រាជធានីភ្នំពេញ ៖ យោងតាមរបាយការណ៍ក្រសួងទេសចរណ៍កម្ពុជា បានបង្ហាញថា ក្នុងរយៈពេល៩ខែ ឬ៣ត្រីមាសដើមឆ្នាំ២០១៨នេះ កម្ពុជាទទួលបានភ្ញៀវទេសចរអន្តរជាតិមកលេងនៅតាមតំបន់រមណីយដ្ឋាននានាចំនួន ៤.៣៧៦.០៣៣នាក់ ខណៈ៣ត្រីមាសកាលពីឆ្នាំ ២០១៧…
រាជធានីភ្នំពេញ ៖ យោងតាមរបាយការណ៍ក្រសួងទេសចរណ៍កម្ពុជា បានបង្ហាញថា ក្នុងរយៈពេល៩ខែ ឬ៣ត្រីមាសដើមឆ្នាំ២០១៨នេះ កម្ពុជាទទួលបានភ្ញៀវទេសចរអន្តរជាតិមកលេងនៅតាមតំបន់រមណីយដ្ឋាននានាចំនួន ៤.៣៧៦.០៣៣នាក់ ខណៈ៣ត្រីមាសកាលពីឆ្នាំ ២០១៧ ភ្ញៀវទេសចរអន្តរជាតិមកទស្សនានៅកម្ពុជាមានចំនួន ៣.៩១២.៧៦១នាក់ កើនឡើងប្រមាណ១១,៨% ។
របាយការណ៍ដដែលបានបង្ហាញថា ក្នុងចំណោម៣ត្រីមាសនេះគេឃើញថា ត្រីមាសទី១ ទទួលបានភ្ញៀវទេសចរបរទេសច្រើនជាងគេដែលមានរហូតដល់១,៧លាននាក់ ខណៈត្រីមាសទី២ទទួលបានតិចជាងគេ គឺត្រឹមតែ១,២លាននាក់ប៉ុណ្ណោះ។ នៅក្នុងនោះដែរ គេសង្កេតឃើញថា ភ្ញៀវទេសចរជនជាតិចិនមានចំនួនដល់ទៅ១,៤លាននាក់ និងបានរួមចំណែកបាន៣២,៩%នៃទេសចរអន្តរជាតិសរុប ខណៈពេញមួយឆ្នាំ២០១៧កន្លងទៅ ភ្ញៀវទេសចរចិនមានតែជិត១លាន និងបានរួមចំណែកបាន ៣២,៩%នៃទេសចរអន្តរជាតិសរុប ។
របាយការណ៍បានបង្ហាញទៀតថា ក្នុងចំណោមភ្ញៀវទេសចរបរទេសទាំង៤,៣លាននាក់ដែលមកដល់កម្ពុជា គេសង្កេតឃើញភ្ញៀវចូលតាមច្រកអាកាសយានដ្ឋានទាំងបី មានចំនួនច្រើនជាងគេ ដែលមានរហូតដល់ ២.៩៥៨.៩២១នាក់ និងមានចំណែករហូតដល់៦៧%ឯណោះ ក្នុងនោះច្រកអាកាសយានដ្ឋានអន្តរជាតិសៀមរាបទទួលស្វាគមន៍ទេសចរអន្តរជាតិច្រើនជាងគេ មានចំនួន១.៤៣២.៤៩៩នាក់ ។ ចំណែកភ្ញៀវដែលចូលតាមច្រកព្រំដែនគោកនិងទឹក មានចំនួន ១.៤១៧.១១២នាក់ ។
តាមផែនការរបស់ក្រសួងទេសចរណ៍កម្ពុជាថា ឆ្នាំនេះរំពឹងថានឹងសម្រេចបាននូវផែនការទទួលភ្ញៀវទេសចរអន្តរជាតិ ចំនួន៦,២លាននាក់ ដែលគាំទ្រធំដោយភ្ញៀវទេសចរចិន ព្រោះទេសចរចិន បច្ចុប្បន្ននេះកំពុងឈរលំដាប់ទី១ ដែលមានចំនួនច្រើនជាងគេ ខណៈវៀតណាមឈរនៅលំដាប់ទី២ ។
រដ្ឋមន្ត្រីក្រសួងទេសចរណ៍ លោក ថោង ខុន បានលើកឡើងកន្លងមកថា ដើម្បីទាក់ទាញភ្ញៀវទេសចរបរទេសមកលេង និងស្នាក់នៅកម្ពុជាបានយូរ ក្រសួងបានស្វែងរក និងបង្កើតរមណីយដ្ឋានបន្ថែមទៀត ដូចជានៅតាមបណ្ដាកោះក្នុងប្រទេសកម្ពុជា និងរមណីយដ្ឋានធម្មជាតិ ដែលមានសក្ដានុពលជាជាដើម ក្នុងនោះខេត្តព្រះសីហនុ និងខេត្តកោះកុង គឺជាគោលដៅទេសចរណ៍តាមកោះ និងធម្មជាតិរបស់ក្រសួងផងដែរ ។ លោករដ្ឋមន្ត្រីមានប្រសាសន៍ថា ៖« ក្រសួងទេសចរណ៍ និងស្ថាប័នពាក់ព័ន្ធ បាននិងកំពុងយកចិត្តទុកដាក់លើគម្រោងអភិវឌ្ឍន៍កោះគំរូ ជាគោលដៅអេកូទេសចរណ៍លំដាប់ខ្ពស់ និងជាគោលដៅទេសចរណ៍បៃតង គ្មានថង់ប្លាស្ទិក ឲ្យបានមុនឆ្នាំ២០២០ ដោយបន្តកិច្ចខិតខំគ្រប់គ្រងឆ្នេរខ្សាច់ឲ្យបានស្អាត និងបៃតង និងខិតខំអភិវឌ្ឍន៍ឆ្នេរសមុទ្រកម្ពុជាប្រកបដោយនិរន្តរភាព » ។
លោករដ្ឋមន្ត្រីបន្ដថា កម្ពុជាក៏តែងតែរៀបចំព្រឹត្តិការណ៍ទេសចរណ៍នានា ដើម្បីឲ្យភ្ញៀវបានកម្សាន្តសប្បាយដូចជា ពិធីបុណ្យសមុទ្រ បុណ្យទន្លេ និងមហាសង្ក្រាន្ត នៅរដូវបុណ្យចូលឆ្នាំខ្មែរ ជាដើម។ មិនតែប៉ុណ្ណោះ ពិធីបុណ្យទាំងនេះ ក៏បានដាស់សតិអារម្មណ៍ពលរដ្ឋខ្មែរ ឲ្យចេះថែរក្សាបរិស្ថាន ដើម្បីទទួលបានប្រយោជន៍ពីសមុទ្រ និងទន្លេ ដែលជាសម្បត្តិធម្មជាតិរបស់កម្ពុជាផងដែរ ។ លោកបញ្ជាក់ថា ៖« នៅឆ្នាំ២០១៨ កម្ពុជារំពឹងនឹងទទួលបានភ្ញៀវអន្តរជាតិប្រមាណ៦,២លាននាក់ និងប្រមាណ៧លាននាក់នៅឆ្នាំ២០២០ និងនាំមកនូវចំណូលសរុបប្រមាណ៥ពាន់លានដុល្លារអាមេរិក ដោយបង្កើតនូវឱកាសការងារប្រមាណ១លាននាក់ ។ ក្នុងឆ្នាំ ២០៣០ កម្ពុជាក៏គ្រោងនឹងទទួលភ្ញៀវទេសចរអន្តរជាតិឲ្យបាន១៥លាននាក់ ដោយរំពឹងលើចំណូលពីវិស័យនេះ ប្រមាណ១០ពាន់លានដុល្លារអាមេរិក និងបង្កើតការងារប្រមាណ២លាននាក់ជូនពលរដ្ឋក្នុងស្រុក » ៕
ចែករំលែកព័តមាននេះ