រាជធានីភ្នំពេញ ៖ លោក ឃឹម សុជាតិ ក្រោយពីមានរឿងចម្រូងចម្រាសជាមួយស្ថានីយទូរទស្សន៍ក្នុងស្រុកមួយរហូតឈានដល់សម្រេចចិត្តលាឈប់ពីការងារជាចៅក្រមនិងអាជ្ញាកណ្ដាលប្រដាល់អស់រយៈពេលជាច្រើនខែមកនេះ ថ្មីៗនេះលោកបានចេញវីដេឃ្លីបរិះគន់លោកឧត្តមសេនីយ៍ឯកតែម ម៉ឺន ប្រធានសហព័ន្ធកីឡាប្រដាល់គុនខ្មែរ និងលោកវេជ្ជបណ្ឌិត ឆឹង យ៉ៅយ៉េន ប្រធានសហព័ន្ធកីឡាប្រដាល់សាកលកម្ពុជា ថាគ្មានសមត្ថភាពដឹកនាំកីឡាប្រដាល់ឱ្យរីកចម្រើនបានទេ ។
លោកបានព្យាករទុកមុនថា កីឡាស៊ីហ្គេមឆ្នាំ២០២៣ដែលកម្ពុជាទទួលធ្វើជាម្ចាស់សម្រាប់កីឡាប្រដាល់ក្រោមការដឹកនាំរបស់លោកប្រធានសហព័ន្ធទាំងពីរសូម្បីតែមេដាយសំរឹទ្ធក៏មិនអាចដណ្ដើមបានដែរ ។ បានជាលោកហ៊ានអះអាងបែបនេះដោយសារប្រធានសហព័ន្ធទាំងពីរហាក់មើលរំលងមនុស្សមានសមត្ថភាពពិតប្រាកដមួយគំនរមិនយកទៅប្រើការទេបែរជាជ្រើសយកមនុស្សអត់បានការទៅវិញ ដូច្នេះកុំសង្ឃឹមថា អាចដណ្ដើមបានមេដាយពីការប្រកួតកីឡាស៊ីហ្គេមឱ្យសោះ ។ ដោយសារមិនពេញចិត្តនឹងការដឹកនាំរបស់ប្រធានសហព័ន្ធកីឡាប្រដាល់ទាំងពីរនេះហើយទើបលោកសុខចិត្តលាឈប់ពីការងារជាចៅក្រម និងអាជ្ញាកណ្ដាលប្រដាល់តែម្ដងទៅ។
លោក ឃឹម សុជាតិ បន្តថា លោកគឺជាមនុស្សម្នាក់ដែលស្រឡាញ់វិស័យកីឡាប្រដាល់ខ្លាំងណាស់ និងបានឈានជើងចូលប្រឡូកក្នុងវិស័យមួយនេះតាំងពីឆ្នាំ២០០២មកម៉្លេះដែលគិតរហូតមកទល់ពេលនេះមានរយៈពេល១៦ឆ្នាំហើយ ។ លោកចាប់ផ្ដើមបម្រើការងារជាចៅក្រម និងអាជ្ញាកណ្ដាលប្រដាល់នៅពេលស្ថានីយទូរទស្សន៍បានយ័នបើកសម្ពោធសង្វៀនប្រដាល់ជាលើកដំបូងនៅក្នុងឆ្នាំ២០០៨ ក្រោមការដឹកនាំរបស់លោកឧកញ៉ា អ៊ុំ យូរ៉ាន់ ជាប្រធានសហព័ន្ធកីឡាប្រដាល់ ។ ជាមួយគ្នានេះលោកបានកោតសរសើរលោកឧកញ៉ា អ៊ុំ យូរ៉ាន់ ថាធ្វើការងារបានល្អធ្វើឱ្យវិស័យកីឡាប្រដាល់មានការរីកចម្រើនជាលំដាប់ ។
ផ្ទុយទៅវិញលោកបានរិះគន់ប្រធានសហព័ន្ធបច្ចុប្បន្នថាគ្មានធ្វើអ្វីឱ្យពិតប្រាកដទេ លំៗយកតែលុយ ការគ្រប់គ្រងមានភាពមិនច្បាស់លាស់ ។ អ្វីដែលធ្វើឱ្យលោកកាន់តែបាត់បង់ជំនឿថែមទៀតនោះគឺពេលសហព័ន្ធបំបែកខ្លួនជាពីរដោយបង្កើតជាសហព័ន្ធកីឡាប្រដាល់សាកលកម្ពុជាមួយផ្សេងទៀត និងបានជ្រើសរើសលោកវេជ្ជបណ្ឌិត ឆឹង យ៉ៅយ៉េន ធ្វើជាប្រធានសហព័ន្ធថែមទៀត។ដូច្នេះលោកគិតថា ពិតជាមិនអាចទៅរួចឡើយជាពិសេសការប្រកួតកីឡាស៊ីហ្គេមលើកទី៣២ឆ្នាំ២០២៣ លោកហ៊ានធានាថា សូម្បីមេដាយសំរឹទ្ធក៏មិនអាចដណ្ដើមបានផង។
លោកថា សហព័ន្ធកីឡាប្រដាល់សព្វថ្ងៃ សូម្បី តែអាវពាក់សម្រាប់បម្រើការក៏ត្រូវចំណាយលុយទិញដែរ រីឯឡូហ្គោសហព័ន្ធនិងឡូហ្គោប៉ុស្តិ៍បាយ័ន្តក៏ត្រូវគេលក់ក្នុងតម្លៃ១ដុល្លារថែមទៀត។ អ្វីដែលធ្វើឱ្យលោកហួសចិត្តបំផុតនោះ គឺស្ថានីយទូរទស្សន៍ដែលលោកបម្រើការងារឱ្យអស់រយៈពេលជាច្រើនឆ្នាំបានឱ្យតម្លៃខ្លួនលោកតិចជាងអ្នកចូលថ្មី ។ មុនពេលលោកឆ្អែតចិត្តលោកធ្លាប់សំណូមដល់ប្រធានសហព័ន្ធឱ្យគិតគូរឡើងវិញ
ពីកញ្ចប់ថវិកាដាច់ដោយឡែកពីគ្នាសម្រាប់អ្នកដែលបម្រើការយូរនិងអ្នកថ្មី តែគេធ្វើជា
មិនដឹងមិនឮទៅវិញ ។
មូលហេតុនេះហើយទើបលោករិះគន់ស្ថានីយទូរទស្សន៍ក៏ដូចប្រធានសហព័ន្ធថា មិនចេះធ្វើការ ពុករលួយ ចាប់គូយកតែគ្នាឯង ទើបក្លិបប្រដាល់មួយចំនួនត្រូវបង្ខំចិត្តបិទទ្វារជាបណ្ដើរៗដោយសារកីឡាករហ្វឹកហាត់ហើយមិនទទួលបានឱកាសឡើងប្រកួត។
ជាការឆ្លើយតបលោក ម៉ិល កាដូ អគ្គលេខាធិការសហព័ន្ធកីឡាប្រដាល់គុនខ្មែរ បានលើកឡើងអំពីតម្លៃខ្លួនបម្រើការងាររបស់មន្ត្រីចៅក្រមនិងអាជ្ញាកណ្ដាលប្រដាល់ថា គ្មានអ្នកណាម្នាក់ហ៊ានសម្រេចនោះទេ វាអាស្រ័យទៅលើការចរចាគ្នាជាមួយអ្នកឧបត្ថម្ភកម្មវិធីប៉ុណ្ណោះ។
ចំណែកលោកឧត្តមសេនីយ៍ឯក តែម ម៉ឺនធ្លាប់បានលើកឡើងជាច្រើនដងមកហើយអំពីបញ្ហាបើកក្លិបប្រដាល់នោះថា បើទៅរួចចាំធ្វើកុំសង្ឃឹមលើចំណូលតម្លៃខ្លួនកីឡាករប្រដាល់យកមកដោះស្រាយឱ្យសោះ ។ ប៉ុន្តែរាល់សំណើសុំបើកក្លិប ម្នាក់ៗសុទ្ធតែបានអះអាងចំពោះមុខលោកថា មិនអីទេមេ ឱ្យតែអនុញ្ញាតគេអាចដោះស្រាយបានហើយ ។ ទីបំផុតបែរជានាំគ្នាប្រាប់អ្នកកាសែតចុះព្រោងព្រាតថា ប្រធានសហព័ន្ធមិនចេះមើលកូនចៅទៅវិញ ។ លោកថា មនុស្សមួយចំនួនបើកក្លិបគឺសម្លឹងឃើញផលប្រយោជន៍ផ្ទាល់ខ្លួនច្រើនជាងចង់ជួយវិស័យកីឡាប្រដាល់ឱ្យរីកចម្រើន លុះមិនបានដូចចិត្តក៏ផ្ទុះប្រតិកម្ម ។ ចំណែកក្លិបមួយចំនួនទៀតដូចជាក្លិបសាលវ័ន្ត ក្លិបពុទ្ធសេរីវង្ស ក្លិបតាព្រហ្មមានជ័យជាដើមសុទ្ធតែមានសមត្ថភាពស្វែងរកការជួយឧបត្ថម្ភពីសប្បុរសជនទើបធ្វើឱ្យក្លិបរបស់គេដំណើការល្អរហូតដល់សព្វថ្ងៃ។
លោកបញ្ជាក់ថា សហព័ន្ធមានផែនការច្បាស់លាស់ និងគិតគូរខ្លាំងណាស់ពីបញ្ហាបណ្ដុះបណ្ដាលកីឡាករថ្នាលទាំងសាកលនិងគុនខ្មែរ សម្រាប់ត្រៀមប្រកួតកីឡាស៊ីហ្គេមឆ្នាំ២០២៣ខាងមុខ ។ ជាក់ស្ដែង សហព័ន្ធបានចំណាយថវិកាជាច្រើនម៉ឺនដុល្លារកសាងក្លិបប្រដាល់ធំមួយ(ក្លិបអារុណរះ) នៅខេត្តកណ្ដាលដើម្បីហ្វឹកហាត់កីឡាករថ្នាល។
ពាក់ព័ន្ធនឹងការលើកឡើងរបស់លោក ឃឹម សុជាតិ ដូចរៀបរាប់ខាងលើ តំណាងស្ថានីយទូរទស្សន៍មួយចំនួនដែលមានសង្វៀនប្រដាល់និយាយថា ពួកគេត្រូវការណាស់កីឡាករល្អៗ មានវិន័យ មិនបង្កើតបញ្ហានាំឱ្យខូចដល់កម្មវិធីប្រកួត ។ ចំពោះកីឡាករដែលមិនបានហ្វឹកហាត់ត្រឹមត្រូវប្រកួតមិនល្អមើល ធ្វើឱ្យមានការរិះគន់ពីមហាជនពួកគេមិនត្រូវការនោះទេដូច្នេះគ្រប់ក្លិបប្រដាល់ទាំងអស់បើចង់ឱ្យសិស្សរបស់ខ្លួនទទួលការផ្គូផ្គងត្រូវបង្កើនការហ្វឹកហាត់ឱ្យពួកគេមានសមត្ថភាពគ្រប់គ្រាន់ទៅបានហើយ៕
ចែករំលែកព័តមាននេះ