុ៣ឆ្នាំ បានប្រាប់អោយដឹងថា រូបគាត់ និងបងប្អូនចំនួន៤នាក់បានទៅរៀនត្បាញសំពត់សឹងនៅឯឃុំកោះដាច់ ស្រុកមុខកំពូល ខេត្តកណ្តាល តាំងពីនៅតូចៗមកម្ល៉េះ ។ ក្រោយពីចេះត្បាញហើយពួកគាត់បានប្រកបមុខរបរត្បាញសំពត់សឹងនៅទីនោះទាំងអស់គ្នារយៈពេល៦-៧ឆ្នាំ ។
ប៉ុន្តែក្រោយមក សំពត់ស៊ឹងបានចុះថោកតែវត្ថុធាតុដើមនៅតែថ្លៃដដែលធ្វើឲ្យពួកគាត់មិនអាចផលិតបានទៀតឡើយហើយក៏បានវិលត្រឡប់មកកាន់ស្រុកកំណើតនៅឯខេត្តកំពង់ឆ្នាំងវិញដោយប្រកបរបរធ្វើស្រែចំការ ។
ប៉ុន្តែក្រោយមកថ្មីៗនេះបងប្អូននៅកោះដាច់បានប្រាប់ថា សំពត់សឹងមានហាងឆេងវិញហើយគាត់ក៏បានចងការប្រាក់ទិញបានកីតម្បាញមួយ និងយកវត្ថុធាតុដើមពីខេត្តកណ្ដាលយកមកត្បាញ ។ គ្រាន់តែជាង៣ខែសោះមុខរបរមួយនេះគាត់បានរីកចម្រើនរហូតដល់សព្វថ្ងៃមានកីតម្បាញចំនួន៥កីដែលសុទ្ធសឹងតែជាបងប្អូនបង្កើតនឹងគ្នាចែកគ្នាចាប់យកអាជីពមួយនេះ ។
សូមបញ្ជាក់ថា ជាមធ្យមក្នុងកីតម្បាញមួយអាចរកចំណូលបានពី៣០០ទៅ៤០០ដុល្លារក្នុង១ខែដែលចំណូលនេះអាចច្រើនជាងកម្មករតម្បាញតាមរោងចក្រ ប៉ុន្តែមុខរបរមួយនេះអាចនៅជួបជុំគ្រួសារ និងអាចមើលថែរក្សាកូនចៅ ឪពុកម្តាយចាស់ជរា នៅផ្ទះបានផងដែរ ៕
ចែករំលែកព័តមាននេះ