ខេត្តប៉ៃលិន ៖ ស្ត្រីម្នាក់បានបាត់ខ្សែ.កមាសទម្ងន់៣ជី១ខ្សែពីក្នុងបន្ទប់ កាលពីម៉ោង៨និង៣០នាទីយប់ ថ្ងៃទី១៩ ខែវិច្ឆិកា ២០១៨ ក៏មកប្តឹងសមត្ថកិច្ច ដើម្បីឱ្យជួយ ។ ក្រោយមកសមត្ថកិច្ចធ្វើការស្រាវជ្រាវក៏ហៅស្ត្រីម្នាក់ទៀតមកសួរនាំ កាលពីម៉ោង៨ព្រឹក ថ្ងៃទី២០ វិច្ឆិកា ស្រាប់តែបែកធ្លាយរឿងមួយមិនគួរឱ្យជឿ ហេតុការណ៍នេះកើតឡើងនៅភូមិអូរឈើក្រំ ឃុំស្ទឹងកាច់ ស្រុកសាលាក្រៅ។
ជនរងគ្រោះខាងលើឈ្មោះ ធន ម៉ៅ ភេទស្រី អាយុ៤២ឆ្នាំ មានទីលំនៅនៅភូមិអូរឈើក្រំ ឃុំស្ទឹងកាច់ ស្រុកសាលាក្រៅ ខេត្តប៉ៃលិន ចំណែកជនសង្ស័យឈ្មោះ ឃឹម មុំ ភេទស្រី អាយុ៣៤ឆ្នាំ ដែលបច្ចុប្បន្នស្នាក់នៅទឹកដីប្រទេសថៃ។
កម្លាំងប៉ុស្តិ៍នគរបាលរដ្ឋបាលឃុំស្ទឹងកាច់បានឱ្យដឹងថា ក្រោយពីទទួលបណ្ដឹងពីជនរងគ្រោះម្នាក់មានទីលំនៅនៅភូមិអូរឈើក្រំ ពីករណីបាត់ខ្សែ.កមាសទំងន់៣ជី១ខ្សែពីក្នុងបន្ទប់ កាលពីម៉ោង៨និង៣០នាទីយប់ ថ្ងៃទី១៩ ខែវិច្ឆិកា ឆ្នាំ២០១៨ កន្លងទៅ ។ ក្រោយមកដោយមានការសង្ស័យក៏ហៅស្ត្រីម្នាក់ទៀតនោះទៅសួរនាំ ស្រាប់តែបែកធ្លាយដោយមិនគួរឱ្យជឿ កាលពីម៉ោង៨ព្រឹក ថ្ងៃទី២០ ខែវិច្ឆិកា ឆ្នាំ២០១៨។
ប្រភពព័ត៌មានបានឱ្យដឹងថា ក្រោយពីធ្វើការស៊ើបអង្កេត និងស្រាវជ្រាវយ៉ាងឆាប់រហ័សមក កម្លាំងជំនាញបានហៅឈ្មោះ ឃឹម មុំ ភេទស្រី អាយុ៣៤ឆ្នាំ មកធ្វើការសាកសួរ ។ បន្ទាប់ពីសាកសួររួចមក ជនសង្ស័យខាងលើបានសារភាពថា វត្ថុតាងដែលបានបាត់នោះខ្លួនយកទៅកប់លាក់ទុកនៅមុខផ្ទះរបស់ជនរងគ្រោះតែម្តង។
ហើយវត្ថុតាងដែលបាត់បង់ទាំងនោះមាន ទី១. ខ្សែ.កចំនួន២ខ្សែ រួមជាមួយនឹងបន្តោង១ ធ្វើពីលោហៈធាតុពណ៌លឿង២ខ្សែ ហើយខ្សែដៃ១ខ្សែធ្វើពីលោហៈធាតុពណ៌លឿង ។ បច្ចុប្បន្នវត្ថុតាង ត្រូវបានប្រគល់ម្ចាស់ដើមវិញ រីឯជនសង្ស័យត្រូវបានឃាត់ខ្លួននៅអធិការដ្ឋាននគរបាលស្រុកសាលាក្រៅ ដើម្បីចាត់ការតាមនីតិវិធីច្បាប់ ៕
ចែករំលែកព័តមាននេះ