រាជធាននីភ្នំពេញ ៖ មន្ត្រីយោធាម្នាក់ត្រូវបានកម្លាំងនគរបាលព្រហ្មណ្ឌកំរិតធ្ងន់នៃស្នងការនគរបាលរាជធានីភ្នំពេញ សហការជាមួយស្នងការដ្ឋានខេត្តកំពង់ស្ពឺ ចាប់ខ្លួនតាមដីកាពីបទលួចមានស្ថានទំងន់ទោស (ប្លន់ប្រដាប់អាវុធ) ជាច្រើនករណី នៅក្នុងភូមិសាស្ត្រខេត្តកំពង់ស្ពឺ។
បន្ទាប់ពីឃាត់ខ្លួនសមត្ថកិច្ចក៏បានបន្តទៅឆែកឆេរលំនៅឋាន ដកហូតបានកាំភ្លើងខ្លី២ដើមគ្រាប់ជាច្រើនគ្រាប់, ម៉ូតូ PCX ១គ្រឿង, កាតគ្រីរថយន្ត និងម៉ូតូ១៤, ស្លាកលេខរថយន្តមួយគ្រឿង និងសំភារៈពាក់ព័ន្ធមួយចំនួន ។ ការឃាត់ខ្លួនក្រុមចោរប្លន់នេះបានធ្វើឡើង កាលពីម៉ោង៨ព្រឹក ថ្ងៃទី១៤ ខែវិច្ឆិកា ឆ្នាំ២០១៨ នៅផ្លូវបេតុងលេខ៩៣z ភូមិផ្សារតូច សង្កាត់ទួលសង្កែ ខណ្ឌឫស្សីកែវ ខណៈពេលដែលជនសង្ស័យ រួមទាំងភរិយាជិះរថយន្ត CRV មួយគ្រឿង ។
ជនសង្ស័យដែលត្រូវឃាត់ខ្លួនឈ្មោះ ហាក់ ឆាយ ភេទប្រុស អាយុ៤២ឆ្នាំ ជាន្ត្រីយោធា ថ្នាក់វរសេនីយ៍ត្រី ស្នាក់នៅផ្ទះគ្មានលេខផ្លូវ៩៣z ភូមិសាមគ្គី សង្កាត់ឫស្សីកែវ ខណ្ឌឫស្សីកែវ និងមានស្រុកកំណើតនៅភូមិកំពង់ក្តី ឃុំកំពង់រាប ស្រុកកោះសូទិន ខេត្តកំពង់ចាម។
តាមនគរបាលបានឱ្យដឹងថា ការឃាត់ខ្លួនជនសង្ស័យធ្វើឡើងតាមដីកាបង្គាប់ឱ្យចូលខ្លួនលេខ៤២២១ ចុះថ្ងៃទី៩ វិច្ឆិកា ឆ្នាំ២០១៨ ចេញដោយលោក អ៊ូផាត តំណាង អយ្យការអមសាលាដំបូងខេត្តកំពង់ស្ពឺ ពាក់ព័ន្ធករណីលួចមានស្ថានទំងន់ទោសនៅខេត្តកំពង់ស្ពឺ។
តាមព័ត៌មានឱ្យដឹងថា នៅព្រឹកមុនពេលចាប់ខ្លួនជនសង្ស័យ បានជិះរថយន្តម៉ាកស៊ីអ័រវីមួយគ្រឿងចេញពីផ្ទះ ហើយត្រូវបានកម្លាំងនគរបាលខេត្តកំពង់ស្ពឺ សហការជាមួយនគរបាលការិយាល័យព្រហ្មទណ្ឌកំរិតធ្ងន់ នៃស្នងការដ្ឋាននគរបាលរាជធានីភ្នំពេញ ស្ទាក់ឃាត់ខ្លួន រួមជាមួយភរិយា ដោយដកហូតអាវុធខ្លី១ដើម ម៉ាកឡុកពណ៌ខ្មៅគ្រាប់មួយចំនួន, ទូរស័ព្ទ២គ្រឿងនិងឯកសារពាក់ព័ន្ធមួយចំនួន។
បន្ទាប់ពីឃាត់ខ្លួនសមត្ថកិច្ចក៏បន្តសហការជាមួយនគរបាលខណ្ឌឬស្សីកែវ និងប៉ុស្តិ៍ឬស្សីកែវ ឆែកឆេរលំនៅឋានរកឃើញ កាំភ្លើងខ្លីម៉ាកកា៥៩មួយដើម និងគ្រាប់ជាច្រើនគ្រាប់ ម៉ូតូ PCX ១គ្រឿង កាតគ្រីរថយន្ត និងម៉ូតូ១៤ស្លាកលេខ រថយន្តមួយគ្រឿង និងសំភារៈពាក់ព័ន្ធមួយចំនួនទៀត។
តាមនគរបាលបានឱ្យដឹងថា ជនសង្ស័យជាមុខសញ្ញាប្លន់យ៉ាងសកម្មនៅភូមិសាស្ត្រខេត្តកំពង់ស្ពឺ ហើយគេចមកលាក់ខ្លួននៅភ្នំពេញ។ ចប់ប្រតិបត្តិការ ស្ត្រីជាប្រពន្ធត្រូវបាននគរបាលដោះលែងវិញ ចំណែកជនសង្ស័យ ត្រូវបានបញ្ជូនទៅស្នងការខេត្តកំពង់ស្ពឺដើម្បីកសាងសំណុំរឿងចាត់តាមច្បាប់៕
ចែករំលែកព័តមាននេះ