ទីក្រុងសេអ៊ូល ៖ យោងតាមលោក Hong Nam-ki រដ្ឋមន្ត្រីហិរញ្ញវត្ថុថ្មីរបស់កូរ៉េខាងត្បូងបានឲ្យដឹងថា ឧបសគ្គសេដ្ឋកិច្ចដែលកូរ៉េខាងត្បូងបានជួបប្រទះក្នុងឆ្នាំនេះមិនអាចបាត់ទៅវិញទេនៅឆ្នាំ២០១៩ ។ លោក Hong បានប្រាប់ដល់សារព័ត៌មានកាលពីថ្ងៃសុក្រមកថា ឆ្នាំក្រោយអាចនឹងពិបាកប៉ុន្តែលោកបានបន្តថា វានៅលឿននៅឡើយក្នុងការនិយាយថា សេដ្ឋកិច្ចរបស់ប្រទេសនឹងជួបវិបត្តិ ។
កាលពីថ្ងៃសុក្រ លោកប្រធានាធិបតី Moon Jae-in បានចាត់តាំងលោក Hong ជារដ្ឋមន្ត្រីហិរញ្ញវត្ថុនិងឧប្បនាយករដ្ឋមន្ត្រីរបស់ប្រទេស ។
ខុទ្ទកាល័យរបស់លោក Moon កំពុងតែជួបប្រទះឧបសគ្គក្នុងការដោះស្រាយបញ្ហាជាច្រើនរួមទាំងអត្រាយុវវ័យដែលមិនមានការងារធ្វើ បំណុលគ្រួសារ និងផលប៉ះពាល់ពីសង្គ្រាមពាណិជ្ជកម្មរវាងសហរដ្ឋអាមេរិក និងប្រទេសចិន លើសេដ្ឋកិច្ចដែលពឹងផ្អែកលើការនាំចេញរបស់កូរ៉េខាងត្បូងជាដើម ។
លោក Hong ដែលធ្លាប់ជាអ្នកនាំពាក្យរបស់ក្រសួងហិរញ្ញវត្ថុបាននិយាយថា លោកនឹងព្យាយាមបង្កើតការងារបន្ថែមក្នុងវិស័យសេវាកម្ម និងបានលើកឡើងពីសារសំខាន់នៃការជំរុញដល់ក្រុមហ៊ុនបង្កើតថ្មី និងការបន្ធូរបន្ថយផ្នែកច្បាប់។
លោកបានលើកឡើងម្តងហើយម្តងទៀតពីតម្រូវការក្នុងការជំរុញដល់គោលនយោបាយដែលអាចបង្កើនប្រាក់បៀវត្សរ៍ និងកាត់បន្ថយគម្លាតប្រាក់ចំណូលកាន់តែលឿន ។ ទាក់ទិននឹងការផ្តួចផ្តើមរបស់រដ្ឋាភិបាលក្នុងការជំរុញដល់សេដ្ឋកិច្ចតាមរយៈការបង្កើតថ្មីវិញ លោក Hong បានលើកឡើងថា ការចំណាយក្នុងវិស័យសារធារណៈ ដើរតួយ៉ាងសំខាន់ក្នុងការគាំទ្រដល់វិស័យឯកជន ។
លោកបានបន្ថែមថា លោកនឹងជួបជាមួយអ្នកដឹកនាំអាជីវកម្មរាល់ថ្ងៃពុធ និងធ្វើទស្សនកិច្ចទៅកាន់ក្រុមហ៊ុនផ្សេងៗជាប្រចាំ ៕
ចែករំលែកព័តមាននេះ