រាជធានីភ្នំពេញ ៖ រដ្ឋបាលរាជធានីភ្នំពេញ បានធ្វើពិធីសូត្រមន្ត បង្សុកូល និងរាប់បាត្រព្រះសង្ឃ ទៅតាមទំនៀមទម្លាប់ប្រពៃណីសាសនា ដើម្បីឧទ្ទិសកុសលជូនដល់ជនរងគ្រោះដែលបានបាត់បង់ជីវិតគម្រប់ខួប៨ឆ្នាំ (២២វិច្ឆិកា២០១០-២២វិច្ឆិកា២០១៨) ក្នុងឧបទ្ទវហេតុរត់ជាន់គ្នាលើអតីតស្ពានពេជ្រ កាលពីយប់ថ្ងៃទី២២ វិច្ឆិកា ២០១០ ឬថ្ងៃទី៣នៃព្រះរាជពិធីបុណ្យអុំទូក។
មន្ត្រីរដ្ឋបាលរាជធានីភ្នំពេញបានឲ្យដឹងថា រដ្ឋបាលរាជធានីធ្វើការប្រារព្ធពិធីសូត្រមន្តបង្សុកូលនិងរាប់បាត្រព្រះសង្ឃដើម្បីឧទ្ទិសកុសលជូនវិញ្ញាណក្ខន្ធជនរងគ្រោះក្នុងឧបទ្ទវហេតុលើអតីតស្ពានពេជ្រនៃទីក្រុងកោះពេជ្រ ដែលប្រព្រឹត្តទៅនៅម៉ោង៧និង៣០នាទីព្រឹក ថ្ងៃទី២២ វិច្ឆិកាឆ្នាំ២០១៨ ។
ពិធីរំលឹកវិញ្ញាណក្ខន្ធនេះធ្វើនៅខាងមុខស្តូបរំលឹកវិញ្ញាណក្ខន្ធជនរងគ្រោះស្ថិតនៅជាប់ស្ពាននាគនៃតំបន់កោះពេជ្រ ជាទីដែលជនរងគ្រោះបានបាត់បង់ជីវិតកាលពី៨ឆ្នាំមុន ដោយមានការចូលរួមពីលោក ស៊ុយ សេរិទ្ធ អភិបាលរងរាជធានីភ្នំពេញ មន្ត្រីរាជការ, អាជ្ញាធរដែនដី, សាច់ញាតិក្រុមគ្រួសារបស់ជនរងគ្រោះ និងប្រជាពលរដ្ឋទៀតផងដែរ ។
គួររំលឹកថា កាលពីយប់ថ្ងៃទី២២ ខែវិច្ឆិកា ឆ្នាំ២០១០ ក្នុងព្រះរាជពិធីបុណ្យអុំទូក បណ្តែតប្រទីប អកអំបុក និងសំពះព្រះខែ មានឧបទ្ទវហេតុរត់ជាន់គ្នាបានកើតឡើងនៅលើស្ពានកោះពេជ្រ បណ្តាលឲ្យមនុស្សស្លាប់៣៥៣នាក់ និងរងរបួសជាង៤០០នាក់ផងដែរ ៕
ចែករំលែកព័តមាននេះ