រាជធានីភ្នំពេញ ៖ ចាត់ទុកជារឿងភ្ញាក់ផ្អើល និងគួរឱ្យចាប់អារម្មណ៍មិនតិចទេ ដោយសារតែមានដំណឹងថា អ្នកស្រីកែ ឡេង រាជិនីកីឡាប៉េតុងកម្ពុជា និងជាម្ចាស់មេដាយពិភពលោកក្នុងមុខជំនាញកីឡាមួយនេះបានឡើងតំណែងផ្កាយ១ ប្រចាំក្រសួងការពារជាតិ បន្ទាប់ពីអ្នកស្រីបានតស៊ូនៅក្នុងស្ថាប័នមួយនេះតាំងពីឆ្នាំ១៩៩៨ ។ អ្នកស្រីបានទទួលស្គាល់ការទម្លាយនេះ តែអ្នកស្រីបញ្ជាក់ថាមិនទាន់ចេញសេចក្ដីប្រកាសផ្លូវការដោយក្រសួងនៅឡើយទេ គ្រាន់តែមេៗថ្នាក់លើបានដឹងបានឮប៉ុណ្ណោះ។
អ្នកស្រី កែ ឡេង បានថ្លែងបញ្ជាក់ថាអ្នកស្រីពិតជាបានឡើងតំណែងពីស័ក្ដិ៥មកផ្កាយ១មែន ដោយត្រូវបានតែងតាំងជាប្រធានគ្រូបង្វឹកផ្នែកប៉េតង់ទទួលខុសត្រូវលើការងារបណ្ដុះបណ្ដាលផ្នែកនេះនៅក្រសួងមែន ។ អ្នកស្រីថា តំណែងរបស់ខ្លួនគ្រោងប្រកាសក្នុងពេលដ៏ខ្លី ខណៈដែលក្នុងក្រសួងបានទទួលស្គាល់ថាអ្នកស្រីគឺជាមន្ត្រីផ្កាយ១ជាផ្លូវការហើយ បន្ទាប់ពីមានថ្នាក់លើដាក់សំណើឱ្យឡើងផ្កាយ១។
អ្នកស្រីសម្ដែងអារម្មណ៍សប្បាយចិត្តយ៉ាងខ្លាំង ដែលបានតំណែងផ្កាយ១ តែអ្នកស្រីថានឹងនៅតែធ្វើជាកីឡាការិនីដដែល បើទោះជាតំណែងរបស់ខ្លួនឡើងខ្ពស់ជាងមុនដែលធ្វើឱ្យអ្នកស្រីកាន់តែមានកិត្តិយសក្នុងក្រសួងការពារជាតិក្ដី ។ អ្នកស្រីថា ពិធីប្រកាសឡើងតំណែងរបស់ខ្លួនមិនដឹងថាធ្វើឡើងដោយធំដុំឬយ៉ាងណានោះទេ ប៉ុន្តែអ្នកស្រីនឹងនៅតែសកម្មក្នុងវិស័យកីឡា ដោយមិនបានតំណែងផ្កាយ១ក្នុងក្រសួងការពារជាតិ ហើយធ្វើខ្លួនភ្លេចកីឡា និងរយាលពីការហ្វឹកហាត់ ឬបង្វឹកសិស្សដើម្បីជំរុញកីឡាប៉េតង់នោះទេ ។
អ្នកស្រីក៏បានប្រកាសថា នឹងប្រើតំណែងដែលទើបតែងតាំងមិនទាន់ប្រកាសនេះ ដើម្បីជំរុញឱ្យកីឡាប៉េតង់កាន់តែមានការរីកចម្រើននិងឈានឡើងឱ្យខាងតែបាន ជាពិសេសនៅក្នុងកាលៈទេសៈ ដែលអ្នកស្រីយល់ថា កីឡាមួយនេះកាន់តែមានប្រជាប្រិយភាពលើឆាកអន្តរជាតិ ។ ជាមួយនឹងការបញ្ជាក់ឱ្យដឹងពីការឡើងតំណែង ធ្វើឱ្យគេមើលឃើញភ្លាមថា អ្នកស្រីក្រៅពីជាកីឡាការិនីល្បីឈ្មោះ ក៏បានក្លាយជាមន្ត្រីផ្កាយ១ឡើងកាលីបដែលធ្វើឱ្យម្នាក់ៗមិនកោតសរសើរចំពោះអ្នកស្រីមិនបាននោះដែរ។
គួរបញ្ជាក់ដែរថា អ្នកស្រី កែ ឡេង កើតនៅថ្ងៃទី ១៥ ខែតុលា ឆ្នាំ១៩៧០ នៅភូមិក្រាំងលាវ ឃុំក្រាំងលាវ ខេត្តកំពង់ឆ្នាំង ដោយអ្នកស្រីកើតបានតែរង្វង់២ឆ្នាំប៉ុណ្ណោះ ឪពុកដែលជាកសិករនៅក្នុងសម័យនោះ ក៏ទទួលមរណភាព ទាំងអ្នកស្រីមិនស្គាល់មុខច្បាស់នៅឡើយ។
អ្នកស្រីជាកូនពៅក្នុងចំណោមបងប្អូន៩នាក់ (ប្រុស៤ស្រី៥) ដោយមានឪពុកឈ្មោះ កែ ភន និងម្ដាយឈ្មោះ ចូ សន ដែលទទួលមរណភាពដូចគ្នាកាលពីឆ្នាំ១៩៨៣ ។ អ្នកស្រីបានចាកចេញពីស្រុកកំណើតក្នុងឆ្នាំ១៩៨៣ ក្រោយពេលម្ដាយទទួលមរណភាព ដោយមករស់នៅជាមួយបងស្រីៗ ហើយក្នុងពេលនោះបងរបស់អ្នកស្រី ក៏បានជំរុញឱ្យអ្នកស្រីចូលហ្វឹកហាត់ផ្នែកអត្តពលកម្ម(រត់ប្រណាំង) តែមិនបានធ្វើជាកីឡាការិនីនោះទេ ដោយសារតែអ្នកស្រីគ្រាន់តែហ្វឹកហាត់លេងៗ ដើម្បីសុខភាពច្រើនជាង ។ រហូតដល់ឆ្នាំ១៩៩៣ ក្រសួងការពារជាតិក៏ធ្វើការជ្រើសរើសកីឡាការិនីបាល់ទះនារី ដោយតម្រូវឱ្យប្រឡងចូលដើម្បីបង្កើតជាក្រុមបាល់ទះនារី ហើយអ្នកស្រី ក៏ត្រូវបងៗជំរុញឱ្យដាក់ពាក្យប្រឡង ហើយជាភ័ព្វសំណាងក៏បានជាប់។
តាំងពីពេលនោះមក អ្នកស្រី ក៏បានក្លាយជាមន្ត្រីក្រសួងការពារជាតិនៅក្នុងក្របខ័ណ្ឌកីឡាការិនី និងជាគ្រូបង្វឹក ដោយក្នុងពេលនេះ អ្នកស្រីក៏ជាមន្ត្រីដែលមានតំណែងមួយប្រចាំក្រសួងក្រៅពីជាកីឡាការិនីជម្រើសជាតិផ្នែកប៉េតង់ផងដែរ។ ក្រោយប្រឡងជាប់ក្នុងក្រុមកីឡាការិនីបាល់ទះ របស់ក្រសួងការពារជាតិ ហើយចំពេលក្រសួងនេះរំសាយក្រុមបាល់ទះ អ្នកស្រីក៏ត្រូវក្រសួងជ្រើសរើសឱ្យចូលក្រុមប៉េតង់ក្នុងឆ្នាំ១៩៩៣ដោយអ្នកស្រីចាប់ផ្ដើមប្រឹងប្រែងហ្វឹកហាត់ ហើយដោយសារភាពប៉ិនប្រសប់អ្នកស្រីក៏ត្រូវក្រសួងបញ្ជូនឱ្យចេញប្រកួតនៅសិង្ហបុរីក្នុងឆ្នាំ១៩៩៩ដោយទទួលបានមេដាយមាសជាលើកដំបូងនោះតែម្ដង ជាមួយនឹងអ្នកស្រី អ៊ុក ស្រីមុំ ដែលជាដៃគូបច្ចុប្បន្ន ។
បន្តបន្ទាប់មកអ្នកស្រីក៏ត្រូវបានតំណាងឱ្យប្រទេសកម្ពុជាចេញទៅប្រកួតនៅលើឆាកអន្តរជាតិជាប្រចាំ ទាំងការប្រកួតកម្រិតអាស៊ាន កម្រិតអន្តរជាតិ និងកម្រិតពិភពលោក ដោយការប្រកួតនាពេលកន្លងមក ស្ទើរមិនមានការចេញប្រកួតណាមួយមិនទទួលបានមេដាយត្រឡប់មកជូនជាតិវិញឡើយ ។ មកទល់ពេលនេះ អ្នកស្រីទទួលបានមេដាយមាស៤៧គ្រឿង មេដាយប្រាក់១៧គ្រឿង និងមេដាយសំរឹទ្ធិ១៣គ្រឿង ដោយមិនទាន់រាប់បញ្ចូលមេដាយក្នុងស្រុកដែលអ្នកស្រីទទួលបានពីការប្រកួតនោះផង ។
អ្វីដែលអ្នកស្រីទទួលបានមោទនភាពបំផុតនៅក្នុងពេលនេះ គឺការទទួលបានមេដាយដល់ទៅ៣លើវិញ្ញាសាមួយទល់នឹងមួយ ២នាក់ទល់នឹង២នាក់ និង៣នាក់ទល់នឹង៣នាក់ នៅប្រទេសបារាំងក្នុងព្រឹត្តិការណ៍ប្រជុំដោយកីឡាករកីឡាការិនីជាម្ចាស់មេដាយមាសអន្តរជាតិតំណាងប្រទេស និងតំណាងទ្វីបនីមួយៗប៉ះគ្នា ។ អ្នកស្រីថា ការប្រកួតមួយនេះ គឺធំជាងបណ្ដាការប្រកួតកន្លងមក ដោយសារតែការប្រកួតដែលបានធ្វើឡើងគឺតម្រូវឱ្យយកតែម្ចាស់មេដាយមាសលើឆាកអន្តរជាតិតំណាងឱ្យប្រទេសនីមួយៗមកប្រកួតតែប៉ុណ្ណោះ ដែលមានន័យថា មេដាយមាសដែលអ្នកស្រីទទួលបានមុននេះ គឺជាមេដាយដែលឈ្នះលើម្ចាស់មេដាយមាសផ្សេងៗ មកពីជុំវិញពិភពលោក ។
ក្នុងឆ្នាំ១៩៨៦ អ្នកស្រីបានរៀបការជាមួយ លោក សួស សំអឿន អាយុស្របាលអ្នកស្រីជាមន្ត្រីក្រសួងការពារជាតិខាងផ្នែកកងទ័ពជើងគោក ដោយសព្វថ្ងៃអ្នកស្រីទទួលបានចំណងដៃកូនប្រុសស្រី២នាក់ គឺកូនប្រុសច្បងអាយុ២៧ឆ្នាំ និងកូនស្រីពៅអាយុ២១ឆ្នាំ ដោយអ្នកទាំង២សុទ្ធតែជាមន្ត្រីប្រចាំនៅក្រសួងការពារជាតិ ខាងផ្នែកប៉េតង់ដូចគ្នា ដោយគ្រាន់តែកូនស្រីអ្នកស្រីហាក់មានជំនាញជាង ហើយបានក្លាយជាកីឡាការិនីជម្រើសជាតិមុននេះ ។
អ្នកស្រីថា ខ្លួននឹងបង្វឹកកូនទាំង២ឱ្យស្នងតំណែង ប៉ុន្តែទំនងជាកូនស្រីពៅអាចនឹងដើរតាមគន្លងអ្នកស្រីបានល្អជាង ដោយសារតែនាងក៏ធ្លាប់ចេញប្រកួតនៅក្នុងប្រទេសវៀតណាមមុននេះ ហើយទទួលបានមេដាយប្រាក់ជូនជាតិម្ដងដែរ ។ យ៉ាងណាមិញ អ្នកស្រីថា កូនប្រុសក៏ល្អផងដែរ ប៉ុន្តែមកពីលោករវល់នឹងការសិក្សារៀនសូត្រ និងការងារផ្ទាល់ខ្លួនពេកប៉ុណ្ណោះ ទើបមិនសូវបានហ្វឹកហាត់ដិតដល់ ។ ជាមួយនឹងការរៀបរាប់ប្រវត្តិ គឺថាអ្នកស្រីមិនត្រឹមតែជាកីឡាការិនីឆ្នើមនោះទេ ប៉ុន្តែប្រវត្តិជីវិត និងការតស៊ូក្នុងនាមជាកូនកំព្រាទាំងឪពុក ទាំងម្ដាយមានចំណេះដឹងទាប ហើយប្រឹងក្រោយឈរក្នុងនាមជាកូនពៅ រហូតបានក្លាយខ្លួនជាកីឡាការិនីល្បីឈ្មោះ ក៏គួរឱ្យស្ងើចសរសើរផងដែរ៕
ចែករំលែកព័តមាននេះ