ទីក្រុងRiyadh ៖ រដ្ឋមន្ត្រីថាមពលរបស់ប្រទេសអារ៉ាប៊ីសាអូឌីតបានស្នើកាលពីថ្ងៃចន្ទកន្លងមក ឲ្យមានការកាត់បន្ថយទិន្នផលប្រេងប្រមាណ១លានធុងក្នុង១ថ្ងៃដើម្បីស្វែងរកលំនឹងទីផ្សារវិញ ខណៈដែលប្រទេសលោកបានប្រកាសពីគម្រោងកាត់បន្ថយផលិតកម្មប្រមាណ ៥០ម៉ឺនធុងក្នុង១ថ្ងៃចាប់ពីខែធ្នូតទៅ ។ លោករដ្ឋមន្ត្រី Khalid al-Falih…
ទីក្រុងRiyadh ៖ រដ្ឋមន្ត្រីថាមពលរបស់ប្រទេសអារ៉ាប៊ីសាអូឌីតបានស្នើកាលពីថ្ងៃចន្ទកន្លងមក ឲ្យមានការកាត់បន្ថយទិន្នផលប្រេងប្រមាណ១លានធុងក្នុង១ថ្ងៃដើម្បីស្វែងរកលំនឹងទីផ្សារវិញ ខណៈដែលប្រទេសលោកបានប្រកាសពីគម្រោងកាត់បន្ថយផលិតកម្មប្រមាណ ៥០ម៉ឺនធុងក្នុង១ថ្ងៃចាប់ពីខែធ្នូតទៅ ។
លោករដ្ឋមន្ត្រី Khalid al-Falih បាននិយាយក្នុងសន្និសីទកាសែតមួយថា ៖« ការវិភាគបច្ចេកទេសដែលពួកយើងបានត្រួតពិនិត្យបង្ហាញថា ពួកយើងត្រូវតែកាត់បន្ថយជិត១លានធុងក្នុង១ថ្ងៃដើម្បីរក្សាលំនឹងទីផ្សារ »។
គួរបញ្ជាក់ដែរថា តម្លៃប្រេងបានធ្លាក់ចុះ ១ភាគ៥ក្នុងអំឡុងពេលមួយខែមុន ព្រោះតែការផ្គត់ផ្គង់លើសលប់ និងផលប៉ះពាល់ពីការដាក់ទណ្ឌកម្មអាមេរិកលើការនាំចេញប្រេងរបស់អ៊ីរ៉ង់ ។
យ៉ាងណាក្តី តម្លៃប្រេងបានកើនឡើងកាលពីថ្ងៃចន្ទបន្ទាប់ពីប្រទេសផ្គត់ផ្គង់ប្រេងធំជាងគេលើពិភពលោក គឺអារ៉ាប៊ីសាអូឌីតប្រកាសពីគម្រោងការកាត់បន្ថយផលិតកម្ម។ លោក Falih បានឲ្យដឹងថា អារ៉ាប៊ីសាអូឌីតនឹងកាត់បន្ថយផលិតកម្មប្រមាណ៥០ម៉ឺនធុងក្នុង១ថ្ងៃនៅខែក្រោយនេះ ។
រដ្ឋមន្ត្រីអេមីរ៉ាតអារ៉ាប់រួម លោក Suhail al-Mazrouei បានឲ្យដឹងដែរថា ការស្វែងរកលំនឹងទីផ្សារត្រូវការកែទម្រង់យុទ្ធសាស្ត្រ ។ ចំណែកឯអ្នកនាំពាក្យក្រសួងថាមពលអុីរ៉ាក់គឺលោក Assem Jihad បានប្រាប់មកថា ប្រទេសលោកសង្ឃឹមថា រាល់ការសម្រេចចិត្តនឹងជួយរក្សាលំនឹងទីផ្សារ ។
តម្លៃប្រេងឆៅរបស់ Brent បានធ្លាក់ចុះក្រោម៧០ដុល្លារកាលពីថ្ងៃសុក្រមុនជាលើកដំបូងតាំងពីខែមេសាមក ប៉ុន្តែវាបានកើនឡើងដល់ ៧១ដុល្លារក្នុង១ធុងវិញកាលពីថ្ងៃចន្ទ។ តម្លៃប្រេងឆៅរបស់ West Texas វិញបានធ្លាក់ដល់កម្រិតទាបជាងគេក្នុងរយៈពេល៩ខែមកនេះ ឬក្រោម ៦០ដុល្លារក្នុង១ធុង តែបានកើនដល់ ៦១ដុល្លារវិញនៅថ្ងៃចន្ទ៕
ចែករំលែកព័តមាននេះ