រាជធានីភ្នំពេញ៖ នីឡា បានវាយបកអ្នករិះគន់មួយចំនួនដែលចំអកនាងជាមេម៉ាយខាន់ស្លាទាំងវ័យក្មេង បន្ទាប់ពីនាងបានធ្លាយដំណឹងសាងស្នេហ៍ថ្មី ។ នីឡា បានសម្តែងការមិនសប្បាយចិត្តនៅពេលនាងត្រូវគេហៅថា មេម៉ាយខាន់ស្លា ដោយភ្ជាប់ទៅនឹងរឿងទាក់ទងជាមួយសង្សារថ្មី ក្រោយផ្តាច់ពាក្យជាមួយអតីតគូដណ្តឹង ដែលជាកូនអ្នកសម្បូរទ្រព្យ ។
កាលពីពេល ថ្មីៗកន្លងមកនីឡា បានតបទៅអ្នករិះគន់ទាំងនោះថា «គួរមានការពិចារណាមុននឹងនិយាយបែបនេះ។ តើមានមនុស្សស្រីប៉ុន្មាននាក់ដែលចង់មានឈ្មោះជាមេម៉ាយខាន់ស្លា ? សប្បាយមែនទេដែលដើរនិយាយពីខ្ញុំថាខ្ញុំមេម៉ាយខាន់ស្លា សុខចិត្តផ្ដាច់ពាក្យទៅមានប្រុស ? អ្នកដឹងច្បាស់ ហើយមែនទេ ? ពេលខ្ញុំភ្ជាប់ពាក្យថាខ្ញុំស្រឡាញ់គេដោយសារគេមានឡានល្អ មានលុយ…ពេលខ្ញុំផ្ដាច់ពាក្យទៅស្គាល់អ្នកផ្សេង គេជាមនុស្សធម្មតាមិនឡូយឆាយ មិនចេះតែងខ្លួន ហើយនៅក្មេង…ថាខ្ញុំស្រឡាញ់ពួកពាល បាតសង្គម! ធ្វើម៉េចទៅបានត្រូវ ។ ស្រឡាញ់អ្នកមានក៏ខុស ស្រឡាញ់អ្នកធម្មតាក៏ខុស… ។
ខ្ញុំសុំផ្ដាំមុននឹងបើកគម្របមាត់និយាយ យកខួរមកគិតសិន ចាំនិយាយ(គិតឲ្យបាន១០០សិនចាំនិយាយ)ខ្ញុំឈឺចាប់ជិតនឹងឆ្កួតដោយសារពាក្យ «គូដណ្ដឹង» ឈឺគ្រាំ ហើយមុននឹងបញ្ចប់គេក៏បាននិយាយថា «បងស្ដាយដែលបាត់បង់មនុស្សស្រីដូចអូន បងមិនដែលមើលឃើញអំពើល្អរបស់អូន គិតតែការងារមិនដែលខ្វល់នឹងមនុស្សស្រីម្នាក់នេះ បើសិនមានឱកាសបងនឹងកែខ្លួនធ្វើមនុស្សល្អសម្រាប់អូន» ហើយអ្នកដែលមិនដឹងរឿងនៅឲ្យស្ងៀមទៅកុំលូតាមគេ…»។
មួយរយៈចុងក្រោយនេះនីឡា បានធ្វើឲ្យមហាជនចាប់អារម្មណ៍ និងមានសារព័ត៌មានចុះផ្សាយជាហូរហែ បន្ទាប់ពីនាងបានបង្ហាញភាពស្និទ្ធស្នាលជាមួយបុរសវ័យក្មេងម្នាក់ ។ បុរសវ័យក្មេងដែលមានការស្និទ្ធស្នាលនោះត្រូវបានគេគិតថា គឺជាគូស្នេហ៍ថ្មីរបស់នីឡា បន្ទាប់ពីនាងបានសម្រេចចែកផ្លូវជាមួយអតីតគូដណ្តឹងមក ។
បុរសវ័យក្មេងដែលគេសន្និដ្ឋានថា ជាគូស្នេហ៍ថ្មីរបស់នីឡានោះ ឪពុករបស់នាងលោកសុវណ្ណរិទ្ធី ហៅថាតាវិចទ័រ មិនបានអធិប្បាយអ្វីទាំងអស់ នៅពេលមានការសាកសួរពីកោះសន្តិភាពតាមសារអេឡិចត្រូនិកកាលពីពេល ថ្មីៗកន្លងមក ។
ទោះបីជាបែបណាក្តីបើយោងតាមសំណេរដែលនីឡា បានសរសេរបង្ហោះនោះគេអាចសន្និដ្ឋានបានថា ជាគូស្នេហ៍របស់នាងយ៉ាងពិតប្រាកដ បើទោះបីជានាងមិនបញ្ជាក់ដោយបើកចំហ និងច្បាស់លាស់ក៏ដោយ៕
ចែករំលែកព័តមាននេះ