ដឹងអត់! បុណ្យអុំទូកថ្ងៃទី១ នេះ មានមនុស្សប៉ុន្មានម៉ឺននាក់ចូលរួម…
- ភ្នំពេញ
រាជធានីភ្នំពេញ ៖ ព្រះរាជពិធីបុណ្យអុំទូក បណ្តែបប្រទីប សំពះព្រះខែ និងអកអំបុក ថ្ងៃទី១ ត្រូវនឹងថ្ងៃទី២១ ខែវិច្ឆិកា ឆ្នាំ២០១៨នេះ…
រាជធានីភ្នំពេញ ៖ ព្រះរាជពិធីបុណ្យអុំទូក បណ្តែបប្រទីប សំពះព្រះខែ និងអកអំបុក ថ្ងៃទី១ ត្រូវនឹងថ្ងៃទី២១ ខែវិច្ឆិកា ឆ្នាំ២០១៨នេះ ពិនិត្យជារួមសភាពការណ៍សន្តិសុខ សណ្តាប់ធ្នាប់ មានភាពល្អប្រសើរ ខណៈមានប្រជាពលរដ្ឋមកចូលរួមកំសាន្តសប្បាយប្រមាណ៦០ម៉ឺននាក់។
រីឯសភាពការណ៍បទល្មើសពុំមានអ្វីកើតឡើងគួរឱ្យកត់សម្គាល់នោះទេ ដោយក្នុងនោះកើតមានបទល្មើសដូចជា ៖ លួចកាច់សោម៉ូតូ១លើក ឃាត់ខ្លួនជនសង្ស័យម្នាក់, លិចទូក៧លើក និងបានអន្តរាគមន៍សង្គ្រោះកីឡាករអុំទូកលិចទាំង៧គ្រឿង, ផ្ទុះកំប៉ុងហ្គាស ១លើក, គ្រោះថ្នាក់ចរាចរណ៍មួយលើក និងខ្យល់គមួយលើក និងបានជួយសង្គ្រោះពិនិត្យ និងព្យាបាលជំងឺ ១.៩៧៩នាក់ (ស្រី៦៩៥នាក់), សង្គ្រោះបឋមនៅកន្លែង៣១នាក់(ស្រី១៤នាក់)
និងបញ្ជូនទៅមន្ទីរពេទ្យដើម្បីសង្គ្រោះចំនួន១នាក់, ជួយសង្គ្រោះក្មេងវង្វេងម្តាយចំនួន២នាក់, ឃាត់ជនស៊ីវិលពាក់អាវមានអក្សរ Police និងARMY ៤នាក់ មកធ្វើការអប់រំ ដកហូតអាវ និងអនុញ្ញាតឲ្យត្រលប់ទៅផ្ទះវិញ, និងពន្លត់អគ្គិភ័យតាមបណ្តាសណ្ឋាគារ ផ្ទះសំណាក់ តូបអាជីកម្មចំនួន៨១ទីតាំង ព្រមទាំងអប់រំណែនាំអាជីវកម្មកល់ដូរម្ហូបអាហារតាមស្តង់ឲ្យប្រើប្រាស់អុស-ធ្យូង ជំនួសការប្រើប្រាស់ហ្គាសកំប៉ុង។
សូមបញ្ជាក់ថា នៅក្នុងឱកាសព្រះរាជពិធីបុណ្យអុំទូក បណ្ដែតប្រទីប សំពះព្រះខែ និងអកអំបុកឆ្នាំនេះ អគ្គស្នងការដ្ឋាននគរបាលជាតិ ក្រសួងមហាផ្ទៃ បានត្រៀមកម្លាំងចម្រុះទាំងចំហរ និងសម្ងាត់ ជាងមួយម៉ឺនបីពាន់នាក់ សម្រាប់ការពារសន្តិសុខ សណ្តាប់ធ្នាប់ ខណៈទូកអុំមានការកើនឡើងរហូតដល់២៩៥ទូក និងកីឡាករជិតពីរម៉ឺននាក់។ ដោយឡែកថ្ងៃទី១ នៃព្រះរាជពិធីបុណ្យអុំទូក បណ្តែបប្រទីប សំពះព្រះខែ និងអកអំបុក មានទូកចូលរួមប្រកួតចំនួន២៩៥ទូក (ទូកអន្តរជាតិចំនួន៩៨ទូក ស្រី២ទូក)។
យ៉ាងណាក៏ដោយ កម្លាំងទាំងអស់ត្រូវត្រៀមគ្រប់ពេលវេលា ដើម្បីចេញប្រតិបត្តិការអន្តរាគមន៍បានទាន់ពេលវេលាប្រកបដោយស្មារតីទទួលខុសត្រូវខ្ពស់ ដើម្បីជួយសង្គ្រោះដល់ប្រជាពលរដ្ឋនៅពេលដែលមានបញ្ហាកើតឡើងជាយថាហេតុ៕
ចែករំលែកព័តមាននេះ