ខេត្តប៉ៃលិន ៖ មានសេចក្តីរាយការណ៍ពីបុរសម្នាក់បានឱ្យដឹងកាលពីម៉ោង៨និង៥៣នាទីយប់ថ្ងៃទី១៣ វិច្ឆិកា ២០១៨នេះថា ក្រោយពីកូនស្រីតូចរបស់ខ្លួនទទួលរងគ្រោះដោយរលាកទឹកក្តៅ គាត់និងប្រពន្ធ ប្រញាប់ដឹកយកទៅមន្ទីរពេទ្យបង្អែកខេត្តប៉ៃលិន ដើម្បីឱ្យគ្រូពេទ្យជួយសង្គ្រោះ និងរុំរបួសទាន់ពេលវេលា…
ខេត្តប៉ៃលិន ៖ មានសេចក្តីរាយការណ៍ពីបុរសម្នាក់បានឱ្យដឹងកាលពីម៉ោង៨និង៥៣នាទីយប់ថ្ងៃទី១៣ វិច្ឆិកា ២០១៨នេះថា ក្រោយពីកូនស្រីតូចរបស់ខ្លួនទទួលរងគ្រោះដោយរលាកទឹកក្តៅ គាត់និងប្រពន្ធ ប្រញាប់ដឹកយកទៅមន្ទីរពេទ្យបង្អែកខេត្តប៉ៃលិន ដើម្បីឱ្យគ្រូពេទ្យជួយសង្គ្រោះ និងរុំរបួសទាន់ពេលវេលា ។ តែគួរឱ្យស្តាយ បែរជាគ្រូពេទ្យឱ្យដើររកទិញបង់រុំរបួស និងស្បៃនៅខាងក្រៅទៅវិញ លុះឃើញសភាពមិនស្រួល ក៏នាំកូនទៅសម្រាកព្យាបាលនៅគ្លីនិកឯកជន ។
បញ្ហានេះ បណ្តាលឱ្យគ្រួសារជនរងគ្រោះ អន់ចិត្តយ៉ាងខ្លាំង ខណៈមន្ទីរពេទ្យបង្អែកទាំងមូលអត់មានបង់រុំរបួស ។ ហើយហេតុការណ៍ក្មេងស្រីតូចរលាកទឹកក្តៅឆ្នាំងសម្លនេះ គឺកើតឡើងកាលពីម៉ោង៤ និង៤០នាទីរសៀល ថ្ងៃទី១៣ វិច្ឆិកា ស្ថិតក្នុងភូមិប៉ាហ៊ីត្បូង សង្កាត់ប៉ៃលិន ក្រុងប៉ៃលិន ហើយយកទៅដល់មន្ទីរពេទ្យនៅម៉ោង៤ និង៤៥នាទីរសៀលថ្ងៃដដែល ។
ក្មេងស្រីរងគ្រោះឈ្មោះ ឆុំ រចនា ភេទស្រី អាយុ១ឆ្នាំ រងរបួសរលាកទឹកក្តៅឆ្នាំងសម្លស្ទើរពេញដងខ្លួនប្រាណ មានឪពុកឈ្មោះ ជុំ សាន អាយុ៥០ឆ្នាំ ជាមន្ត្រីនគរបាលអធិការដ្ឋាននគរបាលស្រុកសំឡូត និងម្តាយឈ្មោះ លីម ស្រីម៉ៅ អាយុ៤០ឆ្នាំ ។
ប្រភពពីបុរសជាឪពុកក្មេងស្រីរងគ្រោះបានរៀបរាប់ឱ្យដឹងថា ពេលកូនច្បងគាត់ចេញពីសាលារៀននាថ្ងៃរសៀល ត្រូវបានម្តាយប្រើឱ្យយកប្អូនដើរលេង លុះឆ្នាំងសម្លពុះជិតឆ្អិតទៅហើយក៏ត្រឡប់មកវិញ រួចដាក់ប្អូនលើម៉ូតូក្បែរចង្ក្រានសម្លដែលជិតលើកចេញទៅហើយនោះ ស្រាប់តែជន្ទល់ម៉ូតូអត់ជាប់ល្អ បណ្តាលឱ្យដួលទៅលើចង្ក្រានសម្លរលាកពេញខ្លួនតែម្តង ។
គាត់បន្តទៀតថា ពេលទៅដល់មន្ទីរពេទ្យ ឃើញគ្រូពេទ្យស្រីក្មេងម្នាក់ប្រចាំការក៏បានជួបហើយ ប្រពន្ធគាត់ប្រាប់ថា កូនរបស់ខ្លួនបានរលាកទឹកក្តៅ ពេលនោះគ្រូពេទ្យក៏ងើបមកមើលដែរ ។ បន្ទាប់មកអ្នកគ្រូពេទ្យគោះបន្ទប់មួយទៀតជួបជាមួយនឹងគ្រូពេទ្យប្រុស ដោយនិយាយគ្នាមួយសន្ទុះ ខណៈគាត់ស្តាប់គេមិនដឹងនិយាយពីរឿងអ្វីនោះទេ ព្រោះកូនស្រីរបស់ខ្លួនស្រែកយំខ្លាំងពេក ។
គាត់បន្តថា ស្របពេលនោះ ស្រាប់តែគ្រូពេទ្យប្រាប់ឱ្យគាត់ដើររកទិញបង់រុំរបួសខាងក្រៅ ព្រោះនៅក្នុងមន្ទីរពេទ្យអត់មានទេ ហើយគាត់នឹកអន់ចិត្តយ៉ាងខ្លាំង សូម្បីតែបង់រុំរបួសអត់មានផង បើកូនគាត់ដេកពេទ្យ តើទៅពឹងអ្វីទៀត ហើយរកថ្នាំឯណាមកព្យាបាល ។ ក្រោយមកគាត់ក៏សុខចិត្តយកកូនទៅសម្រាកព្យាបាលនៅគ្លីនិកឯកជន (ពេទ្យរ៉ា) តែគេឱ្យទៅមន្ទីរពេទ្យបង្អែកដដែល ហើយគាត់ប្រាប់ថា ទើបតែចេញមកអម្បាញ់មិញនេះដែរ រួចទើបយកទៅគ្លីនិកឯកជនផ្សេងទៀត ក៏មានការរុំរបួស និងបាញ់ស្ព្រាយ៍ធ្វើឱ្យត្រជាក់ខ្លួនលែងសូវយំបន្តទៀត ។
ពាក់ព័ន្ធទៅនឹងបញ្ហានេះ លោកវេជ្ជបណ្ឌិត អាង នាង ប្រធានមន្ទីរសុខាភិបាលខេត្តប៉ៃលិន បានឱ្យដឹងថា ចំពោះបង់រុំរបួស និងបង់កំប្រេសមិនខ្វះនោះទេ នៅក្នុងមន្ទីរពេទ្យបង្អែកខេត្តប៉ៃលិន ដោយគ្រូពេទ្យប្រាប់ឱ្យឪពុកម្តាយក្មេងរងគ្រោះនោះដើររកទិញតែស្ព្រាយ៍បាញ់ឱ្យត្រជាក់សាច់ប៉ុណ្ណោះ ដោយសារនៅក្នុងមន្ទីរពេទ្យអត់មានទេ ព្រោះស្ព្រាយ៍បាញ់ឱ្យត្រជាក់មិនមែនជាថ្នាំពេទ្យឡើយ គេដាក់លក់នៅតាមហាងសម្រាប់យកទៅបាញ់ធ្វើកម្មវិធីខួបកំណើតជាដើម ។
លោកបន្តទៀតថា ប្រហែលជាគាត់ស្តាប់មិនច្បាស់ច្រឡំ ថា គ្រូពេទ្យឱ្យដើររកទិញបង់រុំរបួស និងកំប្រេសទៅវិញ ហើយថែមទាំងបង្ហោះហ្វេសប៊ុកទៀតផង ។ ដូច្នេះខាងក្រុមគ្រូពេទ្យរបស់លោកក៏បានឆ្លើយតបបកស្រាយវិញហើយដែរ ៕
ចែករំលែកព័តមាននេះ