រាជធានីភ្នំពេញ ៖ រថយន្តលាយបេតុង១គ្រឿង ពេលបើកបរដឹកបេតុងយកទៅចាក់នៅការដ្ឋានសំណង់មួយកន្លែងទាំងមេឃកំពុងធ្លាក់ភ្លៀងស្រាប់តែផុងកង់មួយចំហៀងចូលប្រឡាយហើយក៏បានក្រឡាប់បះជើងតែម្ដង ប៉ុន្តែសំណាងល្អមិនបានប៉ះពាល់ដល់ទ្រព្យសម្បត្តិសាធារណៈ ឬបង្កឲ្យមនុស្សណាម្នាក់រងគ្រោះនោះឡើយ តែរថយន្តបានរងការខូចខាតយ៉ាងដំណំ។
ហេតុការណ៍នោះបានកើតឡើងកាលពីវេលាម៉ោង៧និង១៥នាទីព្រឹកថ្ងៃទី១៤ ខែវិច្ឆិកា ឆ្នាំ២០១៨ ស្ថិតនៅតាមបណ្តោយផ្លូវជាតិលេខ៤ ត្រង់ចំណុចមុខបុរីញូវថោន ស្ថិតក្នុងភូមិអង្គ សង្កាត់ចោមចៅ៣ (ព្រំប្រទល់ភូមិត្រពាំងទួល សង្កាត់កំបូល) ខណ្ឌពោធិ៍សែនជ័យ រាជធានីភ្នំពេញ។
រថយន្តលាយបេតុងដែលក្រឡាប់ខាងលើម៉ាកហ៊ីណូ ពណ៌សឆ្នូតក្រហម ពាក់ស្លាកលេខ ភ្នំពេញ ៥A-១៧២១ បើកបរដោយបុរសមិនស្គាល់ឈ្មោះម្នាក់ បានរងរបួសស្រាល។
តាមប្រភពព័ត៌មានបានឲ្យដឹងថា នៅមុនពេលកើតហេតុ រថយន្តលាយបេតុង១គ្រឿងនេះបានបើកបរដឹកបេតុងទៅចាក់នៅក្នុងការដ្ឋានសំណង់មួយកន្លែងដែលស្ថិតនៅជិតនោះ ។ ស្របពេលនោះដែលមេឃបានធ្លាក់ភ្លៀងយ៉ាងខ្លាំធ្វើឲ្យទឹកដក់តាមផ្លូវ និងលិចប្រឡាយដែលគេកាយមិនទាន់បានដាក់លូ ជាហេតុធ្វើឲ្យអ្នកបើកបររថយន្តមើលមិនឃើញស្មានថាទឹកលិចផ្លូវធម្មតាក៏បើកឆ្លងកាត់ទើបបណ្ដាលឲ្យផុងកង់ខាងស្ដាំក្រឡាប់ទាំងកំរោលតែម្ដង។
ប្រភពដដែលបានបន្តទៀតថា ហេតុការណ៍ខាងលើនោះបណ្ដាលឲ្យរថយន្តរងការខូចខាតយ៉ាងដំណំ ប៉ុន្តែសំណាងល្អមិនបានបណ្ដាលឲ្យមនុស្សណាម្នាក់រងគ្រោះ ឬបង្កឲ្យខូចខាតដល់ទ្រព្យសម្បត្តិសាធារណៈណាមួយឡើយ ។ ក្រោយពេលកើតហេតុម្ចាស់បានស្ទូចយករថយន្តនោះទៅធ្វើការជួសជុលឡើងវិញដោយខ្លួនឯង៕
ចែករំលែកព័តមាននេះ