ខេត្តកំពង់ឆ្នាំង ៖ ប្រជាពលរដ្ឋស្ថិតនៅក្នុងឃុំជ្រៃបាក់ ស្រុករលាប្អៀរ កំពុងតែមានការព្រួយបារម្ភជាខ្លាំង ដោយសារតែមុខរបរផលិតស្មូនឆ្នាំងរបស់គាត់អាចនឹងត្រូវបញ្ចប់ ព្រោះតែទីកន្លែងដែលធ្លាប់យកដីមកផលិត ត្រូវបានគេហាមឃាត់មិនអោយចូលយកដីទៀត ដោយសារតែមានអ្នកទិញកាន់កាប់ដោយក្រុមហ៊ុនចិន ។
បងប្អូនពលរដ្ឋទាំងនោះបាននិយាយឱ្យដឹងថា ក្នុងឃុំជ្រៃបាក់មានប្រមាណ១០ភូមិ គឺភូមិបាញ់ឆ្គោល, ភូមិត្រពាំងអន, ភូមិឃ្លៃ, ភូមិអាឡែង, ភូមិត្រពាំងគរ, ភូមិព្រះរាមរង្សី, ភូមិអូររោង, ភូមិអូរកំណប់, ភូមិព្រៃពួច, និងភូមិអូរកណ្តោលជាដើម គឺសុទ្ធតែមានអ្នកប្រកបមុខរបរធ្វើក្អមឆ្នាំងតាំងពីដូនតាមក។ ហើយទីកន្លែងដែលគាត់យកដី គឺជាដីសាធារណៈ មិនដែលមាននរណាហាមឃាត់ឡើយ។
ប៉ុន្តែថ្មីៗនេះ គឺកាលពីថ្ងៃទី១៦ វិច្ឆិកា ទីកន្លែងដែលគាត់ធ្លាប់ទៅកាប់យកដី ត្រូវបានគេហាមឃាត់មិនឱ្យចូលទៀតឡើយ ដោយគេប្រាប់ថា មានក្រុមហ៊ុនចិនបានទិញអស់ហើយ និងបានជីកប្រឡាយព័ទ្ធមិនឲ្យគោយន្ត ឬរទេះគោចូលបានទៀត ។ មេការនៅទីនោះក៏បានប្រើសម្តីប្រមាថមើលងាយថា «បើអ្នកណានៅតែហ៊ានចូល គេនឹងបាញ់ចោលទៀតផង» ។
ពួកគាត់បន្តថា ចំណាស់នេះឡើងអាយុ60-70ឆ្នាំទៅហើយ បើអត់មុខរបរធ្វើក្អមឆ្នាំងទេ នឹងដាច់ពោះស្លាប់ជាពុំខាន ហេតុនេះហើយពួកគាត់ សូមសំណូមពរដល់អាជ្ញាធរ ខេត្ត ពិសេស សម្តេច តេជោហ៊ុន សែន សួមមេត្តាជួយពួកគាត់ផង ។
ជុំវិញបញ្ហានេះ លោក តាំង ប៊ុនទត មេឃុំជ្រៃបាក់ បានប្រាប់តាមទូរស័ព្ទថា រឿងនេះកាលពីប៉ុន្មានថ្ងៃ
មុន លោកបានទៅមើលដល់កន្លែងកើតហេតុជាមួយប្រជាពលរដ្ឋឃើញថា ពិតជាត្រូវបានខាងភាគីអ្នកទិញជីកប្រឡាយមិនឲ្យចូលជីកយកដីនៅទីនោះពិតមែន ហើយរឿងនោះលោកបានដឹងថា នៅក្នុងអំឡុងឆ្នាំ 2005 មានប្រជាពលរដ្ឋ បានលក់ដី ទាំងនោះទៅអោយគេ ដោយមានការទទួលស្គាល់ទិញ
លក់ ពីអាជ្ញាធរភូមិឃុំចាស់ លុះក្រោយមកនៅឆ្នាំ២០១៧ អ្នកទិញនោះបានលក់បន្ត ទៅឲ្យស្ត្រីឈ្មោះអ៊ិត ដានី ហើយនៅឆ្នាំ២០១៨ ឈ្មោះ អ៊ិត ដានី បានលក់បន្តទៅអោយឈ្មោះ តាំង ឆេងអ័រ ដែលជាជនជាតិ
ចិន ទើបត្រូវបានក្រុមហ៊ុនចិនហាមមិនឲ្យប្រជាពលរដ្ឋចូលទៅជីកដីនោះ ។
លោកបន្តថា ដីនោះមានចំនួន៥៩ហិកតា ពេលនេះកំពុងធ្វើលិខិតស្នើសុំឲ្យខាងមន្ទីរដែនដី នគរូបនីយកម្ម ធ្វើការវាស់វែងទុកដីចំនួន ៧ ហិកតា ដើម្បីសម្រាប់ទុកអោយប្រជាពលរដ្ឋ ចូលកាប់យកដីនៅទីនោះមកធ្វើក្អមឆ្នាំង ចិញ្ជឹមជីវិត ប៉ុន្តែលទ្ធផលយ៉ាងណាលោកមិនទាន់ដឹងនៅឡើយទេ កំពុងរត់ការនៅឡើយ ។
ម្យ៉ាងវិញទៀតក្រុមហ៊ុនចិន ដែលទិញដីនោះមិនទាន់មានច្បាប់ មានប្លង់ដីត្រឹមត្រូវនៅឡើយដែរ អាចអោយប្រជាពលរដ្ឋ ចូលកាប់យកដីនោះបាន ។ យ៉ាងនេះក្តីប្រជាពលរដ្ឋបញ្ជាក់ថា លោកមេឃុំបានត្រឹមតែថា ឱ្យរួចពីមាត់ គ្មានប្រជាពលរដ្ឋណា អាចទៅកាប់យកដីនៅទីនោះបានឡើយ ៕
ចែករំលែកព័តមាននេះ