ទីក្រុងវ៉ាស៊ីនតោន ៖ លោកប្រធានាធិបតីដូណាល់ ត្រាំ (Donald Trump) របស់សហរដ្ឋអាមេរិក បាននិយាយកាលពីថ្ងៃសុក្រសប្ដាហ៍មុននេះថា លោកប្រហែលជាមិនដាក់ពន្ធបន្ថែមលើផលិតផលនាំចូលពីប្រទេសចិនទៀតទេ បន្ទាប់ពីប្រទេសចិនផ្ញើបញ្ជីវិធានការដែលពួកគេនឹងអនុម័តដើម្បីដោះស្រាយជម្លោះពាណិជ្ជកម្មទៅកាន់សហរដ្ឋអាមេរិក ប៉ុន្តែលោកបានបន្ថែមថា លោកមិនអាចទទួលយកបានការលុបផ្នែកមួយចំនួនពីបញ្ជីនោះ ។
គួរបញ្ជាក់ដែរថា លោកប្រធានាធិបតីត្រាំបានដាក់ពន្ធលើផលិតផលចិនប្រមាណ២៥០ប៊ីលានដុល្លារទៅហើយដើម្បីបង្ខំឲ្យប្រទេសចិនកែទម្រង់គោលនយោបាយពាណិជ្ជកម្មរបស់ខ្លួន។ ប្រទេសចិនបានឆ្លើយតបវិញដោយដាក់ពន្ធលើផលិតផលនាំចូលពីសហរដ្ឋអាមេរិក ។
សហរដ្ឋអាមេរិកកំពុងតែទាមទារឲ្យប្រទេសចិនបង្កើនភាពងាយស្រួលក្នុងការចូលក្នុងទីផ្សារ និងការការ ពារសិទ្ធិកម្មសិទ្ធិបញ្ញាតឹងរ៉ឹងជាងមុនសម្រាប់ក្រុមហ៊ុនអាមេរិក ខណៈដែលកាត់បន្ថយការផ្តល់ឧបត្ថម្ភធន និងកាត់បន្ថយគម្លាតពាណិជ្ជកម្មប្រមាណ៣៧៥ប៊ីលានដុល្លារផងដែរ។
ទំនាក់ទំនងរវាងប្រទេសទាំងពីរបានកាន់តែតានតឹងឡើងក្នុងប៉ុន្មានខែថ្មីៗនេះ ហើយលោកអនុប្រធានា ធិបតី Mike Pence បាននិយាយកាលពីថ្ងៃអង្គារ៍មកថា ប្រទេសចិនត្រូវតែផ្លាស់ប្តូរអាកប្បកិរិយាដើម្បីជៀសវាងសង្គ្រាមត្រជាក់ថ្មីជាមួយនឹងអាមេរិក ។ អត្រាពន្ធលើផលិតផលចិនចំនួន២០០ប៊ីលានដុល្លារនឹងកើនឡើងពី១០%ដល់២៥% នៅថ្ងៃទី១ខែមករាខាងមុខនេះ ។
លោកប្រធានាធិបតីត្រាំបានគំរាមថា នឹងដាក់ពន្ធលើផលិតផលចិនប្រមាណ២៦៧ប៊ីលានដុល្លារដែលនៅសល់ផងដែរ ប្រសិនបើប្រទេសចិនមិនគោរពតាមការទាមទាររបស់សហរដ្ឋអាមេរិក ។ ប៉ុន្តែលោកត្រាំបានប្រាប់ដល់សារព័ត៌មានថា ៖« ពួកយើងប្រហែលជាមិនធ្វើដូច្នេះទេ។ ប្រទេសចិនចង់ព្រមព្រៀងគ្នា »។
យ៉ាងណាក្តីលោកត្រាំបានបន្ថែមថា មានចំណុចប្រមាណ៤ទៅ៥ មិនមានលើបញ្ជីទាំង ១៤២ចំណុចដែលបានផ្ញើពីប្រទេសចិនទេ ៕
ចែករំលែកព័តមាននេះ