ខេត្តមណ្ឌលគិរី ៖ ក្នុងរយៈពេល៣ថ្ងៃត្រូវនឹងថ្ងៃទី២១-២២-២៣ ខែវិច្ឆិកា ឆ្នាំ២០១៨ ក្នុងព្រះរាជពិធីបុណ្យអុំទូកបណ្តែតប្រទីប និងសំពះព្រះខែអកអំបុកមានភ្ញៀវទេសចរដែលមកទស្សនាក្នុងខេត្តមណ្ឌលគិរីសរុប២២៦៤១នាក់ ក្នុងនោះទេសចរជាតិចំនួន ២២២៣៣នាក់ ទេសចរអន្តរជាតិចំនួន៤០៨នាក់…
ខេត្តមណ្ឌលគិរី ៖ ក្នុងរយៈពេល៣ថ្ងៃត្រូវនឹងថ្ងៃទី២១-២២-២៣ ខែវិច្ឆិកា ឆ្នាំ២០១៨ ក្នុងព្រះរាជពិធីបុណ្យអុំទូកបណ្តែតប្រទីប និងសំពះព្រះខែអកអំបុកមានភ្ញៀវទេសចរដែលមកទស្សនាក្នុងខេត្តមណ្ឌលគិរីសរុប២២៦៤១នាក់ ក្នុងនោះទេសចរជាតិចំនួន ២២២៣៣នាក់ ទេសចរអន្តរជាតិចំនួន៤០៨នាក់ ។
បើប្រៀបធៀបនឹងព្រះរាជពិធីបុណ្យអុំទូកបណ្តែតប្រទីប និងសំពះព្រះខែអកអំបុក ឆ្នាំ២០១៧ សរុបចំនួន១៣.៧៧២នាក់ ក្នុងនោះទេសចរជាតិ១៣៤៧៦នាក់ ទេសចរអន្តរជាតិ២៩៦នាក់ កើនសរុប៦៤,៣៩% ទេសចរជាតិកើន ៦៤,៩៨នាក់ ទេសចរអន្តរជាតិកើន៣៧,៨៣% ។
តាមការបញ្ជាក់របស់ប្រធានមន្ទីរទេសចរខេត្តមណ្ឌលគិរី លោក ងិន សុវិមាន បានឲ្យដឹងថា កត្តា៦យ៉ាងដែលធ្វើឲ្យមានលំហូរចូលភ្ញៀវទេសចរជាតិ អន្តរជាតិ អញ្ជើញមកទស្សនាកម្សាន្តនៅខេត្តមណ្ឌលគិរីនាឱកាសពិធីបុណ្យធំៗ ជាពិសេសនាឱកាសព្រះរាជពិធីបុណ្យអុំទូក បណ្តែតប្រទីប និងសំពះព្រះខែអកអំបុក ក្នុងឆ្នាំ២០១៨នេះ ទី១- កត្តាសក្តានុពលទេសចរ រមណីយដ្ឋាន សណ្ឋាគារ ផ្ទះសំណាក់ អាចទ្រទ្រង់ភ្ញៀវទេសចរ និងមានតំបន់រមណីយដ្ឋានជាច្រើនកន្លែង ជាពិសេសរមណីយដ្ឋានទឹកជ្រោះប៊ូស្រា ដែលអាចទាក់ទាញភ្ញៀវទេសចរចូលទស្សនាកម្សាន្តច្រើនជាងគេ ទី២- មន្ទីរទេសចរខេត្តបានធ្វើការផ្សព្វផ្សាយបានទូលំទូលាយនូវសកត្តានុពលអេកូទេសចរក្នុងខេត្តជូនដល់គ្រប់មជ្ឍដ្ឋានទាំងក្នុង និងក្រៅប្រទេស ទី៣- កត្តាហេដ្ឋារចនាសម្ព័ន្ធគមនាគមន៍បានតភ្ជាប់ពីស្រុកស្នូលខេត្តក្រចេះ មកខេត្តមណ្ឌលគិរី មានភាពងាយស្រួល ។ ទី៤ – កត្តាអាកាសធាតុត្រជាក់លើភ្នំគ្រប់ដណ្តប់ដោយវាលស្មៅ ជ្រោះជ្រលងដងអូរ និងមានធម្មជាតិដ៏ស្រស់បំព្រង ។ ទី៥- កត្តាសន្តិសុខសុវត្ថិភាពល្អប្រសើរ ។ និងទី៦- កត្តាសេដ្ឋកិច្ច ប្រជាពលរដ្ឋមានជីវភាពធូរធារ ។
កត្តាទាំងនេះ ទើបធ្វើឱ្យវិស័យទេសចរក្នុងខេត្តមណ្ឌលគិរីមានការរីកចម្រើន ជាពិសេសបានចូលរួមចំណែក ជួយកាត់បន្ថយ ភាពក្រីក្រជូនប្រជាពលរដ្ឋពីរមួយឆ្នាំទៅមួយឆ្នាំ។
លោក ងិន សុវិមាន បានបន្តទៀតថា ភ្ញៀវទេសចរមានចំនួនច្រើន ដែលធ្វើឲ្យចំនួនបន្ទប់នៅតាមផ្ទះសំណាក់ សណ្ឋាគារ មិនគ្រប់គ្រាន់ រហូតដល់ភ្ញៀវមួយចំនួនបាននាំគ្នាបោះតង់សម្រាកនៅតាមភ្នំវាលស្មៅ និងតាមផ្ទះបងប្អូនប្រជាពលរដ្ឋផងដែរ ។ ហើយពាក់ព័ន្ធនឹងសេវាកម្មម្ហូបអាហារនៅតាមរមណីយដ្ឋាន សណ្ឋគារ ផ្ទះសំណាក់ អាជីវករមានការតម្លៃថ្លៃតិចតួចដែលអាចឲ្យភ្ញៀវទទួលយកបាន ។
លោកប្រធានមន្ទីរទេសចរខេត្តបានអំពាវនាវដល់អាជីវករ និងអ្នកវិនិយោគលើវិស័យអេកូទេសចរទាំងអស់ឲ្យចូលរួមវិនិយោគលើតំបន់ទេសចរបន្ថែមទៀត ព្រោះបច្ចុប្បន្នខេត្តមណ្ឌលគិរីមានរមណីយដ្ឋានតំបន់ទេសចរជាច្រើនកន្លែង ប៉ុន្តែមិនទាន់ធ្វើការវិនិយោគ ។
ជាងនេះទៅទៀត លោក ងិន សុវិមាន លោកប្រធានមន្ទីរទេសចរខេត្តបានណែនាំដល់អាជីវករទាំងអស់ត្រូវខិតខំកែលំអរសេវាកម្មនៅតាមរមណីយដ្ឋាន សណ្ឋាគារ ផ្ទះសំណាក់ ធ្វើយ៉ាងណាឱ្យមានអនាម័យ តម្លៃសមរម្យ ហើយក៏សូមឲ្យប្រជាពលរដ្ឋក្នុងខេត្ត និងភ្ញៀវទេសចរទាំងអស់ដែលមកទស្សនាកម្សាន្តនៅខេត្តមណ្ឌលគិរីត្រូវចូលរួមសំអាតអនាម័យ ព្រោះបរិស្ថានស្អាត ផ្តើមចេញេពីយើងទាំងអស់គ្នា ៕
ចែករំលែកព័តមាននេះ