រាជធានីភ្នំពេញ ៖ អាជ្ញាធររាជធានីភ្នំពេញ បានធ្វើពិធីសំពះព្រះខែ អកអំបុក និងសម្រក់ទាននៅរមណីយដ្ឋានវត្តភ្នំយប់ម៉ិញនេះ ស្របពេលដំណាលគ្នានឹងការប្រារព្ធពិធីសាសនានេះនៅក្នុងព្រះបរមរាជវាំង។
លោក ម៉េត មាសភក្ដី អ្នកនាំពាក្យរដ្ឋបាលសាលារាជធានីភ្នំពេញ បានឱ្យដឹងថា នៅ ម៉ោងជាង១០ ថ្ងៃទី២២ ខែវិច្ឆិកានេះ នៅរមណីយដ្ឋានវត្តភ្នំ នឹងមានការប្រារព្ធពីធីសែនសំពះព្រះខែ អកអំបុក និងសម្រក់ទាន តាមគន្លងប្រពៃណីសាសនា ដើម្បីបួងសួងសុំសេចក្ដីសុខដល់ប្រជាពលរដ្ឋ ក៏ដូចជាញ៉ាំងឱ្យព្រះរាជពិធីបុណ្យអុំទូក បណ្តែតប្រទីប អកអំបុក និងសំពះព្រះខែឆ្នាំនេះ កាន់តែមានភាពសប្បាយរីករាយបន្ថែមទៀត បន្ទាប់ពីបានធ្វើជារៀងរាល់ឆ្នាំ។
លោកតា អ៊ុន ធី ដែលមកលេងពិធីបុណ្យអុំទូក បានគាំទ្រការរៀបចំពិធីបែបសាសនានេះ ដោយលោកតាមានប្រសាសន៍ថា ជាពិធីដែលប្រជាពលរដ្ឋកម្ពុជា ធ្វើមិនដែលអាក់ខាននោះឡើយ ទាំងអ្នករស់នៅទីក្រុង និងជនបទស្រុកស្រែ។ លោកតាបញ្ជាក់ទៀតថា ការសម្រក់ទៀន គឺជាការផ្សងប្រផ្នូលទឹកភ្លៀងតាមតំបន់ ដែលជាជំនឿងតាំងពីបុរាណមក។
ទាក់ទឹងនឹងពិធីបែបជំនឿសាសនាតៗគ្នារបស់ប្រជាពលរដ្ឋកម្ពុជានេះ លោក ញៀន ភឿន ទីប្រឹក្សាគណៈកម្មាកាធិការជាតិរៀបចំបុណ្យជាតិអន្តរជាតិ និងជាអនុរដ្ឋលេខាធិការក្រសួងធម្មការ និងសាសនា មានប្រសាសន៍ថា បុណ្យប្រពៃណីអកអំបុក សំពះព្រះខែ មានប្រវត្តិជាប់ទាក់ទងយ៉ាងជិតស្និទ្ធទៅនឹងប្រវត្តិរបស់ព្រះពុទ្ធជាម្ចាស់នៃយើង និងបានជះឥទ្ធិពល និងចាក់ឫសយ៉ាងជ្រៅទៅក្នុងព្រលឹងរបស់ប្រជាជាតិទាំងមូល ដែលតែងតែគោរពបូជាដល់ព្រះសម្មាសម្ពុទ្ធជាអម្ចាស់ ជាពិសេស គឺព្រះពោធិសត្វដែលយោនយកកំណើតជាទន្សាយ បានផ្ដិតរូបព្រះឆាយយាលក្ខណ៍របស់ព្រះអង្គ និងលោកខែ ដើម្បីបានបំភ្លឺសត្វលោកតរៀងមក៕
ចែករំលែកព័តមាននេះ