រាជធានីភ្នំពេញ៖មហោស្រពចាប៉ីដងវែង នឹងធ្វើឡើងនៅទីតាំងមជ្ឈមណ្ឌលបេតិកភណ្ឌរបស់អង្គការសិល្បៈខ្មែរអមតៈ ក្នុងបរិវេណវត្តរាជបូព៌ ក្រុងសៀមរាប រយៈពេល៣ថ្ងៃ គឺថ្ងៃទី៣០ ខែវិច្ឆិកា ដល់ថ្ងៃទី២ ខែធ្នូ ឆ្នាំ២០១៨។…
រាជធានីភ្នំពេញ៖មហោស្រពចាប៉ីដងវែង នឹងធ្វើឡើងនៅទីតាំងមជ្ឈមណ្ឌលបេតិកភណ្ឌរបស់អង្គការសិល្បៈខ្មែរអមតៈ ក្នុងបរិវេណវត្តរាជបូព៌ ក្រុងសៀមរាប រយៈពេល៣ថ្ងៃ គឺថ្ងៃទី៣០ ខែវិច្ឆិកា ដល់ថ្ងៃទី២ ខែធ្នូ ឆ្នាំ២០១៨។ កម្មវិធីនេះមានការចូលរួមសម្ដែងជាកិត្តិយសពីព្រឹទ្ធាចារ្យចាប៉ី ល្បីៗ សិល្បករចាប៉ីវ័យក្មេង និងសិល្បករជាច្រើនរូបផ្សេងទៀត រួមទាំងព្រឹទ្ធាចារ្យកោសល្យវោហារគង់ ណៃ ។
ស្ថិតក្រោមគម្រោងមូលនិធិក្រសួងវប្បធម៌ និងវិចិត្រសិល្បៈតាមរយៈផ្នែកបេតិកភណ្ឌវប្បធម៌អរូបីនៃអង្គការយូណេស្កូ និងសហការរៀបចំដោយ អង្គការសិល្បៈខ្មែរអមតៈ រថយន្តតន្ត្រីទិព្វខ្មែរ សហគមន៍ចាប៉ីអមតៈ និងបណ្ដាដៃគូ សិល្បករក្នុងស្រុក កម្មវិធីរយៈពេល៣ថ្ងៃនេះនឹងនាំមកជូននូវផ្ទាំងទស្សនីយចម្រៀង និងតន្ត្រី ក្នុងទម្រង់សិល្បៈចាប៉ីដងវែង និងការសម្ដែងនានា ជាពិសេសគឺការសម្ដែងចម្រៀងចាប៉ី៥នាក់ ដោយព្រឹទ្ធាចារ្យចាប៉ីដងវែងតំណាងឲ្យខេត្ត នីមួយៗ និងការសម្ដែងចាប៉ីទាំង២ជំនាន់ផងដែរ។
មហោស្រពនេះធ្វើឡើងដើម្បីអបអរសាទរការដាក់បញ្ចូលចាប៉ីដងវែងជាបេតិកភណ្ឌអរូបីរបស់មនុស្សជាតិដោយអង្គការយូណេស្កូ កាលពីថ្ងៃទី៣០ ខែវិច្ឆិកា ឆ្នាំ២០១៦ ក៏ដូចជាការផ្ដល់ឱកាសដល់សិល្បករចាប៉ី និងសិល្បករនានាអាចភ្ជាប់ការទាក់ទងជាមួយទស្សនិកជន ក៏ដូចជាក្នុងចំណោមអ្នកអាជីពដូចគ្នាបានកាន់តែច្រើន ។ ក្នុងពេលជាមួយគ្នានេះដែរ មហាជនដែលជាអ្នកចូលរួមក៏នឹងអាចទទួលបានចំណេះដឹងបន្ថែមអំពីសិល្បៈចាប៉ីដងវែង និងទម្រង់សិល្បៈដទៃទៀត ព្រមទាំងទទួលបានបនួវបទពិសោធន៍ដោយផ្ទាល់ជាមួយសិល្បករក្នុងការហាត់រៀន និងអនុវត្តផ្ទាល់ទៀតផង រួមមានសិក្ខាសាលានិទានរឿង សិក្ខាសាលាចាប៉ីដងវែង ភ្លេងការ និងអារក្ស បទបង្ហាញចម្លាក់ស្បែក គំនូរ និងពិព័រណ៍រូបថត ព្រមទាំងបាឋកថា និងវេទិកាពិភាក្សានានា ។
គ្រប់កម្មវិធីទាំង៣ថ្ងៃនេះបើកជូនសាធារណជនចូលរួម និងទស្សនកាដោយឥតគិតថ្លៃ។
លោកសុង សេង នាយកមជ្ឈមណ្ឌលបេតិកភណ្ឌនៃអង្គការសិល្បៈខ្មែរអមតៈ បានថ្លែងឲ្យដឹងថា៖«មហោស្រពចាប៉ីដងវែងនេះ គឺជាព្រឹត្តិការណ៍ជាប្រវត្តិសាស្ត្រសម្រាប់កម្ពុជា និងពិភពលោកដោយយើងទទួលបានមូលនិធិ និងសហការពីក្រសួងវប្បធម៌ និងវិចិត្រសិល្បៈ ផ្នែកបេតិកភណ្ឌអរូបីនៃអង្គការយូណេស្កូ សហគមន៍សិល្បៈ សិល្បករ និងដៃគូនានា ។ យើងពិតចង់ឲ្យមានទស្សនិកជនកាន់តែច្រើន មកចូលរួម និងបានឈ្វេងយល់អំពីតម្លៃទម្រង់សិល្បៈចាប៉ីដងវែង »៕
ចែករំលែកព័តមាននេះ