ខេត្តប៉ៃលិន ៖ កម្លាំងអាវុធហត្ថខេត្តប៉ៃលិននៅយប់ថ្ងៃទី១៨ ខែវិច្ឆិកា ឆ្នាំ២០១៨ បានចាប់ឃាត់ខ្លួនជនជាតិចិន៦នាក់ នៅក្នុងកាស៊ីណូម្កុដពេជ្រ ស្ថិតនៅចំណុចព្រំដែនកម្ពុជា-ថៃ ក្នុងភូមិផ្សារព្រំ ឃុំស្ទឹងកាច់ ស្រុកសាលាក្រៅ យកទៅសួរនាំជាង១០ម៉ោង លុះក្រោយមកទើបដោះលែងទៅវិញ ។
ពាក់ព័ន្ធនឹងការចាប់រួចដោះលែងទៅវិញនេះលោក តូច សុភក្តី ព្រះរាជអាជ្ញាខេត្តប៉ៃលិនបានអះអាងថា លោកពុំបានដឹងរឿងនេះទេដោយសារ តែខាងអាវុធហត្ថខេត្តដោះលែងទៅវិញ រួចហើយទើបរាយការណ៍ជូនលោក ។ ប៉ុន្តែមេបញ្ជាការកងរាជអាវុធហត្ថខេត្តប៉ៃលិនលោកឧត្តមសេនីយ៍ត្រី វ៉ាន់ ណាឡុង បានអះអាងថា មិនមែនជាការឃាត់ខ្លួននោះទេ គឺខាងកាស៊ីណូយកជនជាតិចិនទាំងនោះផ្ញើនឹងលោក ពាក់ព័ន្ធរឿងលេងល្បែង។
ជនជាតិចិនទាំង៦នាក់នោះរួមមានទី១- ឈ្មោះ ឈី ឡូង អាយុ៣៩ឆ្នាំ ទី២- ឈ្មោះ ឆិន ជុង អាយុ៤១ឆ្នាំ ទី៣- ឈ្មោះ ហ្វាង អ៊ីង អាយុ៤៥ឆ្នាំ ទី៤- ឈ្មោះ សាំង ឆឺ អាយុ៣៣ឆ្នាំ ទី៥- ឈ្មោះ ចាំង ហុងសាន អាយុ៤៥ឆ្នាំ និងទី៦-ឈ្មោះ អ៊ី យ៉ាមិញ អាយុ៤០ឆ្នាំ ។ ហើយខាងអាវុធហត្ថបានឃាត់ខ្លួនជនជាតិចិនសង្ស័យពាក់ព័ន្ធនឹងរឿងលុយក្នុងកាស៊ីណូជាង១០ម៉ឺនដុល្លារ តាំងពីយប់ ប៉ុន្ដែមិនបានរាយការណ៍ទៅព្រះរាជអាជ្ញាទេ លុះព្រឹកឡើងវេលាម៉ោង១០និង៣០នាទី ទើបប្រាប់ថា គ្មានពាក្យបណ្ដឹងរួចដោះលែងទៅវិញ។
បើតាមលោក តូច សុភក្តី ព្រះរាជអាជ្ញាអមសាលាដំបូងខេត្តប៉ៃលិនបានបញ្ជាក់ឱ្យដឹងថា លោកពុំបានដឹងរឿងនេះទេ ហើយលោកទើបនឹងទទួលបានដំណឹងអំពីការចាប់ខ្លួនអ្នកទាំងនោះ ស្របពេលដែលកងរាជអាវុធហត្ថធ្វើការដោះលែងទៅហើយ បើចង់ដឹងឱ្យសួរនាំទៅខាងកងរាជអាវុធហត្ថខេត្តចុះ ។
ចំណែកលោកឧត្តមសេនីយ៍ត្រី វ៉ាន់ ណាឡុង មេបញ្ជាការកងរាជអាវុធហត្ថខេត្តបានឱ្យដឹងថា ជនជាតិចិនទាំង៦នាក់ ដែលដោះលែងទៅវិញត្រូវបានគេផ្ញើទុកនៅកន្លែងរបស់លោក គឺជាបុគ្គលិករបស់កាស៊ីណូមួយដែលត្រូវបានអ្នកគ្រប់គ្រងបញ្ជូនមកអាវុធហត្ថវេលាម៉ោង៨ព្រឹក បន្ទាប់ពីសង្ស័យមានបញ្ហាលុយកាក់មួយចំនួនពាក់ព័ន្ធលែងល្បែងស៊ីសង ។ លោកបន្តទៀតថា រហូតដល់វេលាម៉ោង១០ព្រឹកថ្ងៃដដែលដោយសារតែគ្មានពាក្យបណ្តឹងគ្រប់គ្រាន់ គឺគេគ្រាន់តែផ្ញើប៉ុណ្ណោះ លោកក៏បានដោះលែងឱ្យត្រឡប់ទៅផ្ទះវិញ ៕
ចែករំលែកព័តមាននេះ