រាជធានីភ្នំពេញ ៖ រហូតមកទល់ពេលនេះអាការៈជំងឺរបស់អ្នកគ្រូ គង់ ណារី សាស្ត្រាចារ្យខាងជំនាញសិល្បៈផ្នែកច្រៀង ស្មូត្រ និងពិធីករនៅតែប្រឈមខ្លាំងណាស់។ អ្នកគ្រូកាន់តែធ្ងន់ទៅៗ ដោយមិនដឹងថា…
រាជធានីភ្នំពេញ ៖ រហូតមកទល់ពេលនេះអាការៈជំងឺរបស់អ្នកគ្រូ គង់ ណារី សាស្ត្រាចារ្យខាងជំនាញសិល្បៈផ្នែកច្រៀង ស្មូត្រ និងពិធីករនៅតែប្រឈមខ្លាំងណាស់។ អ្នកគ្រូកាន់តែធ្ងន់ទៅៗ ដោយមិនដឹងថា ស្ថានការណ៍ទៅមុខទៀតយ៉ាងណា។ មានតែរំពឹងលើបារមីវត្ថុសាកសិទ្ធិជួយឃុំគ្រងឲ្យអ្នកគ្រូបន្តមានកម្លាំងទៅមុខទៀត។
តាមរយៈដំណឹងនេះសូមអំពាវនាវដល់សិល្បករទាំងទទួលជ្រាបសារជាថ្មី ហើយអាចមកសួរសុខទុក្ខអ្នកគ្រូនៅមន្ទីរពេទ្យលោកសង្ឃ។ អ្នកគ្រូត្រូវបានគេអះអាងថា បានបញ្ជូនទៅសង្គ្រោះបន្ទាន់ក្នុងមន្ទីរពេទ្យព្រះកុសមៈ (ពេទ្យលោកសង្ឃ) ដោយប្រភពជិតស្និទ្ធបានសម្ដែងការបារម្ភយ៉ាងខ្លាំង បន្ទាប់ពីពេទ្យជំនាញប្រកាសថា អស់សង្ឃឹម។
លោក សន សុវណ្ណារ៉ា ពិធីករ និងជាកូនសិស្សជំនិតរបស់អ្នកគ្រូ បានថ្លែងបញ្ជាក់ថា អ្នកគ្រូត្រូវបានដឹកយកទៅសង្គ្រោះបន្ទាន់ជាថ្មីកាលពីល្ងាចថ្ងៃទី២៣ វិច្ឆិកា ដោយក្រោយដាក់បញ្ចូលអុកស៊ីហ្សែន និងត្រូវបានសង្គ្រោះ ហើយគ្រូពេទ្យបញ្ជាក់ថា អ្នកគ្រូ គង់ ណារី ឈានដល់ដំណាក់គួរឲ្យបារម្ភយ៉ាងខ្លាំង ដោយសារតែប្រព័ន្ធសរីរាង្គខាងក្នុងរបស់អ្នកគ្រូត្រូវបានដុំសាច់ដែលបង្កឲ្យក្រិនថ្លើមស៊ីប្រព័ន្ធភាពស៊ាំស្ទើរអស់ទៅហើយ។
លោកថា លោកពេទ្យបានត្រឹមតែសន្និដ្ឋានថា អ្នកគ្រូពិបាកព្យាបាល និងអស់សង្ឃឹមប៉ុណ្ណោះ ខណៈដែលអ្នកគ្រូក៏មិនមានកូនចៅចេញមុខជំហរ ដើម្បីស្វះស្វែងរកផ្លូវបានចេញទៅព្យាបាលនៅក្រៅប្រទេស។
លោក សន សុវណ្ណារ៉ា និយាយថា ជំងឺរបស់អ្នកគ្រូ គង់ ណារី កើតមានជំងឺជាយូរឆ្នាំមកហើយ ប៉ុន្តែអាចមកពីអ្នកគ្រូមិនមានកូនចៅ ហើយការតាមដានសុខភាពក៏មិនមានបម្រុងប្រយ័ត្នក្នុងពេលដំបូងៗ ទើបជំងឺដែលបង្កឡើងកើតជាក្រិនថ្លើម និងមានទឹកក្នុងថ្លើម ដោយក្នុងពេលសង្គ្រោះបន្ទាន់ គឺអ្នកគ្រូមានសភាពធ្លាក់ឈាម និងមានបញ្ហាសុខភាពធ្ងន់ធ្ងរ។
លោកថ្លែងយ៉ាងខ្លីថា នៅក្នុងពេលនេះ សាច់ញាតិរបស់អ្នកគ្រូបានទទួលយកលទ្ធផលដែលបានស្ដែងឡើងហើយ តែលោកក៏ទទូចសុំឲ្យមានការជួយជ្រោមជ្រែងនៅក្នុងដំណាក់កាលចុងក្រោយផងដែរ ដោយសារតែអ្នកគ្រូមិនមានកូនចៅ ខុសពីអ្នកសិល្បៈល្បីឈ្មោះឯទៀត។
ចែករំលែកព័តមាននេះ