\ខេត្តពោធិ៍សាត់ ៖ តាមសេចក្តីរាយការណ៍បឋមបានឲ្យដឹងថា ករណីនេះចាត់ទុកថា ជាសំណាងមួយដែលក្មេងប្រុសតូចៗពីរនាក់បងប្អូនអំបែងមុតសុសសាច់ គ្រាន់តែរងរបួសមិនស្លាប់ ខណៈពេលដែលរើសបានគីបគ្រាប់បែក យកទៅលេងបណ្ដាលឲ្យផ្ទុះ ។ ករណីនេះបានកើតឡើង កាលវេលាម៉ោង១១និង៤០នាទីថ្ងៃត្រង់ ថ្ងៃទី២៣ ខែវិច្ឆិកា ឆ្នាំ២០១៨ នៅភូមិថ្មី ឃុំស្នាអន្សារ ស្រុកក្រគរ ។
សមត្ថកិច្ចឲ្យដឹងថា ក្មេងប្រុសរងគ្រោះ១- ឈ្មោះ ហេង ផាន់ណា អាយុ១០ឆ្នាំ និង២- ឈ្មោះ ហេង ផាន់នី អាយុ០៤ឆ្នាំ ជាបងប្អូនបង្កើតនឹងគ្នា រស់នៅក្នុងបន្ទុកជាមួយឪពុកម្ដាយ ស្ថិតក្នុងភូមិឃុំកើតហេតុខាងលើ ។ទាក់ទិននឹងករណីនេះ សមត្ថកិច្ចឲ្យដឹងថា នៅថ្ងៃនោះក្មេងប្រុសជាប្អូនរើសបានគីបគ្រាប់បែកពីក្នុងគំនរសំរាមខាងត្បូងផ្ទះ ហើយបានយកមកឲ្យក្មេងប្រុសដែលត្រូវជាបង ។ ក្មេងប្រុសបងបានគ្រាប់គីបនេះភ្លាមក៏យកមកធ្វើជាឧបករណ៍លេង ។
ដោយមានការងឿងឆ្ងល់ក្មេងប្រុសរូបនេះបានដកកន្លុះស្លាបព្រាចេញក៏បណ្ដាលឲ្យផ្ទុះមុតសុសសាច់ទាំងពីរនាក់បងប្អូន ប៉ុន្តែគ្រាន់តែរបួសប៉ុណ្ណោះមិនស្លាប់នោះទេ ។ ក្មេងរងគ្រោះទាំងពីរនាក់កំពុងសម្រាកព្យាបាលនៅក្នុងមន្ទីរពេទ្យបង្អែកខេត្តផងសដែរ ៕
ចែករំលែកព័តមាននេះ