រាជធានីភ្នំពេញ ៖ តំណាងក្រុមហ៊ុនស្ថាបនាផ្លូវជាតិលេខ៣ បានបញ្ជាឲ្យកូនចៅរបស់ខ្លួនយកគ្រឿងចក្រចំនួន២គ្រឿងទៅវាយកម្ទេចជើងទេរសំណង់ទ្វារទឹក៧មករា បណ្ដាលឲ្យរងការខូចខាតយ៉ាងដំណំ។
ការបំផ្លាញសម្បត្តិរដ្ឋខាងលើនេះ នៅមិនទាន់ដឹងពីមូលហេតុ និងបំណងរបស់ប្រធានក្រុមហ៊ុនមួយនេះនៅឡើយទេ ប៉ុន្តែភ្លាមៗនោះសកម្មភាពខាងលើត្រូវបានទប់ស្កាត់ដោយក្រុមមន្ត្រីក្រសួងធនធានទឹកដែលប្រចាំការនៅទីនោះ ព្រមទាំងបានធ្វើការឃាត់ខ្លួនបុរស២នាក់ដែលជាអ្នកបើកបរគ្រឿងចក្រ(អេស្កាវ៉ាទ័រ) ព្រមទាំងធ្វើការដកហូតអេស្កាវ៉ាទ័រចំនួន២គ្រឿងផងដែរ។
សំណង់ទ្វារទឹក៧មករា គឺជាសំណង់ដ៏រឹងមាំនិងជាផ្លូវទឹកដ៏សំខាន់មួយដែលកសាងឡើងកាលពីជាង១០ឆ្នាំមុន ហើយមានទីតាំងស្ថិតនៅតាមផ្លូវជាតិលេខ៣ ព្រំប្រទល់រវាងឃុំដើមឫស ស្រុកកណ្តាលស្ទឹង ខេត្តកណ្តាល និងសង្កាត់ក្រាំងពង្រ ខណ្ឌដង្កោ រាជធានីភ្នំពេញ ហើយត្រូវបានបំផ្លាញកាលពីវម៉ោងប្រហែល២រសៀល ថ្ងៃទី២៤ ខែវិច្ឆិកា ឆ្នាំ២០១៨ បណ្ដាលឲ្យរងកាខូចខាត១ប្រឡោះ រួមជាមួយនឹងធ្នឹមចំនួន៤ដែលមានប្រវែងសរុបប្រហែល៨ម៉ែត្រ។
បុរសដែលត្រូវឃាត់ខ្លួនទាំង២នាក់នោះម្នាក់ឈ្មោះ ម៉េង ឡូ គឺជាអ្នកបើកបរគ្រឿងចក្រម៉ាក Suny និងម្នាក់ទៀតឈ្មោះវង់ រដ្ឋា គឺជាអ្នកបើបរគ្រឿងចក្រ១គ្រឿងទៀតម៉ាក Sunward ។ ចំណែកឯគ្រឿងចក្រទាំង២គ្រឿងខាងលើ ក៏ត្រូវបានដកហូតជាបណ្ដោះអាសន្នផងដែរ។
ហើយក្រោយពេលឃាត់ខ្លួនភ្លាមៗអ្នកទាំងបានប្រាប់មន្ត្រីក្រសួងធនធានទឹកថា ប្រធានក្រុមហ៊ុនស្ថាបនាផ្លូវជាតិលេខ៣ បញ្ជាឲ្យកាយ ប៉ុន្តែពួកគេមិនទាន់ប្រាប់ថា ក្រុមហ៊ុនស្ថាបនាផ្លូវនិងតំណាងក្រុមហ៊ុនដែលជាអ្នកបញ្ជានេះឈ្មោះអ្វី ហើយមានបំណងអ្វីនៅឡើយ។
ព័ត៌មានពិស្តារបន្តនឹងមានផ្សាយនៅលើកាសែតកោះសន្តិភាព
ចែករំលែកព័តមាននេះ