ខេត្តប៉ៃលិន ៖ រហូតមកដល់រសៀលថ្ងៃទី១៨ ខែវិច្ឆិកា ឆ្នាំ២០១៨ ទារិកាម្នាក់ទៀតអាយុទើបតែ៧ខែដែលបានរលាកទឹកក្តៅកំពុងពុះបណ្តាលឱ្យរងរបួសស្ទើររលេះរលួយគូទ និងអវយវៈភេទ បានជាសះស្បើយឡើងវិញហើយ ត្រូវបានលោកគ្រូពេទ្យនៃមន្ទីរពេទ្យបង្អែកខេត្តប៉ៃលិនឱ្យចេញទៅផ្ទះវិញហើយបន្ទាប់ពីចូលទៅសម្រាកព្យាបាលអស់រយៈពេល១អាទិត្យ ខណៈម្តាយដាក់ឱ្យវារលេងក្បែរជីដូនដោយសារជាប់រវល់ធ្វើម្ហូបអាហារ ។
លុះលោកយាយចំណាស់ភ្លេចមើលស្រាប់តែក្មេងស្រីតូចវារទៅទាញឆ្នាំងទឹកក្តៅអគ្គិសនីដែលដោតដាំនៅក្នុងផ្ទះដួលកំពប់រលាកពេញគូទតែម្តង ។ សំណាងល្អបានយកទៅសង្គ្រោះនៅមន្ទីរពេទ្យបង្អែកខេត្តប៉ៃលិនទាន់ពេល ហើយបានគ្រូពេទ្យលាងរបួស និងរុំបង់ លាបថ្នាំព្យាបាលរហូតជាសះស្បើយ ។
បើតាមការរៀបរាប់ពីស្ត្រីម្នាក់ឈ្មោះ វែង ស្រីនិច អាយុ១៩ឆ្នាំ ត្រូវជាម្តាយ មានប្តីឈ្មោះ នី យ៉ាឌី អាយុ២៨ឆ្នាំ រស់នៅភូមិព្រះពុទ្ធ ឃុំបឹងរាំង ស្រុកកំរៀង ខេត្តបាត់ដំបង បានឱ្យដឹងថា គាត់ទើបតែមានកូនស្រីម្នាក់ឈ្មោះ ឌី ស្រីម៉ី អាយុ៧ខែ ដោយកាលពីវេលាម៉ោង៤និង៣០នាទីរសៀលថ្ងៃទី១២ ខែវិច្ឆិកា ឆ្នាំ២០១៨ គាត់បានដាក់កូនស្រីរបស់ខ្លួនឱ្យវារលេងក្នុងផ្ទះទុកឱ្យម្តាយជាអ្នកមើល ។ លុះពេលគាត់កំពុងតែហាន់សាច់ជ្រូកដែលទើបទិញមកពីផ្សារជាចំរៀកតូចៗដើម្បីប្រឡាក់អំបិលចៀនហូបបាយល្ងាច ស្រាប់តែឮសម្លេងកូនស្រីរបស់ខ្លួនស្រែកយំយ៉ាងខ្លាំងរួចក៏ស្ទុះទៅមើល ។
នាងបន្តទៀតថា ពេលនោះឃើញឆ្នាំងទឹកក្តៅអគ្គិសនីកំពុងពុះហុយទ្រលោមដួលក្បែរកូនរបស់ខ្លួន ហើយហូរស្រោចពេញជើង និងគូទ ពងស្បែកអស់មួយកំណាត់ខ្លួនតែម្តង ។ ពេលនោះគាត់ក៏បានស្រែកហៅប្តី និងឱ្យអ្នកជិតខាងដឹកតាមម៉ូតូយកទៅសង្គ្រោះនៅមន្ទីរពេទ្យបង្អែកខេត្តប៉ៃលិនបានលោកគ្រូពេទ្យយកបង់កំប្រេសរុំ និងបាញ់ស្ប៉ៃជួយឱ្យស្បែកកូនស្រីរបស់ខ្លួនត្រជាក់លែងសូវយំផងដែរ ។
លើសពីនេះ ដោយសារការយកចិត្តទុកដាក់ពីសំណាក់លោកគ្រូពេទ្យនៅក្នុងមន្ទីរពេទ្យបង្អែកខេត្តប៉ៃលិនដោយលាងរបួសកូនស្រីតូចរបស់គាត់រាល់ថ្ងៃធ្វើឱ្យជាសះស្បើយឆាប់រហ័សក្នុងកំឡុងពេលតែ១អាទិត្យប៉ុណ្ណោះ ៕
ចែករំលែកព័តមាននេះ