ខេត្តកំពង់ឆ្នាំង ៖ កសិករគំរូរស់នៅភូមិត្រពាំងត្រាច ឃុំរលាប្អៀរ ស្រុករលាប្អៀរ បានអំពាវនាវដល់ប្រជាពលរដ្ឋជាកសិករគួរតែបោះបង់ទម្លាប់ការធ្វើស្រូវតាមទម្លាប់ចាស់មកធ្វើស្រូវបែបសម័យទំនើបវិញព្រោះចំណាយគ្រាប់ពូជតិចពលកម្មតិច តែបានទិន្នផលខ្ពស់ ។ លោក ឃួន…
ខេត្តកំពង់ឆ្នាំង ៖ កសិករគំរូរស់នៅភូមិត្រពាំងត្រាច ឃុំរលាប្អៀរ ស្រុករលាប្អៀរ បានអំពាវនាវដល់ប្រជាពលរដ្ឋជាកសិករគួរតែបោះបង់ទម្លាប់ការធ្វើស្រូវតាមទម្លាប់ចាស់មកធ្វើស្រូវបែបសម័យទំនើបវិញព្រោះចំណាយគ្រាប់ពូជតិចពលកម្មតិច តែបានទិន្នផលខ្ពស់ ។
លោក ឃួន ណូត អាយុ៦៣ឆ្នាំ រស់នៅភូមិឃុំខាងលើបាននិយាយឲ្យដឹងថា ការធ្វើស្រែបែបប្រពលវប្បកម្ម គឺបានផលចំណេញច្រើនណាស់ តាំងពីកម្លាំងពលកម្ម និងថវិកាចំណាយលើគ្រាប់ពូជជាដើម ។ ប៉ុន្តែបានទិន្នផលខ្ពស់អាចពី៧ទៅ៨តោនក្នុងមួយហិកតា នេះសម្រាប់ស្រូវធ្ងន់ ។ លោកបានបញ្ជាក់ថា ការធ្វើស្រូវបែបប្រពលវប្បកម្ម គឺទាមទារឲ្យមានការធ្វើដីឱ្យបានរាបស្មើ ការដាក់ជីធម្មជាតិលាមគោក្របី ឬជីកំប៉ុស ដែលបានពីកាកសំណល់ផ្ទះបាយលាយជាមួយលាមកសត្វជាដើម ។ ចំណែកការស្ទូង គឺត្រូវស្ទូងជាជួរ និងស្ទូងស្រូវតែមួយដើមប៉ុណ្ណោះ ដោយឡែកសំណាប គឺត្រូវប្រើសំណាបនៅខ្ចីទើបមានកម្លាំងលូតលាស់ល្អ ។
លោកបានបញ្ជាក់ថា តាមទម្លាប់ប្រជាពលរដ្ឋជាកសិករយើង គឺធ្វើទៅតាមទម្លាប់តគ្នាពីចាស់បុរាណមកដោយស្ទូងស្រូវច្រើនដើមក្នុង១គុម្ភ ហើយសំណាបច្រើនទុកដល់ចាស់ដើមទើបដកយកទៅស្ទូង ។ លោកបានបញ្ជាក់ដែរថា ការស្ទូងស្រូវប្រពលវប្បកម្ម គឺបានទិន្នផលខ្ពស់ខ្លាំងណាស់ ជាក់ស្តែងស្រូវផ្ការំដួលរបស់គាត់ដែលស្ទូងនៅស្រែលើ គឺបានពី៣ទៅ៤តោនក្នុងមួយហិកតា តាមដែលស្ទូងពីដើមដៃឬចុងដៃ ។ ចំណែកប្រភេទស្រូវធ្ងន់ឈ្មោះ KHA 5 គឺបានផលពី៧ទៅ៨តោន ក្នុងមួយហិកតាឯណោះ ។
លោក ឃួន ណូត បានបញ្ជាក់ថា លោកធ្លាប់ទទួលបានជ័យលាភីលេខ១ទូទាំងប្រទេស កាលពីឆ្នាំ២០១៥ ជាកសិករគំរូដោយទទួលបានអំណោយពីសម្ដេចតេជោហ៊ុន សែន នូវគោយន្តមួយគ្រឿង និងគោញីពីរក្បាល ពីអង្គការសេដាក់ ។ ក្នុងនាមលោកជាកសិករគំរូទទួលជោគជ័យក្នុងការធ្វើស្រែ លោកសូមអំពាវនាវដល់ប្រជាពលរដ្ឋទាំងអស់ សូមកែប្រែទម្លាប់ចាស់មកធ្វើស្រូវតាមបែបសម័យប្រពលវប្បកម្ម ដោយស្ទូងស្រូវមួយដើមវិញ ព្រោះចំណេញថវិការក្នុងការចំណាយពូជច្រើនតែបានទិន្នផលខ្ពស់ ។
សូមរំឮកថា លោក ឃួន ណូត កសិករគំរូខាងលើមុនពេលទទួលជោគជ័យបែបនេះលោកធ្លាប់ទទួលបានការបណ្តុះបណ្តាលពីអង្គការសេដាក់ដែលបង្ហាញឲ្យធ្វើស្រូវប្រពលវប្បកម្មតាមគោលការធម្មជាតិ និងក្រោយៗបន្ទាប់មកទៀតបានទទួលការណែនាំពីប្រធានការិយាល័យកសិកម្មស្រុក និងប្រធានមន្ទីរកសិកម្មខេត្ត ។ កសិករគំរូខាងលើក្រៅពីជំនាញធ្វើស្រូវខាងលើនៅមានជំនាញចិញ្ចឹមមាន់ចិញ្ចឹមត្រី និងដាំបន្លែដែលបានលើកស្ទួយជីវភាពគ្រួសារធូរធាមួយកម្រិត ៕
ចែករំលែកព័តមាននេះ