ខេត្តបាត់ដំបង ៖ នៅក្នុងចន្លោះពេលតែមួយម៉ោងប៉ុណ្ណោះ ឧប្បត្តិហេតុគ្រោះថ្នាក់ចរាចរបានកើតឡើង ចំនួន២លើកផ្ទួនៗ ដាច់ដោយឡែកពីគ្នានៅក្នុងស្រុកចំនួន២ ជាប់ព្រំដែនខ្មែរ,ថៃ ដែលបណ្ដាលឲ្យមនុស្ស ២នាក់ស្លាប់ និងម្នាក់ទៀតរងបួសស្រាល។ យោងតាមរបាយការណ៍របស់សមត្ថកិច្ចបានឲ្យដឹងថា ករណីលើកទី១ បានកើតឡើងនៅម៉ោង១១ ថ្ងៃត្រង់ ថ្ងៃទី១៤ វិច្ឆិកា លើដងផ្លូវមួយកន្លែងត្រង់ចំណុច ភូមិអូរដាលើ ឃុំបឹងរាំង ស្រុកកំរៀង ដែលកើតឡើងរវាងរថយន្តជាមួយម៉ូតូ។ សមត្ថកិច្ចបានឲ្យដឹងថា រថយន្តបង្ក ម៉ាកហ៊ីយ៉ាន់ដាយ ពាក់ស្លាកលេខ ភ្នំពេញ 3C-1483 ជារថយន្តដឹកដី តែអ្នកបើកបរបានរត់គេចខ្លួនក្រោយបង្កគ្រោះថ្នាក់។
បើតាមសមត្ថកិច្ចដដែលបានបញ្ជាក់ថា រថយន្តនេះបានជ្រុលចង្កូតទៅបុកអ្នកជិះម៉ូតូបណ្ដាលឲ្យ អ្នកជិះម៉ូតូ២នាក់ស្លាប់ និងរបួស។ ជនរងគ្រោះទាំង២នាក់ ម្នាក់ឈ្មោះ ជា យូហូវ ភេទប្រុស អាយុ៦៧ឆ្នាំ របួសស្រាល និងម្នាក់ទៀតឈ្មោះ ច្រឹប លឹមសៀង ស្រីអាយុ៦៥ឆ្នាំ ស្លាប់នៅកន្លែងកើតហេតុ។ ដោយឡែកករណីគ្រោះថ្នាក់ចរាចរ លើកទី២ បានកើតឡើងនៅម៉ោង១២ថ្ងៃត្រង់ ថ្ងៃត្រង់ថ្ងៃទី១៤ វិច្ឆិកា ដដែល នៅលើផ្លូវជាតិលេខ៥៧B ត្រង់ចំណុចភូមិភ្នំប្រាំពីរ ឃុំបូរ ស្រុកភ្នំព្រឹក រវាងម៉ូតូជាមួយម៉ូតូ ដែលធ្វើដំណើរស្របទិសគ្នា បណ្ដាលឲ្យស្លាប់ម្នាក់ និងរបួសម្នាក់។
នៅក្នុងឧប្បត្តិហេតុនេះ បើតាមសមត្ថកិច្ចបានឲ្យដឹងថា ភាគីទាំង២បានធ្វើដំណើរស្របទិសគ្នា ប៉ុន្តែពេលជិះដល់ចំណុចកើតហេតុ ស្រាប់តែម៉ូតូម៉ាកវ៉េវដែលជិះដោយបុរសម្នាក់ឈ្មោះ ប៊ុន ណាត អាយុ៣០ឆ្នាំ បានបត់ដោយខ្វះការប្រុងប្រយ័ត្ន ទើបត្រូវអ្នកជិះម៉ូតូម្នាក់ទៀតឈ្មោះ ឈួន រ៉ា ភេទប្រុស អាយុ៥៥ឆ្នាំ ដែលកំពុងជិះពីក្រោយជ្រុលទៅបុកពេញទំហឹងតែម្ដង។ សមត្ថកិច្ចបានប្រាប់ថា ក្នុងការប៉ះទង្គិចគ្នា ទាំងកំរោលនេះ បណ្ដាលឲ្យឈ្មោះ ឈួន រ៉ា ស្លាប់នៅនឹងកន្លែង រីឯឈ្មោះ ប៊ុន ណាត រងរបួសស្រាល។
ជុំវិញករណីគ្រោះថ្នាក់ចរាចរទាំង២លើកខាងលើនេះ បើតាមមន្ត្រីចរាចរណ៍ដែលចុះពិនិត្យ ទីតាំងកើតហេតុ បាននិយាយថា គឺកើតឡើងដោយសារការធ្វេសប្រហែសរបស់អ្នកបើកបរ មិនគោរពច្បាប់ ខ្វះការប្រុងប្រយ័ត្នពេលកំពុងធ្វើដំណើរលើដងផ្លូវ។ ទោះយ៉ាងណាសមត្ថកិច្ចជំនាញបាននាំយក មធ្យោបាយបង្កគ្រោះថ្នាក់ទាំង២ករណីនេះ ទៅរក្សាទុកក្នុងអធិការនីមួយៗ ដើម្បីរងចាំដោះស្រាយតាមនីតិវិធីហើយ៕
ចែករំលែកព័តមាននេះ