ខេត្តកណ្ដាល ៖ មុខសញ្ញាចែកចាយគ្រឿងញៀនយ៉ាងសកម្មប្រចាំស្រុកស្អាងមានងារថា អាបារាំងដែលធ្វើឲ្យប្រជាពលរដ្ឋចំនួនបីឃុំ គឺឃុំប្រាសាទ ឃុំត្រើយស្លា និងឃុំតាលុន ពិបាកចិត្ត ដោយសារពួកវាតែងតែចរាចរណ៍គ្រឿងញៀនទាំងយប់ទាំងថ្ងៃនោះត្រូវបាននគរបាលស្រុកស្អាងធ្វើការបង្ក្រាបបានពីរនាក់ ហេតុការណ៍នេះបានកើតឡើងនៅវេលាម៉ោង១៥និង៣៥នាទីថ្ងៃទី២៣…
ខេត្តកណ្ដាល ៖ មុខសញ្ញាចែកចាយគ្រឿងញៀនយ៉ាងសកម្មប្រចាំស្រុកស្អាងមានងារថា អាបារាំងដែលធ្វើឲ្យប្រជាពលរដ្ឋចំនួនបីឃុំ គឺឃុំប្រាសាទ ឃុំត្រើយស្លា និងឃុំតាលុន ពិបាកចិត្ត ដោយសារពួកវាតែងតែចរាចរណ៍គ្រឿងញៀនទាំងយប់ទាំងថ្ងៃនោះត្រូវបាននគរបាលស្រុកស្អាងធ្វើការបង្ក្រាបបានពីរនាក់ ហេតុការណ៍នេះបានកើតឡើងនៅវេលាម៉ោង១៥និង៣៥នាទីថ្ងៃទី២៣ ខែវិច្ឆិកា ឆ្នាំ២០១៨ នៅចំណុចពាមសូរ ស្ថិតក្នុងភូមិ ទួលក្តី ឃុំត្រើយស្លា ស្រុកស្អាង ខេត្តកណ្តាល ។
លោកវរសេនីយ៍ សេង សុជាតិ អធិការនគរបាលស្រុកស្អាងបានឲ្យដឹងថា ជនសង្ស័យទី០១ឈ្មោះ សុខា ភ័ក្ត្រា ហៅបារាំង ភេទប្រុស អាយុ២៨ឆ្នាំ ជនជាតិខ្មែរ មុខរបរមិនពិតប្រាកដ ទីលំនៅបច្ចុប្បន្នភូមិទួលក្តី ឃុំត្រើយស្លា ស្រុកស្អាង ខេត្តកណ្តាល ទី០២- ឈ្មោះ រ៉ាន់ រ៉េត ភេទប្រុស អាយុ២០ឆ្នាំ ជនជាតិខ្មែរ មុខរបរមិនពិតប្រាកដ ទីលំនៅបច្ចុប្បន្នភូមិ ថ្គុល ឃុំត្រើយស្លា ស្រុកស្អាង ខេត្តកណ្តាល ។
វត្ថុតាងចាប់យករួមមានម្សៅក្រាមពណ៌សថ្លា សង្ស័យថា ជាសារធាតុញៀន (ម៉ាទឹកកក) ចំនួន០៤កញ្ចប់ ក្នុងនោះធំ០៣កញ្ចប់ និងតូច០១កញ្ចប់ ឧបករណ៍សម្រាប់វេចខ្ចប់ប្រើប្រាស់មួយចំនួន ។ លោកអធិការបានបញ្ជាក់ថា ក្រោយទទួលបានព័ត៌មានពីប្រជាពលរដ្ឋល្អថា មានករណីជួញដូរគ្រឿងញៀននៅចំណុចកើតហេតុខាងលើ ។ ភ្លាមនោះកម្លាំងផ្នែកប្រឆាំងបទល្មើសគ្រឿងញៀនសហការជាមួយកម្លាំងប៉ុស្តិ៍នគរបាលរដ្ឋបាលត្រើយស្លាបានចុះដល់ចំណុចកើតហេតុធ្វើការត្រួតពិនិត្យឈ្មោះ សុខា ភ័ក្ត្រា ហៅបារាំង និងឈ្មោះ រ៉ាន់ រ៉េត ។
ដោយមានការចូលរួមពីលោកភូមិទួលក្តីសមត្ថកិច្ចនគរបាលបានធ្វើការត្រួតពិនិត្យឆែកឆេរលំនៅដ្ឋានឈ្មោះ សុខា ភ័ក្ត្រា ហៅបារាំង បានរកឃើញម្សៅក្រាមពណ៌សថ្លា សង្ស័យជាសារធាតុញៀន (ម៉ាទឹកកក) ចំនួន០៤កញ្ចប់ ក្នុងនោះធំ០៣កញ្ចប់ , តូច០១កញ្ចប់ និងសម្ភារៈសំម្រាប់វេចខ្ចប់ប្រើប្រាស់មួយចំនួន រួចឃាត់ខ្លួនជនសង្ស័យទាំងពីរនាក់រួមនឹងវត្ថុតាងបញ្ជូនមកប៉ុស្តិ៍នគរបាលរដ្ឋបាលត្រើយស្លា ដើម្បីសាកសួរ ។
នៅចំពោះមុខសមត្ថកិច្ចឈ្មោះ សុខា ភ័ក្ត្រា ហៅបារាំង បានសារភាពថា ខ្លួនបានទៅទិញគ្រឿងញៀន (ម៉ាទឹកកក) ចំនួន០១កញ្ចប់ធំ តម្លៃ២០០០០០០រៀល (ពីរលានរៀល) ពីឈ្មោះ ស្រួច ភេទប្រុស នៅស្រុកកៀនស្វាយ ខេត្តកណ្តាល និង០១កញ្ចប់ធំទិញពីឈ្មោះ ចាន់ ណាហៅជី ភេទប្រុស អាយុជាង៣០ឆ្នាំ (នៅឃុំព្រែកអំបិលស្រុកស្អាង) តម្លៃ២០០០០០០រៀល (ពីរលានរៀល) ដើម្បីយកមករំលែកលក់បន្ដក្នុង០១កញ្ចប់តូចតម្លៃ១០០,០០០រៀល (ដប់ម៉ឺនរៀល) ។
ចំណែកឈ្មោះ រ៉ាន់ រ៉េត បានសារភាពថា ខ្លួនជាអ្នកជួយចាត់ចែងលក់គ្រឿងញៀនឲ្យឈ្មោះបារាំង ។ បច្ចុប្បន្នជនសង្ស័យទាំងពីរនាក់បានឃាត់ខ្លួននៅអធិការដ្ឋាននគរបាលស្រុកស្អាងដើម្បីបន្ដអនុវត្ដតាមនីតិវីធី ៕
ចែករំលែកព័តមាននេះ