ខេត្តបាត់ដំបង ៖ សមត្ថកិច្ចបានឲ្យដឹងថា ក្នុងរយៈពេល២ថ្ងៃ គ្រោះថ្នាក់ចរាចរណ៍បានកើតឡើង២លើកបណ្ដាលឱ្យមនុស្ស២នាក់ស្លាប់ បង្កឡើងដោយគោយន្តកន្ត្រៃ និងរថយន្តបើកបរខ្វះការប្រុងប្រយ័ត្ន ។ នេះបើតាមសេចក្ដីរាយការណ៍របស់សមត្ថកិច្ចនៅមូលដ្ឋាន ។
សមត្ថកិច្ចបានឲ្យដឹងថា ករណីទី១ កើតឡើងនៅវេលាម៉ោង១០ និង៤០នាទីយប់ថ្ងៃទី២៤ វិច្ឆិកា នៅលើផ្លូវជាតិលេខ៥៧ ត្រង់ចំណុចភូមិដង្គត់ ឃុំស្ដៅ ស្រុករតនមណ្ឌល រវាងគោយន្តកន្ត្រៃ ជាមួយរថយន្តម៉ាកហ៊ីយ៉ាន់ដាយ ពាក់ស្លាកលេខ បាត់ដំបង2B-2234 បើកបរដោយឈ្មោះអ៊ឹម សុភ័ក្រ អាយុ៤២ឆ្នាំ នៅភូមិគីឡូ៣៨ ឃុំត្រែង ស្រុករតនមណ្ឌល ។ គោយន្តកន្ត្រៃ និងរថយន្តបានធ្វើដំណើរស្របទិសគ្នាពីកើតទៅលិច ប៉ុន្តែពេលដល់ចំណុចកើតហេតុ ស្រាប់តែអ្នកបើកគោយន្តបានបាត់ឆ្វេងដោយមិនផ្ដល់សញ្ញា ទើបត្រូវរថយន្តបុកចំពេញទំហឹង បណ្ដាលឲ្យស្លាប់អ្នកបើកគោយន្តឈ្មោះផង់ ឈឿម អាយុ៦៩ឆ្នាំ រីឯអ្នកបើករថយន្តនិងអ្នករួមដំណើរម្នាក់ទៀតរងរបួសស្រាល។
ករណីទី២-បើតាមសេចក្ដីរាយការណ៍បានឲ្យដឹងថា បានកើតឡើងនៅវេលាម៉ោង៤ និង១០នាទីរសៀល
ថ្ងៃទី២៥ វិច្ឆិកា នៅលើផ្លូវជាតិលេខ៥ ត្រង់ចំណុចភូមិស្ទឹងចក ឃុំព្រៃតូច ស្រុកមោងប្ញស្សី រវាងគោយន្តកន្ត្រៃជាមួយរថយន្តដូចគ្នាដែរ ។
ករណីនេះ គោយន្តកន្ត្រៃនោះដឹកក្រាក់ ហើយបានធ្វើដំណើរបញ្ច្រ្ចាស់ទិសគ្នាជាមួយរថយន្តម៉ាកឡិចស៊ីសRx 300 ពណ៏ទឹកមាស ពាក់ស្លាកលេខ ភ្នំពេញ 2AH-9143 អ្នកបើកបរបានរត់ចោលរថយន្តក្រោយគ្រោះថ្នាក់ ។ សមត្ថកិច្ចបានបញ្ជាក់ថា ពេលបើកដល់ចំណុចកើតហេតុ ស្រាប់តែគោយន្តកន្ត្រៃ បានដាច់កង់ខាងឆ្វេង ទើបរេចង្កូតឆ្លងថ្នល់ជ្រុលទៅបុករថយន្តទាំងកំរោល បណ្ដាលឲ្យអ្នកបើកគោយន្តស្លាប់នៅកន្លែង តែគេមិនទាន់ស្គាល់ឈ្មោះ រីឯរថយន្តខូចខាតយ៉ាងដំណំ តែម្ចាស់បានរត៉គេចខ្លួនពេលឃើញមានមនុស្សស្លាប់។
ចែករំលែកព័តមាននេះ