រាជធានីភ្នំពេញ៖ ព្រះរាជពិធីបុណ្យអុំទូករយៈពេល៣ថ្ងៃបានបញ្ចប់ ប៉ុន្តែចុងក្រោយបានបន្សល់ទុកនូវបរិមាណសំរាមជាង៨ពាន់តោន ជាពិសេសនៅតំបន់ខណ្ឌទាំង៤ដែលជាទីតាំងប្រារព្ធពិធីតែត្រូវបានរដ្ឋបាលរាជធានីភ្នំពេញ សម្អាត និងប្រមូល ដឹកយកទៅចាក់ចោលនៅទីលានចាក់សំរាមភ្លាមៗតែម្តង ។ នេះបើតាមការអះអាងរបស់មន្ត្រីទីចាត់ការគ្រប់គ្រងសំណល់រាជធានីភ្នំពេញ ។
ជាក់ស្ដែងនៅព្រឹកថ្ងៃទី២៤ ខែវិច្ឆិកា ឆ្នាំ២០១៨ រដ្ឋបាលរាជធានីភ្នំពេញដោយមានការចូលរួមពីមន្ត្រីមន្ទីរសាធារណការ និងដឹកជញ្ជូនរាជធានីភ្នំពេញ, អាជ្ញាធរដែនដីខណ្ឌពាក់ព័ន្ធ, ក្រុមកាយរិទ្ធិ, ក្រុមយុវជន, មន្ទីរជុំវិញរដ្ឋបាលរាជធានីភ្នំពេញ, កងរាជអាវុធហត្ថខណ្ឌដូនពេញ, ក្រុមហ៊ុនស៊ីនទ្រី ដែលដឹកនាំធ្វើសកម្មភាពដោយ លោក ហួត ហៃ អភិបាលរងរាជធានីភ្នំពេញ បានចូលរួមបោសសំរាម និងលាងសំអាតតាមសួនច្បារនានា ជាពិសេសសួនច្បារមុខវត្តបទុមវត្តី, សួនវិមានឯករាជ្យ នាគបាញ់ទឹក, សួនមុខព្រះបរមរាជវាំង, សួនសម្តេចតេជោ ហ៊ុន សែន និងសួនមាត់ទន្លេជាដើម ដើម្បីលើកកំពស់សោភណ្ឌភាពតាមសួនច្បារ ទីរមណីយដ្ឋាននានាឡើងវិញក្រោយព្រះរាជពិធីបុណ្យអុំទូកបានបញ្ចប់ ។
លោកសាំ ពិសិដ្ឋ នាយកមន្ទីរសាធារណការ និងដឹកជញ្ជូនរាជធានីភ្នំពេញបានឲ្យដឹងថា បុណ្យអុំទូកឆ្នាំនេះ សួនច្បារក្នុងរាជធានីភ្នំពេញ មិនមានការខូចខាតអ្វីធំដុំនោះទេ ។
លោកបន្តថា តាមសួនច្បារនានាត្រូវបាន អង្គភាពសួនច្បារ ចងខ្សែព័ន្ធហាមមិនឲ្យមានការលក់ដូរលើសួន ឬដើរជាន់ស្មៅ និងផ្កាឡើយ ប៉ុន្តែទោះជាយ៉ាងណាសូនស្នៅ និងផ្កាមួយចំនួននឹងមានភាពស្រស់បំព្រងឡើងវិញក្នុងពេលឆាប់ៗនេះ ។
ទាក់ទិន្នទៅនឹងជនអនាថា និងអ្នកសុំទានវិញ លោកស្រី មុំ ចាន់ដានី ប្រធានមន្ទីរសង្គមកិច្ច អតីតយុទ្ធជន និងយុវនិតិសម្បទា រាជធានីភ្នំពេញ បានឲ្យដឹងថា ដើម្បីចូលរួមអបអរសារទក្នុងព្រះរាជពិធីអំទូក អកអំបុក សំពះព្រះនិងបណ្ដែតប្រទីតរយៈពេលបីថ្ងៃ មន្ត្រីនៃមន្ទីរសង្គមកិច្ច បានចូលរួមសហការជាមួយសម្ថកិច្ច ក្នុងការចុះ អបរំផ្សព្វផ្សាយអំពីគ្រោះថ្នាក់ផ្សេងៗជាយថា ហេតុ សង្គ្រាះ,ទទួល, ប្រមូល, បងប្អូនជនអនាថានិងកុមារសុំទាន ដើម្បីបង្កាទប់ស្កាត់ ការជួញដូរកំលាំងកុមារ ជនងាយរងគ្រោះ ជនរងគ្រោះពីសំណាក់ មេខ្យល់ ដែលនៅពីក្រោយខ្នងក្នុងការញុះញុងឲ្យពួកគេដើរសុំទានដែលនឹងងាយរងគ្រោះថ្នាក់ផ្សេង បាត់ឱកាស ក្នុងការផ្ដើមមុខរបរ ដោយការទទួលយកជំនាញវិជ្ជាជីវះ ធ្វើឲ្យពួកគេចំណាកស្រុកទាំងប្រថុយប្រថាន ព្រមទាំងធ្វើឲ្យប៉ះពាល់ដល់សណ្នាប់ធ្នាប់សាធារណៈផងដែរ ។
លោកស្រីបានបន្តថា នៅក្នុងរយៈពេលបីថ្ងៃនៃព្រះរាជពិធី មន្ត្រីភ្នាក់ងារសង្គមកិច្ច បានបែងចែកជា៣ក្រុម ដើម្បីធ្វើការអប់រំ ណែនាំឲ្យគាត់ឈប់ដើរសុំទាន និងមិនត្រូវចាញ់បោកអ្នកនៅពីក្រោយខ្នងដែលកេងប្រវញ្ញ័កំលាំងពលកម្មដូចមុនទៀតឡើយ ។
លោកស្រី មុំ ចាន់ដានី បានបញ្ជាក់ថា ក្នុងរយៈពេល៣ថ្ងៃ មន្ទីរបានទទួលជនអនាថា ជនវិកលចរិក ជនញៀនគ្រឿងញៀន ចំនួន៧១នាក់ ក្នុងនោះ ស្ត្រី៦នាក់ កុមារ២នាក់ ទារក១នាក់ និងអ្នកប្រើប្រាស់គ្រឿងញៀនចំនួន៥៧នាក់ ដើម្បីបង្កាទប់ស្កាត់ ការជួញដូរកំលាំងកុមារ ជនងាយរងគ្រោះ ជនរងគ្រោះពីសំណាក់ មេខ្យល់ និងឲ្យពួកគាត់កែប្រខ្លួន ចាប់យកមុខរបរ ដោយការទទួលយកជំនាញវិជ្ជាជីវះត្រឹមត្រូវ ៕
ចែករំលែកព័តមាននេះ