ខេត្តប៉ៃលិន ៖ កម្លាំងជំនាញការិយាល័យប្រឆាំងបទល្មើសគ្រឿងញៀន បានធ្វើការចុះបង្ក្រាបករណីជួញដូរ និងប្រើប្រាស់នូវសារធាតុញៀនខុសច្បាប់មួយកន្លែង ខណៈពួកគេកំពុងនាំគ្នាប្រើប្រាស់យ៉ាងពពាក់ពពូន ហើយក៏តែងបង្កអសន្តិសុខដល់ប្រជាពលរដ្ឋរស់នៅក្នុងភូមិផងដែរ ។
ការចុះបង្ក្រាបនេះបានធ្វើឡើងកាលពីវេលាម៉ោង១២ថ្ងៃត្រង់ថ្ងៃទី១៥ ខែវិច្ឆិកា ឆ្នាំ២០១៨ ស្ថិតនៅភូមិផ្សារព្រំ ឃុំស្ទឹងកាច់ ស្រុកសាលាក្រៅ ខេត្តប៉ៃលិន ។
ប្រភពព័ត៌មានបានឱ្យដឹងថា សមត្ថកិច្ចបានឃាត់ខ្លួនជនសង្ស័យចំនួន៤នាក់រួមមាន ១-ឈ្មោះ តឿ ទី ហៅអាទី ភេទប្រុស អាយុ១៩ឆ្នាំ មុខរបររត់ម៉ូតូឌុប ២-ឈ្មោះ ផាន់ ឌីន ភេទប្រុស អាយុ១៩ឆ្នាំ មុខរបរកម្មករ ៣-ឈ្មោះ ជិន ប្រុស ហៅអាម៉ាប់ ភេទប្រុស អាយុ៣២ឆ្នាំ មុខរបរសន្តិសុខខារ៉ាអូខេ SENSE ។ អ្នកទាំងបីរស់នៅក្នុងភូមិឃុំកើតហេតុខាងលើ និង៤- ឈ្មោះ ឡុក ភីលាភ ភេទប្រុស អាយុ២០ឆ្នាំ មុខរបរ មិនពិតប្រាកដ បច្ចុប្បន្នរស់នៅភូមិអូរតាពុកក្រោម សង្កាត់ទួលល្វា ក្រុងប៉ៃលិន ខេត្តប៉ៃលិន ។
បន្ទាប់ពីឃាត់ខ្លួនជនសង្ស័យទាំង៤នាក់ខាងលើ សមត្ថកិច្ចដកហូតបានវត្ថុតាងនិងសម្ភារៈមួយចំនួនដូចជា ម្សៅក្រាមពណ៌សថ្លា (ម៉ាទឹកកកICE) ចំនួន១២កញ្ចប់តូច ឧបករណ៍សម្រាប់ជក់ អំពូលទែម៉ូមែត្រ២ដើម ដែកកេះ២ដើម ទុយោ១ដើម និងកញ្ចប់បារីចំនួន២កញ្ចប់ផងដែរ ។
ពាក់ព័ន្ធនឹងករណីខាងលើ កម្លាំងជំនាញបាននាំខ្លួនជនសង្ស័យទាំង៤នាក់ទៅកាន់ការិយាល័យប្រឆាំងបទល្មើសគ្រឿងញៀននៃស្នងការដ្ឋាននគរបាលខេត្តប៉ៃលិនដើម្បីសាកសួរ និងកសាងសំណុំរឿងរួចបញ្ជូនទៅតុលាការឱ្យចាត់ការតាមនីតីវិធី ៕
ចែករំលែកព័តមាននេះ