ខេត្តតាកែវ ៖ កម្លាំងសមត្ថកិច្ចនគរបាលនាយកដ្ឋានប្រឆាំងភាវរកម្ម និងឧក្រិដ្ឋកម្មឆ្លងដែនក្រសួងមហាផ្ទៃ កាលពីព្រឹកថ្ងៃទី២៦ វិច្ឆិកា បានសហការជាមួយកម្លាំងកងរាជអាវុធហត្ថខេត្ត និងនគរបាលខេត្តតាកែវ ក្រោមការសម្របសម្រួលពីស្ថាប័នអយ្យការអមសាលាដំបូងខេត្ត បានចុះបង្ក្រាបបទល្មើសករណី ជំរិតតាមប្រព័ន្ធអ៊ីនធឺណែត ដោយបានធ្វើការឃាត់ខ្លួនជនជាតិចិនប្រុសស្រីប្រមាណ២៣៥នាក់។
កិច្ចបង្ក្រាបនោះមានការដឹកនាំកម្លាំងដោយឧត្តមសេនីយ៍ឯក អ៊ី សុខឃី ប្រធាននាយកដ្ឋានប្រឆាំងភាវរកម្ម និងឧក្រិដ្ឋកម្មឆ្លងដែន និងលោកឧត្តមសេនីយ៍ត្រី ឡា ឡៃ មេបញ្ជាការកងរាជអាវុធហត្ថខេត្តតាកែវ ដែលបានធ្វើឡើងចំនួនទីតាំង៤ទីតាំងផ្សេងៗគ្នា។ សេចក្តីរាយការណ៍ឲ្យដឹងទៀតថា ទីតាំងទី១ ស្ថិតនៅភូមិបុស្សតាផង់ ឃុំត្រពាំងក្រញូង ស្រុកត្រាំកក់ ឃាត់ខ្លួនជនជាតិចិនបានចំនួន ៦៣នាក់ ស្រី០៧នាក់។ ទីតាំងទី២ ស្ថិតនៅភូមិបុស្សតាផង់ ឃុំត្រពាំងក្រញូង ស្រុកត្រាំកក់ ឃាត់ខ្លួនជនជាតិចិនចំនួន ១២នាក់(ប្រុស)។ ទីតាំងទី៣ ស្ថិតនៅភូមិតាំងដូង ឃុំតាំងដូង ស្រុកបាទី ខេត្តតាកែវឃាត់ខ្លួនជនជាតិចិនបានចំនួន៧០នាក់ ស្រី២៤នាក់។
និងទីតាំងទី៤ ស្ថិតនៅភូមិព្រៃក្រាយ ឃុំតាំងដូង ស្រុកបាទី ខេត្តតាកែវ ឃាត់ខ្លួនជនជាតិចិន បានចំនួន ៩០នាក់ ស្រី៥នាក់។ ដូច្នោះសរុបទាំង៤ទីតាំងនោះគឺឃាត់ខ្លួន ២៣៥នាក់ ស្រី៣៦នាក់។ ជាមួយនោះផងដែរសមត្ថកិច្ចបានដកហូត វត្ថុតាងពាក់ពន្ធប្រព្រឹត្តល្មើសមួយចំនួន ដូចជាឧបរកណ៍ ម៉ាស៊ីនអេឡិចត្រូនិច ដែលសុទ្ធសឹងជាមធ្យោបាយសម្រាប់ធ្វើសកម្មភាព។ ជនសង្ស័យ និងវត្ថុងសមត្ថកិច្ចបាន និងធ្វើការសាកសួរ ដើម្បីកសាងសំណុំរឿងតាមនីតិវិធី៕
ចែករំលែកព័តមាននេះ